About The Author

അഖിലന്‍
akhilkrishnans@gmail.com

“Internet1″ by Rock1997 via Wikimedia Commons -

എച്ച്.ടി.ടി.പി 1.1 ന് പകരക്കാരിയായി – എച്ച്.ടി.ടി.പി 2 എത്തുന്നു. പതിനഞ്ച് വര്‍ഷമായി നല്‍കിവന്ന സേവനത്തിന് വിശ്വ വ്യാപന വലയുടെ സമൂഹം നന്ദി രേഖപ്പെടുത്തി തുടങ്ങി. ഇന്റര്‍നെറ്റിന്റെ സാങ്കേതിക കാര്യങ്ങള്‍ നിയന്ത്രിക്കുന്ന ഇന്റര്‍നെറ്റ് എഞ്ചിനീറിങ്ങ് സ്റ്റീറിങ് ഗ്രൂപ്പ് (IESG), HTTP 2.0 പ്രോട്ടോക്കോളുകള്‍ക്കും HPACK ഹെഡറുകള്‍ക്കും അംഗീകാരം നല്‍കിക്കഴിഞ്ഞു. ഉടൻ തന്നെ പൊതുജനങ്ങളില്‍ നിന്നും അഭിപ്രായങ്ങള്‍ ശേഖരിക്കാനായി ഇത് എഞ്ചിനീയറിംഗ് സമൂഹത്തിന്റെ ഔദ്യോഗിക ആര്‍.എഫ്.സി (Request for Comments-RFC) ക്യൂവിലെത്തുകയും ചര്‍ച്ചയ്ക്കു ശേഷം പൊതു ഉപയോഗത്തിനായി പ്രസിദ്ധപ്പെടുത്തുകയും ചെയ്യും. വെബ് അധിഷ്ഠിത ഉത്പന്നങ്ങളെ സംബന്ധിച്ചിടത്തോളം സവിശേഷമായ ഒരു ചുവടുവെയ്പ്പാണിതു്.

എന്താണു് HTTP? എങ്ങനെയാണതിന്റെ പ്രവര്‍ത്തനം?

ഇന്റര്‍നെറ്റില്‍ ഏറ്റവുമധികം ഉപയോഗിക്കപ്പെടുന്ന സേവനമായ വെബ്ബിനു ആധാരമായ  ചില ഡിജിറ്റല്‍ നിയമങ്ങളുടെ കൂട്ടം (പ്രോട്ടോക്കോള്‍) ആണ് ഹൈപര്‍ടെക്സ് ട്രാസ്ന്ഫര്‍ പ്രോട്ടോക്കോള്‍ അഥവാ എച്ച്ടിടിപി. ഇത് വിവരവിനിമയത്തില്‍ ഏര്‍പ്പെടുന്ന കമ്പ്യൂട്ടറുകളെല്ലാം അനുസരിക്കേണ്ട ഡിജിറ്റല്‍ നിയമങ്ങളാണ്. കമ്പ്യൂട്ടര്‍ ശ്രംഖലകളെ ക്രമീകരിക്കുവാനായി നിര്‍മ്മിച്ച ചട്ടക്കൂടായ ഐ.എസ്.ഓ/ഓ.എസ്.ഐ പ്രകാരം ഏറ്റവും മുകളിലത്തെ പാളിയായ ആപ്ലിക്കേഷൻ ലെയറിലാണിതു പ്രവര്‍ത്തിക്കുന്നതു്.  ഒരു റിക്വസ്റ്റ് – റെസ്പോണ്‍സ് മാതൃകയില്‍ പ്രവര്‍ത്തിക്കുന്ന ഈ പ്രോട്ടോക്കോളില്‍ ക്ലൈന്റായി ഉപഭോക്താവിന്റെ കമ്പ്യൂട്ടറും സെര്‍വ്വറായി സേവനദാതാവിന്റെ കമ്പ്യൂട്ടറുമാവും വര്‍ത്തിക്കുക. ലളിതമായി പറഞ്ഞാല്‍ പണം നല്‍കുമ്പോള്‍ കടക്കാരൻ സാധനം തരും പോലെ തന്നെ. ഉപയോക്താവ് പണത്തിന്റെ രൂപത്തില്‍ ഒരു സേവനത്തിനുള്ള റിക്വസ്റ്റ് . നല്‍കുകയാണു് അതു കേട്ട് കടക്കാരൻ അദ്ദേഹത്തിന്റെ സേവനം വസ്തുവിന്റെ രൂപത്തില്‍ നല്‍കുന്നു.

വേള്‍ഡ് വൈഡ് വെബിന്റെ പിതാവായ ടിം ബെര്‍ണേഴ്സ് ലീയും കൂട്ടാളികളുമാണു എണ്‍പതുകളുടെ അവസാനത്തോടെ എച്ച്ടിടിപിയുടെ ആദിമ രൂപം അവതരിപ്പിക്കുന്നതു്. ഹൈപര്‍ടെക്സ്റ്റ് ഉപയോഗിച്ചെഴുതിയ വെബ്‌പേജുകള്‍ പരസ്പരം ഹൈപര്‍ലികുകളാല്‍ ബന്ധിപ്പിക്കുന്ന വിധത്തിലായിരുന്നു വെബിന്റെ ഘടന മുന്നോട്ട് വെച്ചത്. ഇത്തരത്തിലുള്ള ഹൈപര്‍ടെക്സ്റ്റ് ഉള്ളടക്കം ക്രിയാത്മകമായി കൈമാറ്റം ചെയ്യാൻ കഴിയണം എന്നതായിരുന്നു എച്ച്.ടി.ടി.പി നിര്‍മ്മിക്കാൻ പ്രേരിപ്പിച്ച ഘടകം. വെബിനു വേണ്ടി മാത്രമായിരുന്നു നിര്‍മ്മാണമെങ്കിലും പിന്നീട് വന്നേക്കാവുന്ന മുന്നേറ്റങ്ങള്‍കൂടി മുന്നില്‍ കണ്ടിരുന്നു. മെഥേഡ്സ് എന്നറിയപ്പെടുന്ന ഒരു കൂട്ടം പ്രയോഗങ്ങള്‍ മുഖേനയാണു സെര്‍വറിലെ എണ്‍പതാം നമ്പര്‍ പോര്‍ട്ടുമായി ക്ലൈന്റ് വിനിമയ ബന്ധത്തിലേര്‍പ്പെടുക. ഇതില്‍ GET എന്ന മെഥേഡുപയോഗിച്ചായിരിക്കും ഒരു യൂസര്‍ ഏജന്റ് അഥവാ വെബ് ബ്രൗസര്‍ ഒരു വെബ്‌ പേജിനായി അഭ്യര്‍ഥിക്കുക. ഉദാഹരണത്തിനു ഗൂഗിളിന്റെ ഹോം പേജിനായുള്ള അഭ്യര്‍ത്ഥന ‘GET google.com HTTP/1.1′ എന്ന വിധത്തിലാവും. ഇവിടെ google.com എന്നത് ഫയലിന്റെ സ്ഥാനവും (യൂണിഫോം റിസോഴ്സ് ഐഡന്റിഫയര്‍ -URI) ശേഷമുള്ളത് പ്രോട്ടോക്കോള്‍ പതിപ്പിനേയും സൂചിപ്പികുന്നു. ഇതിനൊപ്പം തന്നെ ഉപയോക്താവിന്റെ പ്രവര്‍ത്തകം (ഓപറേറ്റിങ്ങ് സിസ്റ്റം, ബ്രൗസര്‍), ലഭ്യമാക്കേണ്ട പേജിന്റെ ഭാഷ, മറ്റ് സവിശേഷതകള്‍ എന്നിവയും സെര്‍വ്വറുമായി പങ്കുവയ്ക്കും.

“Tim Berners-Lee CP 2″ by Silvio Tanaka – via Wikimedia Commons.

ഓരോ അഭ്യര്‍ത്ഥനയ്ക്കും മറുപടിയായി സെര്‍വ്വര്‍ ഒരു മൂന്നക്ക സ്റ്റാറ്റസ് കോഡ് തിരിച്ചയയ്ക്കും. ഇതു അഭ്യര്‍ത്ഥനയ്ക്ക് സെര്‍വ്വറില്‍ എന്താണു സംഭവിച്ചെന്നതിനെ സൂചിപ്പിക്കുന്നു. ഉദാ: 200 എന്നത് പ്രവര്‍ത്തനം വിജയമാണെന്നും (request succeed), 404 അഭ്യര്‍ത്ഥിച്ച പേജ് നിലവിലില്ലെന്നും (page not found), 500 സെര്‍വര്‍ പിശക് സംഭവിച്ചെന്നും കാണിക്കുന്നു (internal server error). വിജയമാണേങ്കില്‍ മാത്രം സ്റ്റാറ്റസ് കോഡിനു പിന്നാലെയായി സെര്‍വറിനെപ്പറ്റിയുള്ള അധികവിവരങ്ങളും (ഉപയോഗിക്കുന്ന സെര്‍വ്വര്‍ സോഫ്റ്റ്‌വെയര്‍, പേജിന്റെ വലിപ്പം, അവസാനം പരിഷ്കരിച്ചത് മുതലായവയും) അഭ്യര്‍ത്ഥിച്ച പേജും ക്ലൈന്റിനു ലഭ്യമാകും. ഇവ ഉപയോക്താക്കള്‍ക്കു മുൻപില്‍ പ്രദര്‍ശിപ്പിക്കുക എന്നത് ബ്രൗസറിന്റെ ജോലിയാണു്.

example.com എന്ന വെബ്‌പേജിനായി മോസില്ല ഫയര്‍ഫോക്സ് ഉപയോഗിച്ച് നടന്ന റിക്വസ്റ്റ് – റെസ്പോണ്‍സ് താഴെ:

റിക്വസ്റ്റ്:
GET / HTTP/1.1
User-Agent: Mozilla/5.0 (X11; Linux i686; rv:37.0) Gecko/20100101 Firefox/37.0
Host: www.example.com
Accept-Language: ml-IN, ml
Connection: Keep-Alive

റെസ്പോണ്‍സ്:
HTTP/1.1 200 OK
Accept-Ranges: bytes
Cache-Control: max-age=604800
Content-Type: text/html
Date: Sun, 22 Feb 2015 09:54:14 GMT
Etag: “359670651”
Expires: Sun, 01 Mar 2015 09:54:14 GMT
Last-Modified: Fri, 09 Aug 2013 23:54:35 GMT
Server: ECS (ewr/15BD)
X-Cache: HIT
x-ec-custom-error: 1
Content-Length: 1270

ശേഷം പേജിനായുള്ള എച്ച്.ടി.എം.എല്‍ ഉള്ളടക്കവും.

HTTP 2.0യിലേക്ക്

15 കൊല്ലമായി ഉപയോഗത്തിലിരിക്കുന്ന HTTP യുടെ 1.1 പതിപ്പ് രംഗത്തെത്തിയതിന് ശേഷം ഉപയോക്താക്കളുടെ വെബ് ഉപയോഗരീതി അടിമുടി മാറിയിട്ടുണ്ടു്. വെബ്‌ 2.0 നാല്‍ കൈകാര്യം ചെയ്യപ്പെടുന്ന ഉള്ളടക്കം മുൻപുണ്ടായിരുന്നതില്‍ നിന്നും പാടേ വ്യത്യസ്ഥമാണു്. ടെക്സ്റ്റിനെക്കാളും മള്‍ട്ടിമീഡിയയ്ക്ക് സ്വീകാര്യത ലഭിച്ചു തുടങ്ങിയിരിക്കുന്നു. മാത്രമല്ല HTTP 1.1 ലൂടെ നിര്‍മ്മിക്കാവുന്ന ടിസിപി (Transmission Control Protocol) കണക്ഷനുകള്‍ക്ക് പരിധിയുണ്ടു്. അതേസമയം ഒരേ സെര്‍വറുമായി ബ്രൗസറുകള്‍ അനാവശ്യമായി പുതിയ കണക്ഷനുകള്‍ നിര്‍മ്മിക്കുന്നതു മൂലം വളരെയധികം വിഭവങ്ങളാണു (ബാന്റ്‌വിഡ്ത്ത്, പ്രോസസിങ്ങ് പവര്‍) പാഴാക്കപ്പെടുന്നതു്.

HTTP 1.1ന്റെ പൂര്‍ണ്ണമായ ഒരു പൊളിച്ചെഴുത്തല്ല 2.0. നിലവിലുള്ള പ്രോട്ടോക്കോളില്‍ സാഹചര്യങ്ങള്‍ക്ക് അനുസൃതമായി മെച്ചപ്പെടുത്തലുകള്‍ കൊണ്ടുവരികയാണു ഇതുകൊണ്ടുദ്ദേശിക്കുന്നതു്. ഗുഗിള്‍ നിര്‍മ്മിച്ച സ്പീഡീ (SPDY) എന്ന പ്രോട്ടോക്കോള്‍ സ്റ്റാക്ക് അധാരമാക്കിയ 2.0 യില്‍, മെഥേഡുകള്‍, സ്റ്റാറ്റസ് കോഡുകള്‍, പദവിന്യാസം എന്നിവയില്‍ 1.1 ലേതില്‍ നിന്നും കാര്യമായ മാറ്റങ്ങള്‍ വരുത്തിയിട്ടില്ലെങ്കിലും വേഗത, സുരക്ഷിതത്വം, കുറഞ്ഞ വിഭവ ഉപയോഗം എന്നിവയ്ക്ക് പ്രാധാന്യം നല്‍കിയിരിക്കുന്നു. സം‌പ്രേക്ഷണസമയത്ത് HTTP ഹെഡര്‍ ഫയലുകളുടെ വലിപ്പം കുറയ്ക്കുന്നതിനെക്കുറിച്ചു പ്രതിപാദിക്കുന്ന HPACK നിര്‍ദ്ദേശങ്ങളും പ്രോട്ടോക്കോളിന്റെ ഭാഗമാണു്. ഹഫ്‌മാൻ കോഡിങ്ങാണു ഇതിനായി ഉപയോഗിക്കുക. മുൻപുള്ള പ്രോട്ടോക്കോളുകളുമായി പൂര്‍ണ്ണമായ ആനുരൂപ്യം ഉറപ്പുവരുത്തുന്ന HTTP 2.0, അവയില്‍ നിന്നും വ്യത്യസ്ഥമായി ടെക്സ്റ്റിനു പകരം ബൈനറി വ്യവസ്ഥയാണു ആധാരമാക്കിയിരിക്കുന്നതു്. ഇതിനാല്‍ ടെക്സ്റ്റ് പാഴ്സ് (Parse) ചെയ്യപ്പെടാനുള്ള കാലതാമസം ഒഴിവാക്കുന്നതിനൊപ്പം പിശകിന്റെ അളവു കുറയ്ക്കുന്നതിനും സഹായിക്കുന്നു. ചാറ്റ് പോലത്തെ സേവനങ്ങള്‍ക്ക് പ്രയോജനകരമായ രീതിയില്‍ സെര്‍വര്‍ പുഷ് സാങ്കേതികവിദ്യയും 2.0 പതിപ്പില്‍ ഉള്‍പ്പെടുത്തിയിട്ടുണ്ട്. ഒരു റിക്വസ്റ്റ് ഇല്ലാതെ തന്നെ അടുത്തതായി ഉപയോഗത്തില്‍ വരാൻ സാധ്യതയുള്ള ഉള്ളടക്കം ക്ലൈന്റിനു സെര്‍വ്വര്‍ ലഭ്യമാക്കുകയാണിതില്‍ ചെയ്യുന്നതു്.

ഡാറ്റാ പാക്കറ്റുകളുടെ വിനിമയത്തെപ്പറ്റി വ്യകതമായ കാഴ്ചപ്പാട് HTTP 2.0 പങ്കുവയ്ക്കുന്നു. പൈപ്‌ലൈനിങ്ങ് വഴി ഒന്നിലധികം റിക്വസ്റ്റുകള്‍ സമാന്തരമായി കൈകാര്യം ചെയ്യാൻ ബ്രൗസറുകള്‍ക്ക് ഇതിലൂടെ അവസരമൊരുക്കുന്നു (പാരലലിസം). പാരലലിസം കമ്പ്യൂട്ടറിന്റെ ശേഷി കൂട്ടാനുപയോഗിക്കുന്ന ഒരു ടെക്‌നിക് ആണു്. ഒരു ജോലി ചെയ്ത് തീര്‍ക്കുന്നത് പല ഭാഗങ്ങളുടെ സഹായത്തോടെയായിരിക്കാം. എന്നാല്‍ എല്ലാ സമയത്തും എല്ലാ ഭാഗങ്ങളും ഉപയോഗിക്കണമെന്നില്ല. ഒരു ജോലി ചെയ്തു തീര്‍ന്നിട്ടു മാത്രം അടുത്തതു തുടങ്ങാൻ നിന്നാല്‍ ഇവയില്‍ മിക്കതും ഭൂരിഭാഗം സമയത്തും വെറുതേയിരിക്കും. അതൊഴിവാക്കാനായി ഒന്നിലധികം ജോലികള്‍ ഒരേ സമയത്ത് ചെയ്യും. ഓരോ ഭാഗങ്ങളും എപ്പോഴും ഏതെങ്കിലും ജോലിയില്‍ വ്യാപൃതരായിരിക്കുകയും അതുവഴി കൂടുതല്‍ ജോലി പെട്ടെന്നു ചെയ്തു തീരിക്കാനും പ്രതികരണക്ഷമത കൂട്ടാനും കഴിയുന്നു. ഒരു ക്യൂവില്‍ അകപ്പെടുന്ന പാക്കറ്റ് പിന്നാലെ വരുന്ന പാക്കറ്റുകളുടെ സുഗമമായ ഒഴുക്കിനു തടയിടുന്ന ‘ഹെഡ് ഓഫ് ലൈൻ പ്രോബ്ലം’ 2.0ല്‍ പരിഹരിച്ചിട്ടുണ്ടു്. ആപ്ലിക്കേഷൻ ലെയറില്‍ തന്നെ പാക്കറ്റുകളുടെ ഒഴുക്ക് നിയന്ത്രിക്കാനാവുന്നതോടെ (ഫ്ലോ കണ്ട്രോള്‍) സംവഹനമാധ്യമത്തിലെ (Carrying Medium) തിരക്ക് ഒരു പരിധിവരെ കുറയ്ക്കാനാവും. ഒപ്പം ഒരു 32 ബിറ്റ് അക്കം ഉപയോഗിച്ച് പാക്കറ്റുകള്‍ക്കു മുൻഗണന നല്‍കാനും ഇതില്‍ കഴിയും. ടിഎല്‍എസ്. (ട്രാൻസ്പോര്‍ട്ട് പാളിയില്‍ ഉപയോഗിക്കുന്ന ഒരു എൻക്രിപ്ഷൻ പ്രോട്ടോക്കോള്‍) നിര്‍ബന്ധമാക്കുന്നതിലൂടെ മെച്ചപ്പെട്ട സുരക്ഷയും HTTP 2.0 വാഗ്ദാനം ചെയ്യുന്നുണ്ടു്. പേജ് ലോഡ് ചെയ്യാനെടുക്കുന്ന സമയം 50 ശതമാനത്തോളം കുറയ്ക്കാനാവുമെന്നാണു സാങ്കേതികവിദഗ്ദര്‍ അഭിപ്രായപ്പെടുന്നതു്.

വിമര്‍ശനങ്ങള്‍

ഇങ്ങനെയൊക്കെയാണെങ്കിലും ഇതിനകം തന്നെ ഒട്ടനവധി വിമര്‍ശനങ്ങള്‍ പുതിയ പ്രോട്ടോക്കോളിനു നേരെ ഉയര്‍ന്നു വന്നിട്ടുണ്ടു്. ഗൂഗിള്‍ പോലുള്ള കോര്‍പറേറ്റുകളുടെ രാഷ്ട്രീയ അജണ്ട നടപ്പിലാക്കാനാണു് ഇന്റര്‍നെറ്റ് എഞ്ചിനീറിങ്ങ് ടാസ്ക് ഫോഴ്സ് ഇതിലൂടെ ശ്രമിക്കുന്നതു എന്നതാണു ഇതില്‍ പ്രധാനം. ഉപയോക്താക്കള്‍ക്ക് മുകളില്‍ ഇതു അനാവശ്യ മോണിറ്ററിങ്ങിനു വഴിയൊരുക്കാം എന്നും ആരോപണമുണ്ട്. അസ്ഥിരത, അനാവശ്യ സങ്കീര്‍ണത എന്നിവയും HTTP 2 നെ പ്രതിക്കൂട്ടില്‍ നിര്‍ത്തുന്നവയില്‍ ചിലതാണു്.

http://http2.github.io/http2-spec/index.html

൩) Making the Web Faster with HTTP 2.0 HTTP continues to evolve, Ilya Grigorik, ACM Queue

http://queue.acm.org/detail.cfm?id=2555617

൪) HTTP/2.0 – The IETF is Phoning It In Bad protocol, bad politics, Poul-Henning Kamp, ACM Queue

http://queue.acm.org/detail.cfm?id=2716278

Use Facebook to Comment on this Post

About The Author

രഞ്ജിത് സജീവ്
www.smashingweb.info

നെറ്റ് നിഷ്പക്ഷത രാജ്യത്ത് ചൂടേറിയ ചര്‍ച്ചയായിരിക്കുന്നു. പലരാജ്യങ്ങളും ജനരോഷം ഭയന്ന് മാറ്റിവെച്ച നെറ്റ് വിവേചനം എന്ന, ഉപയോക്താക്കളെ പിഴിയല്‍ പരിപാടി, ഇന്ത്യയില്‍ നടപ്പാക്കാനുള്ള ശ്രമങ്ങള്‍ കൊണ്ടുപിടിച്ച് നടക്കുകയാണ്.     

കമ്പ്യൂട്ടറുകളെത്തമ്മില്‍ ബന്ധിപ്പിക്കുന്ന ശൃംഖലകളില്‍ (network) നിന്നാണ് ഇന്റർനെറ്റ് രൂപമെടുത്തത്. ഇരുപതാം നൂറ്റാണ്ടിന്റെ അവസാനത്തിലും ഇരുപത്തൊന്നാം നൂറ്റാണ്ടിന്റെ ആദ്യത്തിലുമായി,  ചില കമ്പ്യൂട്ടര്‍  തമ്മിലുള്ള ബന്ധങ്ങള്‍ എന്നതിനേക്കാളുപരി  ഇന്റര്‍നെറ്റ് ലോകമാകമാനം വ്യാപിക്കുകയും ലോകജനതയുടെ എറ്റവും വലിയ ആശയവിനിമയ മാധ്യമമായി മാറുകയും ചെയ്തു. ലോകത്തിലെ സമസ്ത മേഖലകളിലും വിവരകൈമാറ്റ ഉപാധിയായി ഇന്റര്‍നെറ്റ് മാറി എന്നുപറയാം.  അപ്പോഴും അതിന്റെ അടിസ്ഥാന സ്വഭാവം – അതായത് അതുമായി ബന്ധിപ്പിക്കപ്പെട്ടിട്ടുള്ള കമ്പ്യൂട്ടറുകളും മറ്റ് ഉപകരണങ്ങളുമായി യാതൊരു വിവേചനവുമില്ലാതെ വിവരങ്ങള്‍ പങ്കുവയ്ക്കുക എന്ന സ്വഭാവം – യാതൊരു വ്യത്യാസവും കൂടാതെ നിലനിന്നുപോന്നു.

എന്നാല്‍ ലോകത്തിന്റെ ചിലയിടങ്ങളില്‍ കൂടുതല്‍ വ്യാപകവും ഗുണനിലവാരമുള്ളതുമായ ശൃംഖലകള്‍ ലഭ്യമായപ്പോള്‍ അവിടെയെല്ലാം വേഗത്തില്‍ ഡാറ്റ ലഭ്യമാവുകയും വിവരങ്ങള്‍ വേഗത്തില്‍ ലഭ്യമാവുകയും ചെയ്തു. ഇങ്ങനെ കമ്പികളിലൂടെയും കമ്പിയില്ലാതെയും ഇന്റര്‍നെറ്റ് ശൃംഖലയുമായി നിങ്ങള്‍ക്ക് ബന്ധമൊരുക്കിത്തരുന്ന സംവിധാനമാണ് ഇന്റർനെറ്റ് സേവനദാതാവ്.  ബി.എസ്.എന്‍.എല്‍ തുടങ്ങിയുള്ള ടെലികോം സേവനദാതാക്കള്‍ക്കൊപ്പം എഷ്യാനെറ്റ് പോലുള്ള കേബിള്‍ ടി.വി ശൃംഖലകളും ഇന്റര്‍നെറ്റ് സേവനദാതാക്കളായി പ്രവര്‍ക്കിക്കുന്നുണ്ട്.  ഈ സേവനദാതാവ് നിങ്ങള്‍ക്കുവേണ്ട ബാന്‍ഡ്‍വിഡത്തിലുള്ള ഡാറ്റ നല്‍കുന്നു. ബാന്‍ഡ്‌വിഡ്ത്ത് എന്നത് വേഗതയെ സൂചിപ്പിക്കുന്നു. 2Mbps or 8 Mbps or 512 Kbps എന്നിങ്ങനെ. 2G, 3G വ്യത്യാസങ്ങള്‍ ഇതില്‍ വരും. ഇതും ഒരു തരം നെറ്റ് വിവേചനമാണ്. ഈ ബാന്‍ഡ്‍വിഡ്ത് / ഡാറ്റ ഉപയോഗത്തിനു ആ സേവനദാതാവിന് ഉപയോക്താവായ നിങ്ങള്‍ പണം നല്‍കുന്നു. ഇങ്ങനെ ലഭിക്കുന്ന ഇന്റര്‍നെറ്റ് ബന്ധം ഉപയോഗിച്ച് നിങ്ങള്‍ വിവിധ വൈബ്സൈറ്റുകള്‍ സന്ദര്‍ശിക്കുകയും വിവിധ ഇന്റര്‍നെറ്റ് സേവനങ്ങള്‍ (വാട്സാപ്പ്, ഫേസ്ബുക്ക്, ജിമെയില്‍, ട്വിറ്റര്‍, യൂട്യൂബ് തുടങ്ങിയവ) ഉപയോഗിക്കുകയും ചെയ്യുന്നു.

സ്മാര്‍ട്ട്ഫോണുകളുടെ ആവിര്‍ഭാവത്തിനു ശേഷം ഫോണുകളില്‍ ഇന്റര്‍നെറ്റ്  വ്യാപകമായി ഉപയോഗിക്കപ്പെട്ടു തുടങ്ങി. ഇന്റര്‍നെറ്റ് അധിഷ്ഠിതമായ അനേകം സേവനങ്ങളും ആപ്ലിക്കേഷനുകളും സ്മാര്‍ട്ട്ഫോണുകളില്‍ ലഭ്യമായി. വാട്സാപ്പ് പോലുള്ള ഗ്രൂപ്പ് സന്ദേശ ആപ്ലിക്കേഷനുകള്‍ ഉപയോഗിച്ച് ഇന്റര്‍നെറ്റിലൂടെ അനേകം പേര്‍ക്ക് ഒരേസമയം സന്ദേശങ്ങള്‍ എളുപ്പത്തില്‍ കൈമാറാന്‍ കഴിയുന്നു. വാട്സാപ്പ്പോലുള്ള സന്ദേശ ആപ്ലിക്കേഷനുകളുടെ വ്യാപകമായ ഉപയോഗം എസ്. എം. എസ്. സന്ദേശങ്ങളുടെ എണ്ണത്തില്‍ വ്യാപകമായ കുറവ് വരുത്തി എന്നാണ് ടെലികോം സേവനദാതാക്കള്‍ പറയുന്നത്.  ഇതിന് പുറമേ, സ്കൈപ്പ്, ഗൂഗിള്‍ ഹാങ്ങൗട്ട്, വാട്സാപ്പ് കോള്‍ തുടങ്ങിയ ഇന്റര്‍നെറ്റ് ഫോണ്‍വിളികളും ജനങ്ങള്‍ വ്യാപകമായി ഉപയോഗിക്കാന്‍ തുടങ്ങി. ഇതോടെ തങ്ങള്‍ക്ക് വമ്പിച്ച നഷ്ടമുണ്ടാകുകയാണെന്നും  കാര്യങ്ങള്‍ കുഴപ്പത്തിലേക്ക് നീങ്ങുകയാണെന്നും ടെലികോം സേവനദാതാക്കള്‍ പരാതിപ്പെട്ടു തുടങ്ങിയത്.

നെറ്റ് ന്യൂട്രാലിറ്റി അഥവാ ഇന്റര്‍നെറ്റ് നിക്ഷ്പക്ഷത

ലോകത്തിലെ എല്ലാ ഉപഭോക്താക്കള്‍ക്കും ഒരേപോലെയാണ് ഇന്റര്‍നെറ്റ് ലഭ്യമായിക്കൊണ്ടിരുന്നത്. അതായത് ഇന്റര്‍നെറ്റില്‍ പൊതുവായി ലഭ്യമായിട്ടുള്ള എല്ലാ വെബ്സൈറ്റുകളും സേവനങ്ങളും ആപ്ലിക്കേഷനുകളും ലോകത്തില്‍ എല്ലാവര്‍ക്കും തുല്യമായാണ് ലഭ്യമായിട്ടുള്ളത്. ഉപഭോക്താക്കള്‍ ഇന്റര്‍നെറ്റിന്റെ ഡാറ്റക്ക് അല്ലെങ്കില്‍ ബാന്റ്‍വിഡ്ത്തിനാണ് പണം നല്‍കുന്നത്. അതുവഴി നടക്കുന്ന എല്ലാതരം ഇന്റര്‍നെറ്റ് ഉപയോഗവും തുല്യമായിട്ടാണ് സേവനദാതാക്കള്‍ കണക്കാക്കുന്നത്. ചില സേവനങ്ങള്‍ മാത്രം സൗജന്യവും ചിലവക്ക് കൂടുതല്‍ പണം ഈടാക്കണം എന്നിങ്ങനെയുള്ള പക്ഷാഭേദം നിലവിലില്ല. ഇതാണ് നെറ്റ് ന്യൂട്രാലിറ്റി അഥവാ ഇന്റര്‍നെറ്റ് നിക്ഷ്പക്ഷത.

ചുരുക്കിപ്പറഞ്ഞാല്‍ ഫേസ്ബുക്കിന് ഇത്രരൂപ, ഗൂഗിളിന് ഇത്രരൂപ, യൂട്യൂബ് വീഡിയോക്ക് ഇത്രരൂപ, വാട്സാപ്പിന് ഇത്രരൂപ എന്നരീതിയിലല്ല ഉപയോക്താവില്‍ നിന്നും സേവന ദാതാവ് പണം ഇടാക്കിയിരുന്നത്. “ഇത്ര സ്പീഡില്‍  ഇത്ര ജിബി ഇന്റര്‍നെറ്റ് ഉപയോഗച്ചതിന് ആകെ ഇത്രരൂപ” എന്ന നിലയിലാണ് സേവനദാതാക്കള്‍ പണം ഈടാക്കിക്കൊണ്ടിരിക്കുന്നത്.

നെറ്റ് വിവേചനം അനുവദിച്ചാല്‍ – കടപ്പാട് http://www.scoopwhoop.com

സ്കൈപ്പ്, വാട്സാപ്പ്, ഹാങ്ങൗട്ട് മുതലായ സംവിധാനങ്ങള്‍ തങ്ങളുടെ വരുമാനത്തില്‍ വലിയതോതിലുള്ള കുറവ് സൃഷ്ടിക്കുന്നു എന്നതാണ് ടെലികോം സേവനദാതാക്കള്‍ വാദിക്കുന്നത്. സ്മാര്‍ട്ട്ഫോണുകളും മൊബൈല്‍ ഇന്റര്‍നെറ്റും വ്യാപകമായതോടെ കൂടുതല്‍ ഉപഭോക്താക്കള്‍ ഇത്തരം സേവനങ്ങള്‍ ഉപയോഗിക്കാന്‍ തുടങ്ങി. ഇതിന് അധിക തുക ഈടാക്കണമെന്നാണ്  ടെലികോം സേവനദാതാക്കള്‍ ആവശ്യപ്പെടുന്നത്. എയര്‍ടെല്‍ റിലയന്‍സ്‌ പോലുള്ള കമ്പനികള്‍ ഇത്തരം പ്രത്യേക നിരക്കുകള്‍ ഏര്‍പ്പെടുത്താനുള്ള നീക്കങ്ങള്‍ ആരംഭിച്ചു കഴിഞ്ഞു.എയര്‍ടെല്‍ സീറോ, ഇന്റര്‍നെറ്റ്.ഓര്‍ഗ്, ഡോകോമോയുടെ ഫ്രീ വാട്സാപ്പ് എന്നിങ്ങനെയുള്ള ചില ആദ്യശ്രമങ്ങള്‍ ടെലികോം കമ്പനികള്‍ തുടങ്ങിക്കഴിഞ്ഞു.  ഇതുകൂടാതെ ഫേസ്ബുക്ക് പ്ലാന്‍, വാട്സാപ്പ് പ്ലാന്‍, സോഷ്യല്‍ മീഡിയ പ്ലാന്‍ തുടങ്ങിയ ഏര്‍പ്പാടുകളും ചില സേവനദാതാക്കള്‍ മുന്നോട്ടുവെയ്കുന്നുണ്ട്. ഇവയെല്ലാം നെറ്റ് നിഷ്പക്ഷത എന്ന സങ്കല്‍പ്പത്തിന് എതിരാണ്. ചില വെബ്സൈറ്റുകളുടെ സന്ദര്‍ശനം സൗജന്യമാണ് മറ്റുള്ളവ അങ്ങനെയല്ല എന്ന വിവേചനമാണ് ഇതിലൂടെ സൃഷ്ടിക്കപ്പെടുന്നത്.

ഇത്തരത്തില്‍ ചില കമ്പനികള്‍ ഒരുക്കുന്ന സൗജന്യ ഇന്റര്‍നെറ്റ് സേവനങ്ങള്‍ തങ്ങളുടെ വരുമാനത്തെ സാരമായി ബാധിക്കുന്നു എന്ന കാരണം പറഞ്ഞ് ടെലികോം കമ്പനികള്‍ ഇപ്പോള്‍ ട്രായിയെ (TRAI) സമീപിച്ചുകഴിഞ്ഞു.  അവരുടെ ലോബിയിങ്ങിനു വഴങ്ങിയ ട്രായ് പുതിയ നിയമം കൊണ്ട് വരാന്‍, പൊതു അഭിപ്രായം സ്വരൂപിക്കാനായി ഒരു വോട്ടെടുപ്പ് തുടങ്ങിയിരിക്കുകയാണ്. 2015 മാര്‍ച്ച്  29 മുതല്‍ ഏപ്രില്‍ 24 വരെയാണ് ഇതിനായി അനുവദിക്കപ്പെട്ടിട്ടുള്ള സമയം.  Consultation Paper on Regulatory Framework for Over-the-top (OTT) services എന്ന പേരിലാണ് ട്രായ് ഇതിനുള്ള ശ്രമം തുടങ്ങിയിട്ടുള്ളത്. പൊതുജനാഭിപ്രായം രൂപീകരിക്കുക എന്ന കടമ്പ ഏതുവിധേനയും കടന്ന് പതുക്കെ ഇന്റര്‍നെറ്റില്‍ പിടിമുറുക്കുന്നതിനുള്ള നിയമം നടപ്പിലാക്കാനാണ് ട്രായ് യുടെ പരിപാടി.

നെറ്റ് ന്യൂട്രാലിറ്റിയെ പിന്തുണച്ചുകൊണ്ട് എയര്‍ടെല്‍ സീറോയെ പുറത്താക്കുന്ന നടപടി പ്രമുഖ ഓണ്‍ലൈന്‍ കച്ചവട പോര്‍ട്ടലായ ഫ്ലിപ്കാര്‍ട്ട് സ്വീകരിക്കുകയുണ്ടായി. അവരുടെ വിശദീകരണക്കുറിപ്പിന്റെ ഭാഗം കടപ്പാട് : http://d152j5tfobgaot.cloudfront.net

അമേരിക്കയില്‍ 90  കളില്‍ നടപ്പാക്കാന്‍ശ്രമിച്ച് പരാജയപ്പെട്ട തന്ത്രമാണ് ഇപ്പോള്‍ ഇന്ത്യയില്‍ നടപ്പിലാക്കാന്‍ ശ്രമിക്കുന്നത്. ഇന്ത്യയിലെ ടെലികോം കോര്‍പ്പറേറ്റ് ഭീമന്‍മാരെ സഹായിക്കുയും വിവിധ ഇന്റര്‍നെറ്റ് സേവനങ്ങള്‍ ഉപയോഗിക്കുന്നതിന്റെ പേരില്‍ ഉപഭോക്താക്കളെ കൊള്ളയടിക്കാന്‍ ശ്രമിക്കുകയുമാണ് നെറ്റ് വിവേചനം നടപ്പിലാക്കുന്നതിന്റെ പിന്നിലുള്ള ഉദ്ദേശം. അമേരിക്കയില്‍ ഈ കരിനിയമം വന്‍ ബഹുജനപ്രക്ഷോഭം ക്ഷണിച്ചുവരുത്തുകയും ഒടുവില്‍ നെറ്റ് നിഷ്പക്ഷത ലംഘിക്കുന്നത് നിയമം മൂലം നിരോധിക്കുകയും ചെയ്തു.

നെറ്റ് ന്യൂട്രാലിറ്റി അവസാനിച്ചാല്‍ സംഭവിക്കുന്നത് ചിത്രീകരിച്ച് ഫേസ്ബുക്കില്‍ പ്രചരിക്കുന്ന പോസ്റ്റ്

ഈ നിയമം നടപ്പിലായാല്‍ ഇന്റര്‍നെറ്റ് ലഭ്യതയുടെ മൊത്തം നിയന്ത്രണം ടെലികോം സേവനദാതാക്കളുടെ കൈകളിലെത്തും. ഏതെല്ലാം സര്‍വ്വീസ് സൗജന്യമായി നല്‍കണം, ഓരോന്നിനും എത്ര എത്രയെല്ലാം പണം ഈടാക്കണം. ഏതെല്ലാം വെബ്‍സൈറ്റുകള്‍ വേഗത്തില്‍ ലഭ്യമാക്കണം എന്നതെല്ലാം ടെലികോം സേവനദാതാക്കള്‍ക്ക് തീരുമാനിക്കാം. വാട്സാപ്പ്, ഫേസ്ബുക്ക്, സ്കൈപ്പ്,ഹാങ്ങൗട്ട് മുതലാവയക്ക് യൂസര്‍ഫീ ഈടാക്കുക, ടെലികോം സേവനദാതാക്കളുമായി കരാറിലേര്‍പ്പെടാത്ത വെബ്സൈറ്റുകള്‍ തടയുക, ടെലികോം സേവനദാതാക്കള്‍ക്കും അവരുടെ താല്പര്യങ്ങള്‍ക്കുമെതിരായി പ്രവര്‍ത്തിക്കുന്ന വെബ്സൈറ്റുകള്‍ തടയുക തുടങ്ങിയ എല്ലാത്തരം നിയന്ത്രണങ്ങളും ഏര്‍പ്പെടുത്താനുള്ള പരിപൂര്‍ണ്ണ അധികാരം ടെലികോം സേവനദാതാക്കള്‍ക്ക് ലഭ്യമാകും.

നിങ്ങള്‍ ഇപ്പോള്‍ നിങ്ങളുടെ ബി.എസ്.എന്‍.എല്‍ ബ്രോഡ്ബാന്റ് അല്ലെങ്കില്‍ മറ്റേതെങ്കിലും ഇന്റ്‍നെറ്റ് സര്‍വ്വീസ്  സേവന ദേതാവിന്റെ നെറ്റ്‌വര്‍ക്ക് പ്രതിമാസമോ, നിശ്ചിത കാലത്തേക്കോ പണം നല്‍കി വാങ്ങി, അതിലൂടെയാണ് ലൂക്കയിലെ ഈ ലേഖനം വായിക്കുന്നത്. എന്നാല്‍ നെറ്റ് വിവേചനം അംഗീകരിക്കപ്പെട്ടുകഴിഞ്ഞാല്‍, നാളെ മുതല്‍,  ഇപ്രകാരം കൊടുക്കേണ്ട സാധാരണ പണത്തിനുപുറമേ ലൂക്കയുടെ വൈബ്സൈറ്റ് ലഭിക്കുന്നതിനായി പ്രത്യേകം പണം അധികമായി നല്‍കേണ്ടി വന്നേക്കാം.

നെറ്റ് വിവേചനം അനുവദിച്ചാല്‍ – കടപ്പാട് http://www.scoopwhoop.com

വായും വെള്ളവും സൗജന്യമായി സര്‍ക്കാര്‍ നല്‍കണം എന്ന സങ്കല്പം പോലെ തന്നെ ഇന്റര്‍നെറ്റും സൗജന്യമായി നല്‍കണം എന്ന ആശയഗതി ലോകത്ത് പ്രചരിക്കപ്പെട്ടുവരുന്ന കാലത്താണ് ഇന്റര്‍നെറ്റ് ഉപയോഗത്തിന് അമിത ചാര്‍ജ്ജ് ഈടാക്കുന്നതിന് പുറമേ, വ്യത്യസ്തമായ സേവനങ്ങള്‍ക്ക് വ്യത്യസ്തമായ നിരക്കില്‍ ചാര്‍ജ്ജ് ഈടാക്കാനുള്ള ശ്രമവും ഇന്ത്യയിലെ കമ്പനികള്‍ ആരംഭിച്ചിരിക്കുന്നത്. സഞ്ചാര സ്വാതന്ത്ര്യം എന്നത് മൗലികാവകാശ മായിരിക്കുമ്പോള്‍ പോലും റോഡിലൂടെ വാഹനമോടിക്കുന്നതിന് കപ്പം കൊടുക്കണമെന്നും അതു തന്നെ ഓരോ വാഹനത്തിനും വ്യത്യസ്ത നിരക്കില്‍ നല്‍കണമെന്നുമുള്ള നിലാടിന് സമമായ നിലപാടാണിത്. ഇന്റര്‍നെറ്റ് ലഭ്യതയിലും ഇത്തരം ചുങ്കം ഏര്‍പ്പെടുത്താനാണ് ഇവര്‍ ഉദ്ദേശിക്കുന്നത്. സഞ്ചാര സ്വാതന്ത്ര്യത്തെ പോലും സംരക്ഷിക്കുന്നതാണ് അഭിപ്രായ സ്വാതന്ത്ര്യം എന്ന മൗലികാവകാശം. അഭിപ്രായ സ്വാതന്ത്ര്യത്തിനൊപ്പം മറ്റനവധി അവകാശങ്ങളും അവസരങ്ങളും ആനുകൂല്യങ്ങളുമാണ് ഇതിലൂടെ ഇവര്‍ കവര്‍ന്നെടുക്കാന്‍ ശ്രമിക്കുന്നത്.

നെറ്റ് ന്യൂട്രാലിറ്റിക്കായി നിങ്ങളും ശബ്ദമുയര്‍ത്തണം

ട്രായ് ഈ നിയമം ഉണ്ടാക്കുന്നതിന്റെ ഭാഗമായി, പൊതുജനാഭിപ്രായം സ്വരൂപിക്കാന്‍ തയ്യാറാക്കിയ രേഖയുടെ 113 മുതല്‍ 116 വരെ പേജുകളില്‍ ഒരു ചോദ്യാവലി നല്‍കി, അതിനുത്തരമായാണ് ജനാഭിപ്രായം തേടിയിരിക്കുന്നത്.  20 ചോദ്യങ്ങള്‍ക്കുള്ള ഉത്തരങ്ങള്‍ advqos@trai.gov.in എന്ന ഇമെയില്‍ വിലാസത്തിലേക്ക് ഏപ്രില്‍ 24ന് മുന്‍പ് അയച്ചു കൊടുക്കണം. ഇത് അത്ര എളുപ്പമുള്ള കാര്യം അല്ല. ഇംഗ്ലീഷിലും ഹിന്ദിയിലുമല്ലാതെ പ്രാദേശിക ഭാഷയില്‍ ലഭ്യമല്ലാത്ത ഈ ചോദ്യങ്ങളുടെ ഉത്തരം അത്രയും കഷ്ടപെട്ടു കണ്ടെത്തി ഇതില്‍ പങ്കെടുക്കുവാന്‍ ആരം മെനക്കെടില്ലല്ലോ.  അത് തന്നെയാണ് അവരുടെയും ഉദ്ദേശം.

അതുകൊണ്ട് എളുപ്പത്തില്‍ ഉത്തരം തയ്യാറാക്കാനും ട്രായ്ക്ക് അയക്കാനും പറ്റുന്ന തരത്തില്‍ ഒരു വെബ്സൈറ്റ്  http://savetheinternet.in നെറ്റ് ന്യൂട്രാലിറ്റിക്കായി നിലകൊള്ളുന്ന പ്രവര്‍ത്തകര്‍ തയ്യറാക്കിയിട്ടുണ്ട്. ഈ വെബ്സൈറ്റ് സന്ദര്‍ശിച്ച് എളുപ്പത്തില്‍ ഉത്തരങ്ങള്‍ അയക്കാം.  നെറ്റ് നിഷ്പക്ഷത സംബന്ധിച്ച് അവരുടെ നിലപാടുകള്‍ വിശദീകരിച്ചുകൊണ്ടുള്ള ഉത്തരങ്ങള്‍ ആ സൈറ്റില്‍ നല്‍കിയിട്ടുണ്ട്. നിങ്ങള്‍ അതിനോട് യോജിക്കുന്നുവെങ്കില്‍ അത് തന്നെ ട്രായിക്ക് ഇ-മെയിലായി അയച്ചു നല്‍കാനുള്ള ഏര്‍പ്പാടും ആ സൈറ്റിലുണ്ട്. കൂടാതെ  #NetNeutrality  എന്നോ #IndiaWantsNetNeutrality  എന്നോ #SavetheInternet എന്നോ ഉള്ള ഹാഷ്ടാഗോടെ ആ വൈബ്സൈറ്റിന്റെ കണ്ണിയോ, ഈ ലേഖനത്തിന്റെ കണ്ണിയോ സ്വന്തമായൊരു പോസ്റ്റോ നിങ്ങളുടെ ട്വിറ്ററിലോ ഫെയ്‌സ്ബുക്കിലോ ഷെയര്‍ ചെയ്യുകയുമാകാം. നമ്മുടെ, ഇന്റര്‍നെറ്റ് സ്വതന്ത്രമായി തന്നെ നിലനിര്‍ത്തുന്നതിനായി പോരാട്ടത്തിനൊരുങ്ങുക. പരമാവധി പേരിലേക്ക് ഈ സന്ദേശം എത്തിക്കുക.

കൂടുതല്‍ വായനയ്ക് :

• http://www.trai.gov.in/WriteReaddata/ConsultationPaper/Document/OTT-CP-27032015.pdf
• http://blog.smc.org.in/net-neutrality/

നെറ്റ് ന്യൂട്രാലിറ്റിയെകുറിച്ച് ഒരു വീഡിയോ :

Use Facebook to Comment on this Post

About The Author

എന്‍. സാനു

ഇല്ലാത്ത വാഗ്ദാനങ്ങള്‍ നല്‍കി ഒരാളെ പറ്റിക്കുന്നത് നിയമ വിരുദ്ധമാണെങ്കില്‍ അക്ഷയ തൃതീയയുമായി ബന്ധപ്പെട്ട സ്വര്‍ണക്കച്ചവടം ശിക്ഷാര്‍ഹമാണ്. കേരള സര്‍ക്കാര്‍ പാസ്സാക്കാമെന്ന് വാഗ്ദാനം നല്‍കിയിരിക്കുന്ന അന്ധവിശ്വാസ നിരോധന നിയമത്തിന്റെ പരിധിയില്‍ ഈ തട്ടിപ്പിന്റെ പരസ്യങ്ങളും ഉള്‍പ്പെടുത്തേണ്ടതുണ്ട്.

അക്ഷയതൃതീയയിലേക്ക് ആളുകളെ ആകര്‍ഷിച്ചുകൊണ്ട് പ്രമുഖ പത്രങ്ങളില്‍ നല്‍കിയ പരസ്യം

ഇല്ലാത്ത വാഗ്ദാനങ്ങള്‍ നല്‍കി ഒരാളെ പറ്റിക്കുന്നത് നിയമ വിരുദ്ധമാണെങ്കില്‍ അക്ഷയ തൃതീയയുമായി ബന്ധപ്പെട്ട സ്വര്‍ണക്കച്ചവടം ശിക്ഷാര്‍ഹമാണ്. വിശ്വാസപരമായോ അല്ലാതെയോ നിലവിലില്ലാത്ത ഒരു കഥ പടച്ചുണ്ടാക്കി ഉപഭോക്താവിനെ ചൂഷണം ചെയ്യുന്ന ഒരു ഹീനപ്രവൃത്തിയാണത്. അക്ഷയ തൃതീയ ദിനത്തില്‍ സ്വര്‍ണം വാങ്ങിയാല്‍ അത് പൊലിയ്ക്കുമെന്നും (പലമടങ്ങ് വര്‍ദ്ധിക്കും) ഐശ്വര്യം കൈവരുമെന്നും അവകാശപ്പെട്ടാണ് സ്വര്‍ണക്കച്ചവടക്കാര്‍ ഈ ദിവസത്തെ ഒരു സ്വര്‍ണം വാങ്ങല്‍ ദിനമാക്കി മാറ്റിയത്. അവധി ദിവസത്തിനു മുമ്പ് ബിവറേജസ് കോര്‍പ്പറേഷന്റെ മദ്യഷോപ്പിനു മുന്നില്‍ കാണുന്ന അതേ ക്യൂ ആഭരണ ശാലകള്‍ക്ക് മുന്നിലും കാണുന്ന അപൂര്‍വ്വ സുന്ദര ദിവസം. അന്നേ ദിവസം സ്വര്‍ണ്ണം വാങ്ങാന്‍ പുലര്‍ച്ചെ തുടങ്ങുന്ന കാത്തിരിപ്പ് പാതിരാവരെ നീളും. ഒരു തരി പൊന്നെങ്കിലും സ്വന്തമാക്കിയവര്‍ സന്തോഷത്തോടെ വീട്ടിലേക്ക് മടങ്ങും. ഒരു വര്‍ഷത്തെ മുവുവന്‍ ഐശ്വര്യം പേഴ്സിലാക്കിയ സന്തോഷവുമായി. എന്നാല്‍ ഇപ്രകാരമുള്ള ഒരു വിശ്വാസമോ ആചാരമോ നിലവിലില്ലായിരുന്നു എന്നതാണ് വാസ്തവം. എന്നിട്ടും ഇന്ന് നാട്ടിലുള്ള സാധാരണക്കാരോട് അക്ഷയ തൃതീയ എന്താണെന്നു ചോദിച്ചാല്‍ സ്വര്‍ണം വാങ്ങാനുള്ള ദിവസം എന്നായിരിക്കും ഉത്തരം തരിക. അത്രമാത്രം പ്രചരണം ഈ ദിവസത്തിനുണ്ടാക്കാന്‍ കച്ചവടക്കാര്‍ക്ക് സാധിച്ചു.

“Hindu calendar 1871-72″ via Wikimedia Commons.

മകരസംക്രമം, കുംഭ ഭരണി, വൃശ്ചിക മാസത്തിലെ കാര്‍ത്തിക (തൃക്കാര്‍ത്തിക) എന്നിങ്ങനെ ചില പ്രത്യേക ദിവസങ്ങള്‍ ഉത്സവമായി കേരളീയര്‍ ആഘോഷിക്കുന്ന പോലെ ഉത്തരേന്ത്യയിലെ ഹിന്ദുക്കളും ജൈന മതവിശ്വാസികളും ആഘോഷിച്ചുവരുന്ന ഒരു വിശേഷ ദിവസമാണ് അക്ഷയതൃതീയ. അന്നേദിവസം അവര്‍ ദാനധര്‍മ്മങ്ങള്‍ നടത്തുന്നു. ചിലയിടങ്ങളില്‍ ശൈശവ വിവാഹം പോലെയുള്ള അനാചാരങ്ങളും നടക്കുന്നു. ഒരു 10 കൊല്ലം മുമ്പ് ഇപ്പറഞ്ഞ ദിവസത്തെപ്പറ്റി മലയാളികള്‍ക്ക് അറിവുണ്ടായിരുന്നില്ല. ശകവര്‍ഷത്തിലെ രണ്ടാം മാസമായ വൈശാഖത്തിലെ കറുത്തവാവിനുശേഷം വരുന്ന മൂന്നാം ദിവസമാണ് അക്ഷയ തൃതീയ. ഒരു വാവ് കഴി‍ഞ്ഞാല്‍ തൊട്ടടുത്ത ദിവസം പ്രഥമ, രണ്ടാം ദിവസം ദ്വിതീയ, മൂന്നാം ദിവസം തൃതീയ, നാലാം ദിവസം ചതുര്‍ത്ഥി എന്നിങ്ങനെ പതിനാലാം ദിവസമായ ചതുര്‍ദശി വരെ ദിവസങ്ങള്‍ എണ്ണുന്നതിനെയാണ് തിഥികള്‍ എന്നുപറയുന്നത്. തിങ്കള്‍, ചൊവ്വ എന്ന് പേരിട്ട് വിളിക്കുന്നതിനോ, മാസത്തിലെ ഓന്നാം തീയതി, രണ്ടാം തീയതി എന്ന് നമ്പരിട്ട് വിളിക്കുന്നതിനോ മുമ്പ് ഒരു പ്രകൃതി പ്രതിഭാസത്തെ അടിസ്ഥാനമാക്കി ദിവസങ്ങള്‍ക്ക് പേരുകൊടുത്തിരുന്ന ഒരു സമ്പ്രദായമാണിത്. ആധുനിക കാലത്തെ കലണ്ടറിലും ഈ തിഥികള്‍ ഇടംപിടിച്ചിട്ടുണ്ട്. ഒരു വാവ് കഴിഞ്ഞ് അടുത്ത പതിനഞ്ചാം ദിവസം അടുത്ത വാവാണ്. പിന്നെ വീണ്ടും പ്രഥമ, ദ്വിതീയ, തൃതീയ എന്ന് എണ്ണിത്തുടങ്ങും. കറുത്തവാവ് മുതല്‍ വെളുത്തവാവ് വരെയുള്ള തിഥികള്‍ ചേര്‍ന്ന് വെളുത്ത പക്കവും (ശുക്ല പക്ഷം) വെളുത്ത വാവ് മുതല്‍ കറുത്തവാവ് വരെയുള്ള തിഥികള്‍ ചേര്‍ന്ന് കറുത്ത പക്കവും (കൃഷ്ണ പക്ഷം) ഉണ്ടാകുന്നു. ഇങ്ങനെ രണ്ട് പക്കങ്ങള്‍ ചേര്‍ന്നതാണ് ഒരു ചാന്ദ്രമാസം. വൈശാഖത്തിലെ ശുക്ലപക്ഷം മൂന്നാം തിഥിയാണ് അക്ഷയതൃതീയ. ഇതൊന്നും സാധാരണ മലയാളികള്‍ക്ക് അറിയില്ല. അവരുടെ അറിവ് വച്ച് സ്വര്‍ണം വാങ്ങാനുള്ള ഏറ്റവും നല്ല ദിവസമാണ് ഇന്ന് അക്ഷയതൃതീയ.

അക്ഷയ എന്ന പദത്തിന് ക്ഷയിക്കാത്തത് (നശിക്കാത്തത്) എന്നാണ് അര്‍ത്ഥം. വിഷ്ണുധർമസൂത്രത്തിലാണ് അക്ഷയതൃതീയയെക്കുറിച്ചുള്ള ആദ്യത്തെ പരാമർശം കാണുന്നത്. അന്ന് ഉപവസിക്കുകയും വിഷ്ണുവിന് അന്നം നിവേദിക്കുകയും പിന്നീട് അതുകൊണ്ട് അഗ്നിയെ പ്രീതിപ്പെടുത്തിയശേഷം ദാനം ചെയ്യുകയും വേണമെന്ന് അതിൽ പ്രസ്താവിച്ചിട്ടുണ്ട്. സർവപാപമോചനമാണു ഫലം. അന്നേ ദിവസം നേടുന്ന പുണ്യം അക്ഷയമായിരിക്കും. മത്സ്യപുരാണത്തിലും (അധ്യാ. 65) നാരദീയപുരാണത്തിലും (അധ്യാ. 1) അക്ഷയതൃതീയയെപ്പറ്റി പ്രസ്താവിച്ചിട്ടുണ്ട്. ഭവിഷ്യോത്തരത്തിലും (അധ്യാ. 30: 2-3) അന്നു ചെയ്യപ്പെടുന്ന സ്നാനം, ദാനം, ജപം, ഹോമം, സ്വാധ്യായം, പിതൃതർപ്പണം എന്നീ കർമങ്ങൾ അക്ഷയഫലപ്രദമാണെന്നു പറഞ്ഞിരിക്കുന്നു. അതായത് അക്ഷയതൃതീയ ദിവസം ദാനധര്‍മ്മങ്ങള്‍ക്കുള്ള ദിവസമാണ്. അല്ലാതെ സ്വര്‍ണമോ മറ്റേതെങ്കിലും തരത്തിലോ ഉള്ള സ്വത്ത് സമ്പാദിക്കുന്നതിനുള്ള ദിവസമല്ല. വിശ്വാസ പ്രകാരം അന്ന് നടത്തുന്ന ദാനംമൂലം ഉളവാകുന്ന പുണ്യമാണ് അക്ഷയമായുള്ളത്, അല്ലാതെ അന്ന് വാങ്ങുന്ന സ്വര്‍ണമോ രത്നമോ ഒന്നുമല്ല. എന്നിട്ടും നമ്മുടെ നാട്ടില്‍ ഇങ്ങനെ ഒരു വിശ്വാസം കടന്നു വന്നതെങ്ങനെയാണ് ?

ഉത്തരേന്ത്യയില്‍ ശൈശവ വിവാഹം നടക്കുന്ന ദിവസമാണല്ലോ അക്ഷയ തൃതീയ. സ്വാഭാവികമായും ആ ദിവസങ്ങളില്‍ വലിയ സ്വര്‍ണക്കച്ചവടവും നടന്നിരുന്നു. വിശ്വാസങ്ങളെ മുന്നോട്ട് കൊണ്ടുപോകുന്നത് കച്ചവടമാണല്ലോ. എന്നാല്‍ ശൈശവ വിവാഹം നിരോധിച്ചതോടെ ആ ദിവസങ്ങളില്‍ നടന്നുവന്ന സ്വര്‍ണക്കച്ചവടത്തിലും ഇടിവു വന്നു. ഇതു മറികടക്കാനായി ചില ഉത്തരേന്ത്യന്‍ സ്വര്‍ണ വ്യാപാരികള്‍ വ്യാപക പരസ്യം നല്‍കി. അക്ഷയതൃതീയയ്ക്ക് പുണ്യം പൊലിക്കും എന്ന വിശ്വാസത്തെ സ്വര്‍ണം പൊലിക്കും എന്നാക്കി തിരുത്തി.

കടപ്പാട് : http://standardissuemagazine.com

കേരളത്തിലെ ഒരു സ്വര്‍ണവ്യാപാരി കുറച്ച് വര്‍ഷങ്ങള്‍ക്കുമുമ്പ് ഈ വിദ്യ ഇവിടെയും പരീക്ഷിച്ചു. സ്വര്‍ണ വ്യാപാരം വര്‍ദ്ധിപ്പിക്കുന്നതിനുള്ള പല ആലോചനകള്‍ നടത്തിയതിന്റെ ഭാഗമായി അയാള്‍ ഒരു പരസ്യം നല്‍കി. അക്ഷയ തൃതീയ ദിനത്തില്‍ സ്വര്‍ണം വാങ്ങുന്നത് ഐശ്വര്യം വര്‍ദ്ധിപ്പിക്കും എന്നായിരുന്നു അത്. (കിട്ടിയാല്‍ ഊട്ടി, ഇല്ലങ്കില്‍ ചട്ടി എന്ന നിലയില്‍ പരസ്യം നല്‍കിയ ഇദ്ദേഹം ഹിന്ദുപോലും ആയിരുന്നില്ല.) ആ വര്‍ഷം പക്ഷേ അത് വലിയ ഫലം കണ്ടില്ല. തൊട്ടടുത്ത വര്‍ഷം ഈ മേഖലയിലെ ചില വന്‍കിടക്കാര്‍ കൂടി ഇത് ഏറ്റുപിടിക്കുകയും പത്രങ്ങളിലൂടെയും ടെലിവിഷനിലൂടെയും വ്യാപക പ്രചരണം നല്‍കുകും ചെയ്തു. അപ്രാവശ്യം എന്തായാലും സംഭവം ഏശി. വലംപിരി ശംഖിന്റെയും മദനകാമാക്ഷി യന്ത്രത്തിന്റെയും പിന്നാലെ ഓടുന്ന മലയാളി സ്വര്‍ണക്കടകളില്‍ കൂട്ടമായെത്തി സ്വര്‍ണം വാങ്ങി. തുടര്‍ന്നുള്ള വര്‍ഷങ്ങളില്‍ സ്വര്‍ണക്കടക്കാരെപോലും അമ്പരപ്പിക്കുന്ന വിധത്തിലായിരുന്ന കച്ചവടം. കഴി‍‍ഞ്ഞ വര്‍ഷം മാത്രം 500 കോടി രൂപയുടെ സ്വര്‍ണക്കച്ചവടം നടന്നതായാണ് കണക്ക്. ഇനി “ശരിക്കും ബിരിയാണി കിട്ടുന്നുണ്ടോ” എന്ന് വ്യാപാരികള്‍ക്ക് പോലും സംശയം തോന്നിയെന്നതാണ് സത്യം. പണയം വച്ചും കടം വാങ്ങിയും മലയാളി സ്വര്‍ണം വാങ്ങാന്‍ മത്സരിച്ചു. ചിലര്‍ ആഭരണശാലകളില്‍ പുരോഹിതന്മാരെ വരെ ഇരുത്തി കച്ചവടം പൊലിപ്പിച്ചു. അഡ്വാന്‍സ് ബുക്കിംഗും ആരംഭിച്ചു.. പോരേ. അക്ഷയതൃതീയ ദിവസത്തെ മുന്നോട്ടും പിന്നോട്ടും നീട്ടാന്‍ ഇതിലൂടെ കഴിഞ്ഞു. അക്ഷയതൃതീയ ആദ്യദിവസം രണ്ടാംദിവസം, അക്ഷയതൃതീയ മൂന്നാം ദിവസം എന്നിങ്ങനെ. തൃതീയയുടെ അടുത്ത ദിവസം ചതുര്‍ത്ഥിയാണ്. ഹിന്ദു വിശ്വാസപ്രകാരം ചതുര്‍ത്ഥി മോശം ദിവസവും. എന്നിട്ടും അക്ഷയതൃതീയയുടെ അടുത്ത ദിവസമായ ചതുര്‍ത്ഥിക്ക് സ്വര്‍ണം വാങ്ങി സായൂജ്യമടയുന്ന വിശ്വാസികളെയും നമ്മള്‍ കണ്ടു.

സ്വര്‍ണം വാങ്ങല്‍ ഒരു സമ്പാദ്യമല്ലേ എന്ന് വാദിക്കാം. പക്ഷേ വാങ്ങുന്നവന്റെ കീശ കൊള്ളയടിക്കുന്ന ഇത്രയും വലിയ ഒരേര്‍പ്പാട് വേറെയില്ല. ഒരു പവന്‍ സ്വര്‍ണത്തിന്റെ വില 20,000 രൂപയാണെങ്കില്‍ അത്രയും സ്വര്‍ണത്തിന്റെ ആഭരണം വാങ്ങുമ്പോള്‍ 25000 രൂപയെങ്കിലും മുടക്കണം. പണിക്കൂലി, പണിക്കുറവ്, ടാക്സ് എന്നിങ്ങനെ സാധാരണക്കാരന് മനസ്സിലാകാത്ത ചില പേരുകളില്‍ പോലും വ്യാപാരി പണം വസൂലാക്കും. മറ്റൊരു സംഗതി മുന്തിയ സ്വര്‍ണക്കടക്കാര്‍ നല്‍കുന്ന സ്വര്‍ണം പോലും ഗുണനിലവാരമില്ലാത്തതാണ് എന്നുള്ളതാണ്. ഇത്തരത്തിലും നല്ല ഒരു തുക വാങ്ങുന്നവന് നഷ്ടമാകും. ഇനി ഈ 25000 രൂപ മുടക്കിയ സ്വര്‍ണം വില്ക്കുകയാണെങ്കില്‍ സ്വര്‍ണവിലയായ 20000 രൂപയില്‍ നിന്നും പണിക്കൂലി, പണിക്കുറവ്, മാറ്റ് കുറവ് എന്നൊക്കെ പറഞ്ഞ് നല്ലൊരു തുക കുറവ് വരുത്തും. ഇത് ശരാശരി 3000 രൂപ വരും. സ്വര്‍ണത്തിന്  നിലവാരമില്ലങ്കില്‍ ഈ കിഴിയ്കല്‍ 5000 രൂപയും ആകും. അതായത് 25000 രൂപ മുടക്കി വാങ്ങിയ സ്വര്‍ണം വില്‍ക്കുമ്പോള്‍ കിട്ടുന്നത് 15000 രൂപ. നഷ്ടം 40 ശതമാനം വരെ. (മുന്തിയ പല സ്വര്‍ണ മുതലാളിമാരും തങ്ങള്‍ വിറ്റ ആഭരണം പോലും നിലവിലെ വിലയ്ക്ക് തിരിച്ചെടുക്കാറില്ല.) സ്വര്‍ണഭ്രമത്തില്‍ അഭിരമിക്കുന്ന മലയാളി പക്ഷേ ഇതൊന്നും ആലോചിക്കാറില്ല. വിവാഹത്തിനും മറ്റും ലക്ഷങ്ങള്‍ മുടക്കി സ്വര്‍ണം വാങ്ങുന്ന മലയാളിയെ ഇപ്രകരം ഊറ്റിപ്പിഴിഞ്ഞെടുക്കുന്ന കാശുകൊണ്ടാണ് വ്യാപാരികള്‍ നാള്‍ക്കുനാള്‍ മുപ്പതും നാല്പതുമൊക്കെ ഷോറൂമുകള്‍ പണിതുകൊണ്ടിരിക്കുന്നത്. അവിടെ തൊഴിലെടുക്കുന്ന സ്ത്രീകള്‍ക്കോ, തുച്ഛശമ്പളത്തിനുപുറമെ മൂത്രമൊഴിക്കാന്‍ പോലും സമരം ചെയ്യേണ്ടി വരുന്ന അവസ്ഥയും. സ്വര്‍ണം ഒരു സമ്പാദ്യമാണെന്ന വാദം അംഗീകരിച്ചാല്‍ തന്നെയും ഈ വര്‍ഷം അക്ഷയതൃതീയയക്ക് സ്വര്‍ണം വാങ്ങരുതെന്ന് വിദഗ്ധര്‍ ചൂണ്ടിക്കാട്ടുന്നു. കഴിഞ്ഞവര്‍ഷത്തെ സ്വര്‍ണ വിലയിടിവ് 15% ആണ്. അപ്പോള്‍ വാങ്ങിയവര്‍ക്ക് അത്രയുംകൂടി പണം നഷ്ടമായെന്നര്‍ത്ഥം. ആഗോള സാമ്പത്തിക ചിത്രം അവലോകനം ചെയ്താല്‍ സ്വര്‍ണവില ഇനിയും ഇടിയും എന്നതാണ് ഈ വര്‍ഷം സ്വര്‍ണത്തില്‍ നിക്ഷേപിക്കരുതെന്ന് ഈ രംഗത്തെ വിദഗ്ധര്‍ പറയാന്‍ കാരണം.

ശാസ്ത്രസാങ്കേതിക വിദ്യകളുടെ വളര്‍ച്ചയ്ക്കൊപ്പം അന്ധവിശ്വാസങ്ങളും തട്ടിപ്പുകളും പുതുരൂപത്തില്‍ പ്രചരിപ്പിക്കുന്നതിന്റെ മറ്റൊരുദാഹരണമാണ് അക്ഷയ തൃതീയ എന്ന് ചുരുക്കിപ്പറയാം. ശരിയായ ശാസ്ത്രബോധം ഉണ്ടാവുക മാത്രമാണ് ഏക പരിഹാരം. അങ്ങിനെ വന്നാല്‍ മാത്രമേ കഴി‍ഞ്ഞവര്‍ഷം അക്ഷയ തൃതീയക്ക് സ്വര്‍ണം വാങ്ങിയ എത്രപേര്‍ക്ക് ഐശ്വര്യം വന്നൂ എന്ന് ചിന്തിക്കുകയുള്ളു. അങ്ങനെ പരിശോധിക്കുമ്പോള്‍ മാത്രമാണ് ഐശ്വര്യം വന്നത് സ്വര്‍ണക്കടക്കാര്‍ക്ക് മാത്രമാണെന്ന ബോധ്യം വരുന്നത്. അപ്പോഴാണ് ആ തട്ടിപ്പുകളുടെ പിന്നില്‍ സ്വര്‍ണക്കടക്കാരും, അവരുടെ പരസ്യം വരുമാനനമാര്‍ഗമാക്കിയ മാധ്യമങ്ങളുമാണെന്ന് തിരിച്ചറിയുക. അത്തരം ഒരു തിരിച്ചറിവ് എന്നാണാവോ മലയാളിയ്ക്കുണ്ടാവുക.

• http://www.safalniveshak.com/7-reasons-to-not-buy-gold-this-akshaya-tritiya/
• http://profit.ndtv.com/news/your-money/article-akshaya-tritiya-why-buying-gold-is-bad-for-the-indian-economy-322139
• http://en.wikipedia.org
• http://ml.wikipedia.org
• http://www.mediaonetv.in/news
• http://profit.ndtv.com/news/
• http://workersforum.blogspot.in/voices/breaking-cycle-child-marriage/

Use Facebook to Comment on this Post

About The Author

ഡോ. സജികുമാര്‍
drsaji@gmail.com

ഡോ. മനോജ് കോമത്ത്

ചുരുക്കത്തില്‍ ഇവിടുത്തെ ചികിത്സാരംഗത്ത് ശാസ്ത്രീയമേത് കപടമേത് എന്ന് തിരിച്ചറിയാനാകാത്ത ദുഖകരമായ സ്ഥിതിവിശേഷമാണ് നിലനില്‍ക്കുന്നത്. ഫലപ്രദവും സുരക്ഷിതവുമായ ചികിത്സ ലഭിക്കേണ്ടത് ഓരോ പൌരന്റേയും അവകാശമാണന്നിരിക്കെ ഇതിന്റെ കതിരും പതിരും തിരിച്ചറിയാനുള്ള ഒരു ശ്രമവും സര്‍ക്കാരിന്റെ ഭാഗത്തുനിന്നും ഉണ്ടാകുന്നില്ല. വിവിധ ചികിത്സാസമ്പ്രദായങ്ങളുടെ വിശ്വാസ്യതയെപറ്റി തുറന്ന ചര്‍ച്ചകളോ പഠനങ്ങളോ നടക്കുന്നത് അപൂര്‍വമാണുതാനും ഈ ദിശയിലെക്കുള്ള പ്രശംസനീയമായ ഒരു ചുവടുവെപ്പാണ്  “ചികിത്സയുടെ പ്രകൃതി പാഠങ്ങള്‍” എന്ന പുസ്തകം. ശാസ്ത്രസാഹിത്യ രംഗത്തെ സുപരിചിതനും തിരുവനന്തപുരത്തെ ശ്രീ ചിത്ര ഇന്‍സ്റ്റിറ്റൂട്ടില്‍ ശാസ്ത്രജ്ജനുമായ ഡോ. മനോജ്‌ കോമത്ത് ആണ് ഇതിന്റെ രചയിതാവ്. പുസ്തകത്തിന്റെ സബ്ടൈറ്റില്‍ സൂചിപ്പിക്കുന്നതു പോലെ പ്രകൃതിചികില്‍സയുടെ വിമര്‍ശനപഠനമാണ് “ചികിത്സയുടെ പ്രകൃതി പാഠങ്ങള്‍”.  ആരോഗ്യ സംരക്ഷണമാര്‍ഗമെന്നനിലയില്‍ സമൂഹത്തിന്റെ ആദരവ് നേടിയിട്ടുള്ള ഒന്നാണ് പ്രകൃതിചികിത്സ അഥവാ നാച്ചുറോപതി. പ്രകൃതിതത്വങ്ങളെ അവലംബിച്ചുള്ള സ്വാഭാവികമായ ചികില്‍സാമാര്‍ഗമെന്ന പ്രയോക്താക്കളുടെ അവകാശവാദത്തെ ഈ കൃതിയില്‍ സൂക്ഷ്മമായി വിലയിരുത്തുന്നു. 175 പേജുകളില്‍ 21 അദ്ധ്യായങ്ങള്‍ ഉള്ള ഈ പുസ്തകത്തെ മൂന്ന് ഭാഗങ്ങളായി തിരിച്ചിട്ടുണ്ട്.

പുസ്തകത്തിന്റെ ആദ്യഭാഗത്ത് ചികിത്സയുടെ ചരിത്രകഥനമാണ്.  ചികിത്സയുടെ ചരിത്രം സംക്ഷിപ്തമായും  പ്രകൃതിചികിത്സയുടെ വികാസം വിശദമായും വിവരിക്കുന്നു. പത്തൊന്‍പതാം നൂറ്റാണ്ടിന്റെ തുടക്കത്തില്‍ അമേരിക്കയിലും യുറോപ്പിലും അന്നത്തെ വ്യവസായവല്‍ക്കരണം സമൂഹത്തില്‍ വരുത്തിത്തീര്‍ത്ത ആരോഗ്യപ്രശ്നങ്ങളെ അനുഭവസിദ്ധമായി പരിഹരിക്കാന്‍ ശ്രമിച്ച ചികിത്സകര്‍ ഉണ്ടായിരുന്നു. ആരോഗ്യരക്ഷയില്‍ ശുചിത്വത്തിനും പോഷകാഹാരത്തിനും വ്യായാമത്തിനും ഉള്ള പങ്ക് അവര്‍ കണ്ടെത്തുകയും സമൂഹത്തിനു ഗുണകരമായ നിര്‍ദേശങ്ങള്‍ നല്കുകയും ചെയ്തു. പിന്നീടു ആരോഗ്യവിജ്ഞാനീയം (medical science) ഇതേപ്പറ്റിയുള്ള ശാസ്ത്രീയ അറിവുകള്‍ വികസിപ്പിച്ചപ്പോഴും അവരുടെ അനുയായികള്‍ പഴയ തത്വങ്ങള്‍ മുറുകിപ്പിടിക്കുകയും സകല രോഗങ്ങളും അകറ്റാന്‍ ആ രീതികള്‍ മതിയാകുമെന്ന തീവ്രനിലപാടിലേയ്ക്ക് മാറുകയും ചെയ്തു. ഈയൊരു ‘കള്‍ട്ട്’ രൂപീകരണമാണ്  ‘നാച്ചുറോപതി’ സമ്പ്രദായത്തിലെയ്ക്ക് നയിച്ചത് എന്ന കൗതുകകരമായ തിരിച്ചറിവ് ഈ പുസ്തകം നമുക്ക് തരുന്നു.  ഇരുപതാം നൂറ്റാണ്ടിന്റെ ആദ്യപകുതിയിലാണ് പ്രകൃതിചികിത്സ ഒരു വ്യതിരിക്തചികിത്സ ആകുന്നതെന്ന അറിവ് ഈ പുസ്തകത്തില്‍ നിന്നും നമുക്കു കിട്ടുന്നു. ആധുനികവൈദ്യശാസ്ത്രത്തിന്റെ ആവിര്‍ഭാവത്തോടുകൂടി രണ്ടാം ലോകമഹായുദ്ധത്തിനു മുന്‍പ് തന്നെ, പാശ്ചാത്യലോകത്ത് ‘നാച്ചുറോപതി’ പ്രചാരലുപ്തമായിപ്പോയെന്നും മനസ്സിലാകാം.  ഈ കള്‍ട്ട് ചികിത്സാരീതി എങ്ങിനെ ഭാരതത്തിലെത്തി ഇവിടുത്തെ തദ്ദേശീയ സമ്പ്രദായത്തിന്റെ പദവി നേടി എന്ന ചരിത്രം കൂടി ഗ്രന്ഥകര്‍ത്താവ്‌ പറഞ്ഞു തരുന്നു.

രണ്ടാംഭാഗത്ത് പ്രകൃതിചികിത്സയുടെ തത്വങ്ങളും പ്രയോഗങ്ങളും ശാസ്ത്രീയവിശകലനത്തിനു വിധേയമാക്കപ്പെടുന്നു. പ്രകൃതിചികിത്സയുടെ അടിസ്ഥാനമായി കണക്കാക്കപ്പെടുന്ന പ്രാണശക്തി (vital force) വിഷസങ്കലനം (Toxemia) മുതലായവ കാലഹരണപ്പെട്ടതാണന്നു ഡോ മനോജ്‌ കോമത്ത് യുക്തിയുക്തം സമര്‍ത്ഥിക്കുന്നു. അതോടൊപ്പം അവരുടെ രീതികള്‍ (ഉപവാസം, ജലചികില്‍സ, മണ്ണുചികിത്സ എന്നിങ്ങനെ) തികച്ചും അശാസ്ത്രീയമാണന്നു ആധുനികപഠനങ്ങള്‍ ഉദ്ധരിച്ചു സ്ഥാപിക്കുകയും ചെയ്യുന്നു. പ്രകൃതിചികിത്സയുടെ യുക്തിഹീനതകളെ ചിലയിടങ്ങളില്‍ കണക്കിനു പരിഹസിക്കുന്നുമുണ്ട്. ജനങ്ങളെ സംബന്ധിച്ചിടത്തോളം പ്രകൃതിചികിത്സ ചിലപ്പോഴെങ്കിലും ഫലിക്കുന്നതായി തോന്നുന്നത് എന്തുകൊണ്ട് എന്നതിനുള്ള വിശദീകരണം കൂടി അദ്ദേഹം നല്‍കുന്നുണ്ട്.

മൂന്നാംഭാഗത്ത് പ്രകൃതിചികിത്സയുടെ പേരില്‍ നടക്കുന്ന കാപട്യങ്ങളെ തുറന്നുകാട്ടാനുള്ള ധീരമായ ശ്രമമാണ് ഡോ. മനോജ്‌ കോമത്ത് നടത്തുന്നത്. പ്രതിരോധ കുത്തിവയ്പ്പുകളെക്കുറിച്ചും ആധുനികമരുന്നുകളെക്കുറിച്ചും ഭക്ഷണത്തെക്കുറിച്ചും പ്രകൃതിവക്താക്കള്‍ നടത്തുന്ന പ്രചാര വേലകള്‍ വാസ്തവവിരുദ്ധമാണന്നു ഗ്രന്ഥകര്‍ത്താവ്‌ ആധികാരികമായി ചൂണ്ടിക്കാണിക്കുന്നു.  ഇത്തരം കുപ്രചാരണങ്ങള്‍ ആരോഗ്യരംഗത്ത് എത്രമാത്രം ഭീകരഫലമുളവാക്കുമെന്നതിനു ഉദാഹരണങ്ങളും നല്‍കുന്നു.   മഹാത്മജിയും മറ്റു പ്രമുഖരും പിന്തുടര്‍ന്ന സംമ്പ്രദായമെന്ന നിലയില്‍ ഭാരതീയ മണ്ണില്‍ നേടിയ ആദരണീയയത  മുതലെടുത്തു കേരളത്തില്‍ ഇതൊരു നെറികെട്ട ചികിത്സാ ബിസ്സിനെസ്സ് ആയി മാറിയെന്ന ഞെട്ടിപ്പിക്കുന്ന സത്യവും അദ്ദേഹം വെളിവാക്കുന്നു. വ്യാജചികിത്സകരുടെ വിഹാരകേന്ദ്രമാണ് പ്രകൃതിചികിത്സ എന്ന സത്യം നമ്മെ അമ്പരപ്പിക്കും. പരിഷ്കൃതരാജ്യങ്ങള്‍ കപടചികിത്സയുടെ ഗണത്തില്‍പ്പെടുത്തി നാച്ചുറോപതിയെ മാറ്റിനിര്‍ത്തിയപ്പോള്‍, ഭാരതസര്‍ക്കാര്‍ ബാച്ചിലര്‍ ഓഫ് നാച്ചുറോപ്പതി ആന്‍ഡ് യോഗിക് സയന്‍സസ് (BNYS) എന്ന അസംബന്ധ കോഴ്സ് നടത്തി മെഡിക്കല്‍ബിരുദവും ചികിത്സക്ക് അംഗീകാരവും നല്‍കുന്നു. അതേസമയം  ബി.എ.വൈ.എസ് പഠിപ്പിക്കുന്ന ഒറ്റ കോളേജുപോലുമില്ലാത്ത കേരളത്തില്‍ രാജ്യത്തെ പ്രകൃതി ചികിത്സാകേന്ദ്രങ്ങളുടെ നാലിലൊന്ന് പ്രവര്‍ത്തിക്കുന്നുമുണ്ട്. ചികിത്സ നടത്താന്‍ അര്‍ഹത നല്‍കാത്ത, ഡിപ്ലോമ അല്ലെങ്കില്‍ സര്‍ട്ടിഫിക്കറ്റ് കോഴ്സ് നല്‍കുന്ന നിരവധി സ്ഥാപനങ്ങള്‍ നമ്മുടെ നാട്ടിലുണ്ട്. കേരളത്തിലെ 70 ഓളം വരുന്ന പ്രകൃതി ചികിത്സാ കേന്ദ്രങ്ങളില്‍ ചികിത്സ നടത്തുന്നത് ഇതിലേതെങ്കിലും പാസ്സായി വരുന്നവരാണ്.  സംഘടനാബലം കൊണ്ടും ഗീബല്‍സിയന്‍ പ്രചാരവേലകള്‍ കൊണ്ടും സമൂഹത്തിന്റെ കണ്ണില്‍ പൊടിയിട്ട്, നിയമാനുകൂല്യമില്ലത്ത ബിസിനെസ്സ് അവര്‍ മുടക്കമില്ലാതെ നടത്തിപ്പോരുന്നു. അവരുടെ കരാളഹസ്തത്തില്‍പ്പെട്ടു ജീവന്‍ ഹോമിച്ച നിര്‍മല എന്ന സ്തനാര്‍ബുദ രോഗിയുടെ കഥ പ്രതിപാദിച്ചുകൊണ്ടാണ് അവസാന അദ്ധ്യായം അവസാനിക്കുന്നത്.

നമ്മുടെ നാട്ടില്‍ പ്രകൃതി ചികിത്സയ്കൊപ്പം സയാമീസ് ഇരട്ടയായി പ്രത്യക്ഷപ്പെടുന്ന യോഗയുടെ പാരമ്പര്യവും പ്രസക്തിയും വിശകലനം ചെയ്യുന്ന ഒരനുബന്ധം കൂടി ഈ പുസ്തകത്തിലുണ്ട്. ഭാരതത്തിലെ സന്യാസിമാര്‍ക്ക് മോക്ഷപ്രാപ്തിക്കായി ചിട്ടപ്പെടുത്തപ്പെട്ട യോഗം (പതഞ്ജലീയോഗവും  ഹഠയോഗവും) എങ്ങിനെ യോഗ എന്ന അഭ്യാസപദ്ധതിയായി എന്ന  കൌതുകകരമായ ചരിത്രമാണ് ഇതില്‍ അനാവരണം ചെയ്യപ്പെടുന്നത്. ഇന്ന് ആഗോളതലത്തില്‍ കൊണ്ടാടപ്പെടുന്ന യോഗ സാംമ്പ്രദായിക എക്സര്‍സെസിന്റെ ഗുണം പോലും ചെയ്യാത്ത മൃദുഅഭ്യാസവേല ആണന്നു ഗ്രന്ഥകര്‍ത്താവ്‌  സമര്‍ഥിക്കുന്നു.

“മനുഷ്യശീരത്തിന്റെ പ്രകൃതിയും ചികിത്സയുടെ സ്വാഭാവികരീതികളും സംബന്ധിച്ച വിശിഷ്ടമായ അറിവുകളുടെ സമാഹാരമാണ് പ്രകൃതിചികിത്സ” – എന്ന അവകാശവാദത്തെ വേരറ്റം കടപുഴക്കിയെറിയുന്നു  ഡോ മനോജ്‌ കോമത്ത്. “പ്രകൃതി” എന്ന് കേട്ടാൽ എന്തും ഗുണകരവും ആരോഗ്യകരവും ആണെന്ന് സാമാന്യ ജനം വിശ്വസിച്ചു പോകും. അതുകൊണ്ട് തന്നെ പ്രകൃതി ചികിത്സക്കാർ പ്രചരിപ്പിക്കുന്ന പച്ചയായ സസ്യാഹാരം ശീലമാക്കിയവർ ധാരാളം. ഇവ മനുഷ്യന്റെ ദഹന വ്യവസ്ഥക്ക് ഇണങ്ങില്ലെന്നതാണ് സത്യം. പച്ചക്കറികൾ വേവിക്കാതെ കഴിക്കുന്നത്‌ പലപ്പോഴും ഗുണത്തെക്കാളേറെ ദോഷം ചെയ്തേക്കും എന്നും ഗ്രന്ഥകാരന്‍ മുന്നറിയിപ്പ് നല്‍കുന്നു. പ്രകൃതിചികിത്സയുടെ ഒരു വിമര്‍ശനപഠനം എന്നതിലുപരിയായ ഒരു പ്രാധാന്യം ഈ പുസ്തകത്തിനുണ്ടെന്നു പ്രത്യകം പറയണം. ആധുനികശാസ്ത്രം, പ്രത്യേകിച്ചും വൈദ്യശാസ്ത്രം, നേടിയ അറിവുകളുടെ മഹത്വത്തെക്കുറിച്ചും സമൂഹത്തിനു അതുണ്ടാക്കിയ പ്രയോജനങ്ങളെക്കുറിച്ചും  സാമാന്യവായനക്കാരന് ശരിയായ അവബോധം ഇത് പ്രധാനം ചെയ്യുന്നു. പ്രകൃതിചികിത്സയുടെ ചരിത്രപശ്ചാത്തലം പ്രതിപാദിക്കുന്ന 2 മുതല്‍ 9 വരെയുള്ള അദ്ധ്യായങ്ങളില്‍ വിശദമാക്കപ്പെടുന്നത് ആധുനികചികിത്സയുടെ വികാസപരിണാമചരിത്രം കൂടിയാണ്.

ചരിത്രവികാസങ്ങള്‍ അവതരിപ്പിക്കുന്ന അധ്യായങ്ങളില്‍ നാച്ചുറോപതിയുമായി ബന്ധപ്പെട്ടു അവരുടെ പുസ്തകങ്ങളില്‍പോലും കാണാന്‍ സാധിക്കാത്ത നിരവധി ചരിത്രസത്യങ്ങളും രേഖകളും നല്‍കിയിരിക്കുന്നു. അതുകൂടാതെ ഹോമിയോപതി, യുനാനി, ഓസ്റ്റിയോപ്പതി, ചിറോപ്രാക്റ്റിക് തുടങ്ങിയ സംമ്പ്രദായങ്ങളുടെ ഉത്ഭവചരിത്രങ്ങളും ഇതില്‍ വായിക്കാം. ഇവരൊക്കെ ‘അലോപ്പതി’ എന്ന് വിശേഷിപ്പിച്ച അന്നത്തെ കാലിക ചികിത്സയുടെ വിശദാംശങ്ങളും പ്രതിപാദിച്ചിട്ടുണ്ട്. അവയെയൊക്കെ പൂര്‍ണ്ണമായും കാലഹരണപ്പെടുത്തിക്കൊണ്ട് ആധുനിക അറിവുകളുടെ വെളിച്ചത്തില്‍ മോഡേണ്‍ മെഡിസിന്‍ ഉരുത്തിരിഞ്ഞ ചരിത്രം വളരെ ആവേശത്തോടെയാണ് ഗ്രന്ഥകര്‍ത്താവ്‌ അവതരിപ്പിക്കുന്നത്‌. അസുലഭങ്ങളായ ചരിത്ര വസ്തുതകളാലും നിരവധി അപൂര്‍വ ചിത്രങ്ങളാലും സമൃദ്ധമാണീ പുസ്തകം. അതിനായി ഡോ മനോജ്‌ ഏറെ പഠനപര്യവേഷണങ്ങള്‍ നടത്തിയിട്ടുണ്ടന്നത് വ്യക്തം. അതേസമയം അനായാസമായി വായിച്ചു പോകാന്‍ പാകത്തില്‍ സരളമാണിതിന്റെ ആഖ്യാനശൈലി. അശാസ്ത്രീയതകളെ വിമര്‍ശിക്കുമ്പോള്‍ കടുത്ത പരിഹാസം  പ്രയോഗിക്കുവാനും  ഡോ മനോജ്‌ മടിക്കുന്നില്ല.

ഒരു ശാസ്ത്രസത്യം പലവട്ടം പറയേണ്ടി വരുന്നത് അവതരണത്തില്‍ അനിവാര്യമാകുന്നതിനാല്‍, ചിലയിടങ്ങളില്‍ ആവര്‍ത്തനം അനുഭവപ്പെട്ടേക്കാം. മോഡേണ്‍മെഡിസിന്റെ ആദ്യകാല ശില്പിയായ വില്ല്യം ഓസ്ലാറുടെ പേര് വിട്ടുപോയത് ചെറിയ ആശ്രദ്ധയായി തോന്നി. ഈ പുസ്തകം മൊത്തം പ്രദാനം ചെയ്യുന്ന ഉള്‍കാഴ്ച വെച്ചു നോക്കിയാല്‍ മറ്റു കുറ്റങ്ങളും കുറവുകളും അപ്രധാനമായി കണക്കാക്കാം. ആരോഗ്യ വിഷയത്തില്‍ തല്പ്പരരായ ഏതൊരാള്‍ക്കും നല്ലൊരു വായനാനുഭവം നല്കുന്ന പുസ്തകമാണിതന്നു നിസ്സംശയം പറയാം. മാത്രമല്ല, ഇത്തരം കപട ചികിത്സാ സമ്പ്രദായങ്ങളുടെ പ്രചരണം ആധുനിക സാങ്കേതിക വിദ്യകളുടെ സഹായത്തോടെ പോലും വ്യാപിക്കുന്ന ഇക്കാലത്ത് ഇതൊരു ആവശ്യവുമായിരുന്നു.

കോഴിക്കോട്ടെ എന്‍ലൈറ്റ് ബുക്സ് സ്വതന്ത്രപകര്‍പ്പവകാശ വ്യവസ്ഥയില്‍ പ്രസദ്ധീകരിച്ചിട്ടുള്ള “ചികിത്സയുടെ പ്രകൃതി പാഠങ്ങള്‍” പ്രസാധകരില്‍ നിന്നും നേരിട്ടു വാങ്ങാം. വില 130 രൂപ. enlightbooks@mail.com-ല്‍ ഇ മെയില്‍ വഴിയോ 9446258085 – ല്‍ sms അയച്ചോ ബന്ധപ്പെടാം.

Use Facebook to Comment on this Post

ഉല്‍ക്കാവര്‍ഷം തുടരും. ബുധനെയും കാണാം, മഴമേഖങ്ങള്‍ സമ്മതിച്ചാല്‍ !

ഈ മാസവും നല്ലൊരു ഉൽക്കാവർഷം ഉണ്ട്. മെയ് 5,6 തിയതികളിലാണത്. മണിക്കൂറിൽ മുപ്പതിലേറെ ഉൽക്കകൾ കാണാൻ കഴിയുന്ന മോശമല്ലാത്ത ഒന്നാണിതെങ്കിലും മഴമേഘങ്ങൾ ഇതിനു സമ്മതിക്കും എന്നു തോന്നുന്നില്ല. പാതിരാത്രിക്കു ശേഷമാണ് ഉൽക്കാവീഴ്ചകൾ നന്നായി കാണാൻ കഴിയുക. വർഷങ്ങൾക്കു മുമ്പ് ഹാലി ധൂമകേതു പോയ വഴിയിൽ അവശേഷിപ്പിച്ച അവശിഷ്ടങ്ങളാണ് അക്വാറീഡ്സ് ഉൽക്കാവർഷം എന്നറിയപ്പെടുന്ന ഈ ഉൽക്കാവർഷത്തിൽ കാണാൻ കഴിയുക. കഴിഞ്ഞ പ്രാവശ്യം വന്നപ്പോഴുള്ളവയല്ല അതിനും മുമ്പ് വന്നു പോയപ്പോൾ അവശേഷിപ്പിച്ചവയാണത്രെ ഇവ.

ബുധനെ കാണാനുള്ള അപൂർവ്വ അവസരം ഈ മാസത്തിൽ നമുക്ക് കിട്ടുന്നുണ്ട്. മെയ് 7ന് ബുധൻ സൂര്യനിൽ നിന്ന് 21ഡിഗ്രിയിലേറെ അകന്നു നിൽക്കുന്നതുകൊണ്ട് അന്നേ ദിവസവും തൊട്ടടുത്ത ദിവസങ്ങളിലും അസ്തമയത്തിനു ശേഷം പടിഞ്ഞാറെ ആകാശത്തിൽ ഇടവം രാശിയിൽ ബ്രഹ്മർഷിക്കു (അൾഡിബറാൻ) വടക്കായി ഏതാണ്ട് അത്ര തന്നെ തിളക്കത്തിൽ ബുധനെ കാണാം.

ശനിയെ ഈ മാസം രാത്രി മുഴുവൻ ആകാശത്തു കാണാം. 23ന് സൂര്യന്റെ നേരെ എതിർവശത്തു വരുന്നതിനാൽ സൂര്യൻ പടിഞ്ഞാറ് അസ്തമിക്കുന്നതോടു കൂടി തന്നെ കിഴക്ക് വൃശ്ചികം രാശിയിൽ ശനി ഉദിക്കും. ഡിസ്ക് പൂർണ്ണമായും കാണാൻ കഴിയും എന്നതുകൊണ്ട് ശനിയെ ഏറ്റവും നന്നായി കാണാനുള്ള അവസരം കൂടിയാണിത്.

ശുക്രനെ സൂര്യാസ്തമയത്തിനു ശേഷം പടിഞ്ഞാറെ ആകാശത്ത് കാണാം. ശുക്രന്റെ ഇടവത്തിൽ നിന്നും മിഥുനത്തിലേക്കുള്ള സഞ്ചാരം ഈ മാസം കാണാം. ചൊവ്വ സൂര്യനോടടുത്തായിരിക്കുന്നതിനാൽ കാണാൻ പ്രയാസമായിരിക്കും. ഇരുട്ടാവുന്നതോടു കൂടി തലക്കു മുകളിൽ പ്രത്യക്ഷപ്പെടുന്ന വ്യാഴത്തെ പാതിരാത്രി വരെ കാണാൻ കഴിയും. വൃശ്ചികം രാശിയിലായിരിക്കും വ്യാഴത്തിന്റെ സ്ഥാനം.

About The Author

തയ്യാറാക്കിയത്: ഷാജി അരിക്കാട്
shajiarikkad@gmail.com

Use Facebook to Comment on this Post

About The Author

സാബു ജോസ്

ഭൂകമ്പം നേപ്പാളിനെ തലങ്ങും വിലങ്ങും കീറിമുറിച്ചു. അതിന്റെ തുടര്‍ചലനങ്ങള്‍ ഉത്തരേന്ത്യയിലാകെ അനുഭവപ്പെടുന്നുണ്ട്‌. ഇങ്ങുതെക്ക്‌ കേരളത്തില്‍ വരെ ഈ ഭൂമികുലുക്കത്തിന്റെ അലയൊലികള്‍ എത്തി. മനുഷ്യന്റെ സ്വപ്‌നങ്ങളും നിര്‍മിതികളുമെല്ലാം ഒരു നിമിഷം കൊണ്ട്‌ തച്ചുതകര്‍ത്ത്‌ ധൂളിയാക്കി മാറ്റുന്ന ഈ പ്രതിഭാസത്തിന്റെ കാരണമെന്താണ്‌.? എന്താണ്‌ ഭൂമിയെ വിറളി പിടിപ്പിക്കുന്നത്‌.? ഭൂമിയുടെ ചരിത്രം ഭൂകമ്പങ്ങളുടെയും ചരിത്രമാണ്‌. ഓരോ ദിവസവും ചെറുതും വലുതുമായി എണ്ണായിരത്തിലധികം ഭൂമികുലുക്കങ്ങള്‍ ഉണ്ടാകുന്നുണ്ടെന്ന്‌ കേള്‍ക്കുമ്പോള്‍ ആശ്ചര്യപ്പെടേണ്ട. ഇവയില്‍ പലതും നമുക്ക്‌ തിരിച്ചറിയാന്‍ കഴിയുന്നില്ല എന്നതാണ്‌ യാഥാര്‍ഥ്യം.

ഭൗമോപരിതലം അവിചാരിതമായി ചലിക്കുന്നതിനാണ്‌ ഭൂകമ്പം അഥവാ ഭൂമികുലുക്കം എന്നു പറയുന്നത്‌. ഭൂകമ്പത്തേക്കുറിച്ചുള്ള പഠനത്തിന്‌ സീസ്‌മോളജി എന്നാണ്‌ വിളിക്കുന്നത്‌. 1903ല്‍ സ്ഥാപിതമായ വേള്‍ഡ്‌ സീസ്‌മോളജിക്കല്‍ സൊസൈറ്റിയാണ്‌ ലോകമെമ്പാടും സംഭവിക്കുന്ന ഭൂകമ്പങ്ങളെക്കുറിച്ചുള്ള ആധികാരിക പഠനങ്ങള്‍ക്ക്‌ മേല്‍നോട്ടം വഹിക്കുന്നത്‌. ഭൂകമ്പത്തിന്റെ ശക്തി അളക്കാനായി ഉപയോഗിക്കുന്ന മാനകത്തെ റിച്ചര്‍ സ്‌കെയില്‍ എന്നാണ്‌ വിളിക്കുന്നത്‌. ഈ മാനകത്തില്‍ മൂന്നിനു താഴെയുള്ള ഭൂകമ്പങ്ങള്‍ അപകടകാരികളല്ല. ഏതെങ്കിലും ഒരു പ്രദേശത്ത്‌ വലിയ നാശനഷ്‌ടമുണ്ടാക്കുന്ന ഭൂമികുലുക്കത്തിന്‌ മേജര്‍ഷോക്ക്‌ എന്നും, മേജര്‍ഷോക്കിനു മുമ്പായി ഭൂകമ്പം സൃഷ്‌ടിക്കപ്പെടുന്ന ബിന്ദുവായ അധികേന്ദ്രത്തിനു ചുറ്റുമായി ഉണ്ടാകുന്ന ചെറിയ കമ്പനങ്ങളെ ഫോര്‍ഷോക്ക്‌ എന്നുമാണ്‌ പറയുന്നത്‌. പ്രധാന ആഘാതത്തിനു ശേഷമുണ്ടാകുന്ന ചെറു ഭൂകമ്പ പരമ്പരയെ ആഫ്‌റ്റര്‍ ഷോക്ക്‌ എന്നാണ്‌ വിളിക്കുന്നത്‌. ഇത്തരം പിന്നാഘാതങ്ങള്‍ ചിലപ്പോള്‍ മാസങ്ങളോളം നീണ്ടുനില്‍ക്കാറുണ്‌.

കാരണങ്ങള്‍

ഭൗമാന്തര്‍ഭാഗത്തുനടക്കുന്ന രണ്ടുതരം പ്രതിഭാസങ്ങളാണ്‌ പ്രധാനമായും ഭൂകമ്പങ്ങള്‍ക്കു കാരണമാകുന്നത്‌. വിവര്‍ത്തന പ്രവര്‍ത്തനങ്ങളും അഗ്നിപര്‍വ്വത പ്രവര്‍ത്തനങ്ങളുമാണ്‌ ഈ രണ്ടു കാരണങ്ങള്‍. ഇവ കൂടാതെ വലിയ അണക്കെട്ടുകള്‍ ഉണ്ടാക്കുന്ന കടുത്ത സമ്മര്‍ദ്ദം ഭൂവല്‍ക്കത്തിലെ ഭ്രംശരേഖകള്‍ക്ക്‌ താങ്ങാന്‍ കഴിയാതെ വരുമ്പോഴും ഭൂകമ്പമുണ്ടാകാറുണ്ട്‌. പ്രേരിത ചലനങ്ങള്‍ എന്നാണിവ അറിയപ്പെടുന്നത്‌. ന്യൂക്ലിയര്‍ ബോംബ്‌ സ്‌ഫോടനവും, ഖനികളുടെ പ്രവര്‍ത്തനങ്ങളും ഭൂവല്‍ക്ക ചലനത്തിന്‌ കാരണമാകുന്നുണ്ടെങ്കിലും അവയെ സാധാരണയായി ഭൂകമ്പമെന്നു വിളിക്കാറില്ല.

വിവര്‍ത്തന പ്രവര്‍ത്തനങ്ങള്‍ (Tectonic Activities)

കോടിക്കണക്കിന്‌ വര്‍ഷങ്ങള്‍ക്കുമുമ്പ്‌ ഭൂമി കത്തിജ്വലിച്ചുകൊണ്ടിരുന്ന ഒരു ഗോളമായിരുന്നു. ക്രമേണ തണുക്കാനാരംഭിച്ചു. ഭൂവല്‍ക്കം ആദ്യം തണുക്കുകയും അന്തര്‍ഭാഗങ്ങളിലേക്ക്‌ പതുക്കെ തണുക്കാനാരംഭിക്കുകയും ചെയ്‌തു. ഈ പ്രവര്‍ത്തനത്തിന്റെ ഭാഗമായി ഭൂവല്‍ക്കത്തിന്റെ പലഭാഗങ്ങളിലും ആഴമേറിയ പൊട്ടലുകള്‍ ഉണ്ടായിട്ടുണ്ട്‌. ഇത്തരം പൊട്ടലുകളെ ഭ്രംശരേഖകള്‍ എന്നാണു വിളിക്കുന്നത്‌. ഭൂവല്‍ക്കത്തിനു കീഴെ ഇന്നും തണുത്തുറയാത്ത ശിലാദ്രവങ്ങളുണ്ട്‌. മാഗ്മ എന്നറിയപ്പെടുന്ന ഈ ശിലാദ്രവത്തിനു മുകളിലൂടെ ഭ്രംശരേഖകള്‍ക്കിരുപുറവുമുള്ള ഖണ്‌ഡങ്ങള്‍ അഥവാ ഫലകങ്ങള്‍ ലംബമായും തിരശ്ചീനമായും തെന്നിനീങ്ങുകയാണ്‌. ഭൂമിയുടെ പുറംപാളിയായ ഭൂവല്‍ക്കം അഥവാ ലിത്തോസ്‌ഫിയറിലുണ്ടാകുന്ന വന്‍തോതിലുള്ള ഇത്തരം ചലനങ്ങളെ ഫലകചലന സിദ്ധാന്തം (അഥവാ വന്‍കര വിസ്ഥാപന സിദ്ധാന്തം) വിശദീകരിക്കുന്നുണ്ട്. ഇത്തരം ചലനങ്ങളുടെ ഭാഗമായി ഫലകങ്ങള്‍ തമ്മില്‍ കൂട്ടിയിടിക്കാറുണ്ട്‌. ഫലകങ്ങളുടെ ഞെരിഞ്ഞമര്‍ത്തലില്‍ ഉണ്ടാകുന്ന ഇലാസ്‌തി്‌കബലം ഊര്‍ജമായി പുറത്തുവരുന്നതാണ്‌ വിവര്‍ത്തന ഭൂമികുലുക്കത്തിനു കാരണം. ഭ്രംശരേഖകളില്‍ ഊര്‍ജം ശേഖരിക്കപ്പെടുന്നതിന്‌ അനുസരിച്ചാണ്‌ ഇവിടെ ഭൂകമ്പങ്ങളുണ്ടാകുന്നത്‌.

അഗ്നിപര്‍വത പ്രവര്‍ത്തനങ്ങള്‍ (Volcanic Activities)

തിളച്ചുമറിയുന്ന മാഗമയിലേക്ക്‌ ഭൂഗര്‍ഭജലം ഊറിയിറങ്ങാനിടയായാല്‍ അത്‌ രാസപ്രവര്‍ത്തനത്തിനും വിസ്‌ഫോടനത്തിനും കാരണമാകുന്നു. അപ്പോഴുണ്ടാകുന്ന ചെറിയ വിടവുകളിലേക്ക്‌ ശിലാദ്രവം ചലിക്കുമ്പോള്‍ ചുറ്റുമുള്ള ഫലകങ്ങള്‍ വികാസ സങ്കോചങ്ങള്‍ക്ക്‌ പാത്രമാകുന്നു. കൂടാതെ ഫലകങ്ങള്‍ കടുത്ത മര്‍ദത്തിനിടയാവുകയും ചെയ്യുന്നു. ഇങ്ങനെയുണ്ടാകുന്ന ഊര്‍ജം ഫലകങ്ങളില്‍ നിന്ന്‌ മോചിക്കപ്പെടുമ്പോഴും ഭൂകമ്പമുണ്ടാകാറുണ്ട്‌. ഇത്തരം ഭൂകമ്പങ്ങള്‍ക്ക്‌ ഭ്രംശരേഖകളുടെ സാന്നിധ്യം ആവശ്യമില്ല. വിവര്‍ത്തന ഭൂകമ്പങ്ങളെ അപേക്ഷിച്ച്‌ ശക്തികുറഞ്ഞവയായിരിക്കും അഗ്നിപര്‍വ്വതജന്യ ഭൂകമ്പങ്ങള്‍.

പ്രേരിത ചലനങ്ങള്‍ (Induced Seismicity)

അണക്കെട്ടുകള്‍ പോലെയുള്ള വലിയ ജലസംഭരണികള്‍ ഭൂഗര്‍ഭ മര്‍ദത്തിലുണ്ടാക്കുന്ന മാറ്റങ്ങള്‍ കാരണമാണ്‌ പ്രേരിത ചലനങ്ങളുണ്ടാകുന്നത്‌. ആ പ്രദേശം ക്രമേണ ഒരു സന്തുലിതാവസ്ഥ പ്രാപിക്കുന്നതോടെ പ്രേരിത ചലനങ്ങള്‍ ശക്തികുറഞ്ഞ്‌ ഇല്ലാതാവുകയാണ്‌ ചെയ്യുന്നത്‌. കേരളത്തില്‍ ഇടുക്കി, മംഗലം ഡാമുകള്‍ പ്രേരിത ചലനങ്ങള്‍ക്ക്‌ കാരണമാകുന്നുണ്ട്‌.

ഭൂകമ്പ തരംഗങ്ങള്‍ (seismic waves)

ഭൂകമ്പത്തിന്റെ ഊര്‍ജം തരംഗരൂപത്തിലാണ്‌ സഞ്ചരിക്കുന്നത്‌. ഇത്തരം തരംഗങ്ങള്‍ പുറപ്പെടുന്ന ബിന്ദുവിനെ ഭൂകമ്പ നാഭി എന്നും, ആ ബിന്ദുവിന്‌ ഏറ്റവുമടുത്ത്‌ ഭൗമോപരിതലത്തിലുള്ള ബിന്ദുവിനെ അധികേന്ദ്രം എന്നുമാണ്‌ വിളിക്കുന്നത്‌. ഭൂകമ്പതരംഗങ്ങള്‍ ഭൂകമ്പനാളിയില്‍ നിന്നും നാനാഭാഗത്തേക്കും പ്രവഹിക്കും. മൂന്നൂതരം തരംഗങ്ങളാണ്‌ ഭൂകമ്പനാളിയില്‍ നിന്നും പുറപ്പെടുന്നത്‌. പ്രാഥമിക തരംഗങ്ങള്‍ അനുദൈര്‍ഘ്യ തരംഗങ്ങളാണ്‌. തരംഗദിശയ്‌ക്ക്‌ സമാന്തരമായി മുന്നോട്ടും പിന്നോട്ടും ചലിക്കുന്ന അനുദൈര്‍ഘ്യ തരംഗങ്ങള്‍ക്ക്‌ ഖര-ദ്രവ ഭാഗങ്ങളില്‍ സഞ്ചരിക്കാന്‍ കഴിയും. സെക്കന്റില്‍ എട്ടുകിലോമീറ്റര്‍ വേഗത്തില്‍ സഞ്ചരിക്കുന്ന ഇത്തരം തരംഗങ്ങള്‍ ഭൗമോപരിതലത്തിലെത്തുമ്പോള്‍ അവയുടെ ഊര്‍ജത്തിന്റെ ചെറിയൊരു ഭാഗം അന്തരീക്ഷത്തിലേക്ക്‌ നിക്ഷേപിക്കാറുണ്ട്‌. തത്‌ഫലമായുണ്ടാകുന്ന ശബ്‌ദം ആവൃത്തി കുറവുകാരണം (5 ഹെട്‌സ്‌) മനുഷ്യര്‍ക്ക്‌ കേള്‍ക്കാന്‍ കഴിയില്ലെങ്കിലും മറ്റു പല ജന്തുക്കളും ശ്രവിക്കുകയും രക്ഷാനടപടികള്‍ എടുക്കുകയും ചെയ്യാറുണ്ട്‌. മനുഷ്യന്റെ ശ്രാവ്യപരിധി 20 ഹെട്‌സിനും 20,000 ഹെട്‌സിനും ഇടയില്‍ ആവൃത്തിയുള്ള ശബ്‌ദതരംഗങ്ങളാണ്‌. ഉദ്‌ഭവ സ്ഥാനത്തുനിന്നും തുടങ്ങുന്ന ഊര്‍ജപ്രവാഹം തിരമാലകള്‍ പോലെയാണ്‌ സഞ്ചരിക്കുന്നത്‌. ഭൗമോപരിതലത്തിലെത്തുമ്പോള്‍ അത്‌ രൗദ്രഭാവം പ്രാപിക്കും. ദ്വിതീയ തരംഗങ്ങള്‍ അനുപ്രസ്ഥ തരംഗങ്ങളാണ്‌. അതുകൊണ്ടുതന്നെ അവയ്‌ക്ക്‌ ദ്രവങ്ങളിലൂടെ സഞ്ചരിക്കാന്‍ കഴിയില്ല. സെക്കന്റില്‍ 5 കിലോമീറ്റര്‍ വേഗതയിലാണവ സഞ്ചരിക്കുന്നത്‌. ഉപരിതലതരംഗങ്ങളാണ്‌ ഭൗമോപരിതലത്തെ ചലിപ്പിക്കുന്നത്‌. ഇവ സെക്കന്റില്‍ 3.2 കിലോമീറ്റര്‍ വേഗത്തില്‍ സഞ്ചരിക്കുന്നവയാണ്‌.

ഭൂകമ്പമാപിനി

ഭൂകമ്പങ്ങളുടെ തീവ്രത അളക്കാനുപയോഗിക്കുന്ന ഉപകരണത്തെയാണ്‌ ഭൂകമ്പമാപിനി എന്നു വിളിക്കുന്നത്‌. സമയസൂചകങ്ങളില്ലാതെ ഭൂകമ്പം മാത്രം രേഖപ്പെടുത്തുന്നവയാണ്‌ സീസ്‌മോസ്‌കോപ്പുകള്‍ എന്നറിയപ്പെടുന്നത്‌. എന്നാല്‍ ഭൂകമ്പ തരംഗങ്ങളെയെല്ലാം സമയാധിഷ്‌ഠിതമായി രേഖപ്പെടുത്തുന്ന ഉപകരണമാണ്‌ സീസ്‌മോഗ്രാഫ്‌. ബി.സി.132 ല്‍ ചൈനക്കാരനായ ചാംഗ്‌ ഹെംഗ്‌ നിര്‍മിച്ച ഉപകരണത്തെയാണ്‌ ആദ്യ ഭൂകമ്പമാപിനിയായി കണക്കാക്കുന്നത്‌. ആ ഉപകരണത്തില്‍ ആറുദിശകളില്‍ വായില്‍ ഓരോ ഗോളങ്ങളുമായിരിക്കുന്ന ആറു വ്യാളികളെ ഉറപ്പിച്ചിരുന്നു. ഏതെങ്കിലും സ്ഥലത്ത്‌ ഭൂകമ്പമുണ്ടായാല്‍ ആ ദിശയിലുള്ള വ്യാളിയുടെ വായില്‍നിന്നും ഗോളം താഴെവീഴും. ഇതൊരു സീസ്‌മോസ്‌കോപ്പ്‌ ആണെന്നുപറയാം. ഉറപ്പിക്കപ്പെട്ട ഒരു അടിത്തറ, ചലനരഹിതമായ പിണ്‌ഡം, ഒരു ശേഖരണ മാധ്യമം എന്നിവ ചേര്‍ന്നതാണ്‌ ആധുനിക ഭൂകമ്പമാപിനികള്‍. ചലനരഹിത പിണ്‌ഡത്തില്‍ ഒരു പെന്‍സിലോ, ലേസര്‍ സ്രോതസോ ഘടിപ്പിച്ചിരിക്കും. തരംഗങ്ങള്‍ക്കൊപ്പം ശേഖരണമാധ്യമം (പേപ്പര്‍, ഫോട്ടോഗ്രാഫിക്‌ ടേപ്പ്‌) ചലിക്കുമ്പോള്‍ പിണ്‌ഡം ചലിക്കില്ല. തത്‌ഫലമായി ഭൂകമ്പത്തിന്റെ ആവൃത്തി ശേഖരണമാധ്യമത്തില്‍ ശേഖരിക്കപ്പെടും. സമായാധിഷ്‌ഠിതമായി നാട ചലിച്ചുകൊണ്ടിരിക്കുന്നതിനാല്‍ ഈ ചലനം ഒരു ഗ്രാഫ്‌ ആയിട്ടായിരിക്കും രേഖപ്പെടുത്തുക.
പത്തൊമ്പതാം നൂറ്റാണ്ടിന്റെ അന്ത്യത്തോടെയാണ്‌ ആധുനിക ഭൂകമ്പമാപിനികളുടെ രംഗപ്രവേശനമുണ്ടായത്‌ 1880ല്‍ ഇറ്റലിക്കാരനായ റോസിയും സ്വിറ്റ്‌സര്‍ലണ്ടുകാരനായ ഫോറലും ചേര്‍ന്ന്‌ ഒരു മാനകം കണ്ടെത്തി. ഇതിനുണ്ടായ ന്യൂനതകളൊക്കെയും പരിഹരിച്ചുകൊണ്ട്‌ 1902ല്‍ ഇറ്റാലിയന്‍ ഭൗമശാസ്‌ത്രജ്ഞനായ മെര്‍ക്കാലി ഒരു മാനകം രൂപീകരിക്കുകയും അതിന്‌ മെര്‍ക്കാലി സ്‌കെയില്‍ എന്നു നാമകരണം ചെയ്യുകയും ചെയ്‌തു. ഒന്നു മുതല്‍ 12 വരെ അളവുകളാണ്‌ ഈ സ്‌കെയിലിലുള്ളത്‌. കുറേക്കൂടി ആധികാരികമായ മാനകമാണ്‌ 1935ല്‍ അമേരിക്കക്കാരനായ ചാള്‍സ്‌.എഫ്‌.റിച്ചര്‍ കണ്ടുപിടിച്ച റിച്ചര്‍ സ്‌കെയില്‍. ഒരു ഭൂകമ്പം സൃഷ്‌ടിക്കുന്ന ഊര്‍ജമാണ്‌ ഈ മാനകത്തില്‍ അളക്കപ്പെടുന്നത്‌. ഒന്നു മുതല്‍ ഒന്‍പതുവരെ അളവുകളാണ്‌ റിച്ചര്‍ സ്‌കെയിലിലുള്ളത്‌.

ഭൂകമ്പ ബാധിത പ്രദേശങ്ങള്‍:

ഫലകചലന സിദ്ധാന്തമനുസരിച്ച്‌ വിവര്‍ത്തന പ്രവര്‍ത്തനങ്ങള്‍ ഏറ്റവുമധികം ഉണ്ടാകാന്‍ ഇടയുള്ള, ഘടനാപരമായി അസ്ഥിരമായ പ്രദേശങ്ങള്‍ ഭൂഫലകങ്ങളിലെ ഭ്രംശരേഖകള്‍ക്കു മുകളിലായിരിക്കും കാണപ്പെടുക. നാടകളായാണ്‌ ഇവയെ കരുതുന്നത്‌. ഏറ്റവും പ്രധാനപ്പെട്ട മൂന്ന്‌ അസ്ഥിരനാടകളെ ഭൗമശാസ്‌ത്രജ്ഞര്‍ തിരിച്ചറിഞ്ഞിട്ടുണ്ട്‌.
1. അഗ്നിവലയം-ശാന്തസമുദ്രത്തിന്റെ വക്കിലായി വടക്കേ അമേരിക്കയുടെ പടിഞ്ഞാറന്‍ തീരവും ഏഷ്യയുടെ കിഴക്കന്‍ തീരവും, തെക്കുകിഴക്കന്‍ ശാന്തസമുദ്ര ദ്വീപുകളും, ന്യൂസിലണ്ടും ചേര്‍ന്ന കുതിരലാടത്തിന്റെ ആകൃതിയിലുള്ള നാട.
2. ആല്‍പൈന്‍ നാട-ദക്ഷിണ ശാന്തസമുദ്ര ദ്വീപുകളില്‍ നിന്ന്‌ ഇന്തോനേഷ്യയിലൂടെ, മധ്യേഷ്യന്‍ പര്‍വ്വതങ്ങളിലൂടെയും, ഗ്രീസിലെ കാക്കസ്സസിലൂടെയും, ഇറ്റലി, സ്‌പെയിന്‍ എന്നീ രാജ്യങ്ങളിലൂടെയും പോകുന്ന നാട.
3. അറ്റ്‌ലാന്റിക്‌ നാട- അറ്റ്‌ലാന്റിക്‌ മഹാസമുദ്രത്തില്‍ തെക്കു വടക്കായി കിടക്കുന്ന സംവൃത നാട
ഇത്ര പ്രധാനമല്ലാത്ത ഒട്ടേറെ നാടകളുമുണ്ട്‌. ഇന്ത്യയില്‍ ഹിമാലയത്തിലൂടെയും ഗുജറാത്തിലെ കച്ചിലൂടെയും കടന്നുപോകുന്ന ഭ്രംശനാട ഉദാഹരണമാണ്‌.

അപകടങ്ങള്‍

ഭൂകമ്പമല്ല, ഭൂകമ്പത്തെ ചെറുക്കാന്‍ ശേഷിയില്ലാത്ത കെട്ടിടങ്ങളും, വാര്‍പ്പുകളുമാണ്‌ അപകടം വരുത്തിവയ്‌ക്കുന്നത്‌. മരങ്ങളും മറ്റും സാധാരയായി ഭൂകമ്പത്തില്‍ കടപുഴകാറില്ല. വൈദ്യൂതിക്കമ്പികളും മറ്റും പൊട്ടിവീണുണ്ടാകുന്ന അപകടങ്ങളും തീപിടിത്തവും അപകടത്തിന്റെ തീവ്രത വര്‍ധിപ്പിക്കുന്നുണ്ട്‌. പ്രധാന ഭൂകമ്പത്തിനു ശേഷം ഉണ്ടാകാറുള്ള പിന്നാഘാതങ്ങള്‍ ഭാഗികമായി തകര്‍ന്ന കെട്ടിടങ്ങളെയും മറ്റും പൂര്‍ണമായി തകര്‍ക്കുന്നത്‌ വലിയ അപകടങ്ങള്‍ വരുത്തിവയ്‌ക്കാറുണ്ട്‌. മണ്ണിടിച്ചില്‍, വെള്ളപ്പൊക്കം, അണക്കെട്ടുകളുടെ തകര്‍ച്ച, നദികളുടെ ഗതിമാറ്റം എന്നിവയെല്ലാം ഭൂകമ്പത്തേത്തുടര്‍ന്ന്‌ സംഭവിക്കാനിടയുള്ള അപകടങ്ങളാണ്‌. സമുദ്രത്തിലുണ്ടാകുന്ന ഭൂകമ്പം സൃഷ്‌ടിക്കുന്ന രാക്ഷസത്തിരമാലകളാണ്‌ സുനാമി. ഇതേത്തുടര്‍ന്നുണ്ടാകുന്ന തിരമാലകള്‍ക്ക്‌ 50 മീറ്റര്‍ വരെ ഉയരം വയ്‌ക്കുകയും കടല്‍ത്തീരത്തെ ആകെ മുക്കിക്കളയുകയും വലിയ നാശനഷ്‌ടങ്ങള്‍ ഉണ്ടാക്കുകയും ചെയ്യും.

അപകടങ്ങള്‍ തടയാം

കോണ്‍ക്രീറ്റ്‌ പോലെ ഭൂകമ്പതരംഗങ്ങള്‍ക്ക്‌ മുന്നില്‍ പൊട്ടിപ്പോകുന്ന വസ്‌തുക്കള്‍ ഒഴിവാക്കി സ്റ്റീല്‍പോലെ ഇലാസ്‌തികത കൂടുതലുള്ള വസ്‌തുക്കള്‍ ഉപയോഗിച്ചുള്ള കെട്ടിട നിര്‍മാണം ഒരു പരിധിവരെ അപകട തീവ്രത കുറയ്‌ക്കും. ജപ്പാനില്‍ ഇത്തരം നിര്‍മാണ രീതി പ്രോത്സാഹിപ്പിക്കുന്നുണ്ട്‌.

ഭൂകമ്പതോതുകളും നാശനഷ്‌ടങ്ങളും

ഇന്ത്യയിലുണ്ടായ ഭൂകമ്പങ്ങള്‍

ഇന്ത്യയുടെ ഭൂരിഭാഗം പ്രദേശവും ഇന്ത്യന്‍ ഫലകത്തില്‍ ഉള്‍പ്പെടുന്നതിനാല്‍ ഉപഭൂഖണ്‌ഢത്തില്‍ ഭൂകമ്പങ്ങള്‍ കുറവാണ്‌. എന്നാല്‍ ഇന്ത്യന്‍ ഫലകം യൂറേഷ്യന്‍ ഫലകവുമായി ബന്ധപ്പെട്ടുനില്‍ക്കുന്ന ഹിമാലയ പ്രദേശം കൂടുതല്‍ ഭൂകമ്പങ്ങള്‍ ഉണ്ടാകുന്ന ഭാഗമായി കണക്കാക്കുന്നു. 1950 ഓഗസ്റ്റ്‌ 15 ന്‌ അസമില്‍ ഉണ്ടായ റിച്ചര്‍ സ്‌കെയിലില്‍ 8.5 രേഖപ്പെടുത്തിയ ഭൂകമ്പം സമീപകാലത്ത്‌ ഇന്ത്യയിലുണ്ടായ വലിയ ഭൂകമ്പമായിരുന്നു. നേപ്പാള്‍ ഭൂകമ്പത്തിന്റെ റിച്ചര്‍ മൂല്യം 9 ആണ്‌. 53 വര്‍ഷങ്ങള്‍ക്കിടയില്‍ ഹിമാലയത്തിലെ പ്രദേശങ്ങള്‍ കേന്ദ്രീകരിച്ച്‌ അഞ്ച്‌ മഹാ ഭൂകമ്പങ്ങള്‍ ഉണ്ടായിട്ടുണ്ട്‌. ഇന്തോനേഷ്യക്കു സമീപത്തുകൂടി പോകുന്ന ഭ്രംശരേഖമൂലം ആന്തമാന്‍ നിക്കോബാര്‍ ദ്വീപുകളെയും ഭൂകമ്പ ബാധിത പ്രദേശമായി കണക്കാക്കുന്നു. ഇന്ത്യന്‍ ഫലകത്തിന്റെ ഏറ്റവും സുരക്ഷിതമായ ഭാഗമെന്നു കരുതപ്പെടുന്ന ഒരു പ്രദേശത്താണ്‌ കേരളമുള്ളത്‌. ദക്ഷിണേന്ത്യന്‍ പരിച എന്നാണ്‌ ഈ പ്രദേശത്തെ ഭൗമശാസ്‌ത്രജ്ഞര്‍ വിളിക്കുന്നത്‌. അതുകൊണ്ട്‌ കേരളത്തില്‍ വന്‍ചലനങ്ങള്‍ പ്രതീക്ഷിക്കുന്നില്ല. എന്നാല്‍ ലത്തൂര്‍ ഭൂകമ്പമുണ്ടായത്‌ ഇത്തരമൊരു പ്രദേശത്താണെന്നതും, 1341 ല്‍ ഉണ്ടായ ഒരു ഭൂകമ്പത്തെത്തുടര്‍ന്നാണ്‌ എറണാകുളത്തെ വൈപ്പിന്‍ ദ്വീപ്‌ വേമ്പനാട്ട്‌ കായലില്‍ നിന്ന്‌ ഉയര്‍ന്നുവന്നത്‌ എന്നതും പരിഗണിക്കുമ്പോള്‍ കേരളം സംപൂര്‍ണ സുരക്ഷിതമേഖലയാണെന്ന്‌ തീര്‍ത്തുപറയാന്‍ കഴിയില്ല.

2011 ലെ ജപ്പാന്‍ ഭൂകമ്പവും സുനാമിയും

സമീപകാലത്തുണ്ടായ ഏറ്റവും ശക്‌തമായ ഭൂചലനമാണ്‌ 2011 മാര്‍ച്ച്‌ 11ന്‌ ജപ്പാനില്‍ ആരംഭിച്ചതും പിന്നീട്‌ പ്രകൃതിക്ഷോപങ്ങളുടെ പരമ്പരതന്നെ സൃഷ്‌ടിച്ചതുമായ ദുരന്തം. റിച്ചര്‍ സ്‌കെയിലില്‍ 9 രേഖപ്പെടുത്തിയ ഈ ഭൂകമ്പം ജപ്പാനിലുണ്ടായ ഏറ്റവും വലുതും ലോകചരിത്രത്തിലെ ഏഴാമത്തെ വലിയ ഭൂകമ്പവുമാണ്‌. ജപ്പാന്‍ ദ്വീപുകളില്‍ ഏറ്റവും വലിയ ദ്വീപായ ഹോണ്‍ഷൂവിന്റെ വടക്കു കിഴക്കുള്ള സെന്‍ഡായ്‌ എന്ന തീരദേശ തുറമുഖപട്ടണത്തിന്റെ 130 കിലോമീറ്റര്‍ കിഴക്കുമാറി ഉള്ള തൊഹോകു തീരക്കടലില്‍ പ്രഭവ കേന്ദ്രമുള്ള ഈ ഭൂകമ്പവും അതേത്തുടര്‍ന്നുണ്ടായ ഭീകര സുനാമിയുമാണ്‌ ദുരന്തങ്ങളുടെ ഘോഷയാത്രതന്നെ സൃഷ്‌ടിച്ചത്‌. ഫുക്കുഷിമ ആണവ റിയാക്‌ടര്‍ തകര്‍ന്ന്‌ ജലത്തില്‍ വികിരണങ്ങള്‍ വ്യാപിച്ചതും, വെള്ളപ്പൊക്കവും, കപ്പലുകളും, വീടുകളും, ട്രെയിനുകളുമെല്ലാം ഒലിച്ച്‌ പോയതും ഈ ഭൂകമ്പത്തിന്റെ ബാക്കിപത്രങ്ങളാണ്‌. 2004 ഡിസംബറില്‍ ഇന്തോനേഷ്യയിലുണ്ടായ ഭൂകമ്പത്തിലും തുടര്‍ന്നുണ്ടായ സുനാമിയിലും ലക്ഷങ്ങള്‍ക്കാണ്‌ ജീവന്‍ നഷ്‌ടമായത്‌. നാശനഷ്‌ടങ്ങളുടെ കണക്ക്‌ എണ്ണിത്തിട്ടപ്പെടുത്താന്‍ കഴിയില്ല. ഇതിന്റെ അലയൊലികള്‍ ഇങ്ങ്‌ ദക്ഷിണേന്ത്യ മുഴുവനും അനുഭവിച്ചിട്ടുണ്ട്‌. ജപ്പാന്‍ ഒരു സ്ഥിരം ഭൂകമ്പബാധിത പ്രദേശമായതുകൊണ്ട്‌ കെട്ടിടനിര്‍മാണത്തില്‍ അവര്‍ എടുക്കുന്ന മുന്‍കരുതലുകളാണ്‌ ദുരന്തത്തിന്റെ തീവ്രത വര്‍ധിക്കാതെ നോക്കുന്നത്‌. സുനാമി എന്ന വാക്കുതന്നെ ജപ്പാന്‍കാരുടെ സംഭാവനയാണ്‌. ‘സു’ എന്നാല്‍ തുറമുഖം എന്നും ‘നാമി’ എന്നാല്‍ തിര എന്നുമാണ്‌ അര്‍ഥം. സുനാമി മുന്നറിയിപ്പ്‌ നല്‍കുന്നതിന്‌ ഇപ്പോള്‍ ആഗോള തലത്തില്‍ കേന്ദ്രങ്ങളുണ്ട്‌. ലോകത്തിന്റെ പലഭാഗത്തും സ്ഥാപിച്ചിരിക്കുന്ന ഭൂകമ്പമാപിനികളുടെ ഒരു ശൃംഖലയില്‍ നിന്ന്‌ ചലനത്തിന്റെ പ്രഭവ കേന്ദ്രം നിശ്ചയിക്കാന്‍ സഹായിക്കുന്നു. സമുദ്രാന്തര്‍ ഭാഗങ്ങളില്‍ സ്ഥാപിച്ചിരിക്കുന്ന മര്‍ദ, താപ മാപിനികളില്‍ നിന്ന്‌ തിരയിളക്കവും അവയുടെ ഏറ്റക്കുറിച്ചിലുകളും വ്യക്തമാകുന്നു. ഈ വിവരങ്ങള്‍ അപ്പപ്പോള്‍ സാറ്റലൈറ്റ്‌ സംവിധാനങ്ങള്‍ വഴി മുന്നറിയിപ്പു കേന്ദ്രങ്ങളില്‍ എത്തിക്കുന്നു. എന്നാല്‍ മുന്നറിയിപ്പു സംവിധാനങ്ങളുടെ പരിമിതിയും, മുന്നറിയിപ്പുകളോടുള്ള അവഗണനയും, അശാസ്‌ത്രീയമായ നിര്‍മാണരീതികളും ദുരന്തത്തിന്റെ തീവ്രത വര്‍ധിപ്പിക്കുന്ന കാഴ്‌ചയാണ്‌ നാം കണ്ടുകൊണ്ടിരിക്കുന്നത്‌.

ദുരന്തങ്ങള്‍ നേരിടുന്നതിനുള്ള സമഗ്രമായ ഒരു കര്‍മപദ്ധതിയുടെ അഭാവം ഓരോ തവണയുമുണ്ടാകുന്ന ഭൂകമ്പവും, വെള്ളപ്പൊക്കവും, ചുഴലിക്കാറ്റുകളും നമ്മെ ഓര്‍മപ്പെടുത്തികൊണ്ടിരിക്കുകയാണ്‌. ഭൂകമ്പം ഉള്‍പ്പെടെയുള്ള പ്രകൃതി ദുരന്തങ്ങള്‍ നേരിടുന്നതില്‍ നമുക്കുള്ള കഴിവ്‌ വര്‍ധിപ്പിക്കുന്ന ഫലപ്രദമായ ശാസ്‌ത്രീയ തന്ത്രം രൂപപ്പെടുത്താന്‍ ഇനിയും കഴിഞ്ഞിട്ടില്ല എന്നത്‌ യാഥാര്‍ഥ്യമാണ്‌. ചുഴലിക്കാറ്റ്‌, വെള്ളപ്പൊക്കം, സുനാമി, ഭൂകമ്പം മുതലായ പ്രകൃതി ദുരന്തങ്ങള്‍ മുന്‍കൂട്ടി അറിയുന്നതിനുള്ള സംവിധാനങ്ങള്‍ക്ക്‌ രൂപം നല്‍കാന്‍ ശാസ്‌ത്രസമൂഹത്തിന്‌ ബാധ്യതയുണ്ട്‌. ശാസ്‌ത്രീയമായ കണ്ടെത്തലുകള്‍ നയരൂപവല്‍ക്കരണത്തിലും അവ നടപ്പില്‍ വരുത്താനും എങ്ങനെ സാധിക്കുമെന്നതും നിര്‍ണായക പ്രശ്‌നമാണ്‌. ഹിമാലയത്തിന്റെ മധ്യമേഖല കേന്ദ്രീകരിച്ച്‌ ഒരു വന്‍ ഭൂചലനം ഉണ്ടാകുമെന്ന്‌ ശാസ്‌ത്രജ്ഞരില്‍ ചിലര്‍ മുന്നറിയിപ്പ്‌ നല്‍കിയിരുന്നു. എന്നാല്‍ ഈ സുപ്രധാന വിവരം കണക്കിലെടുത്ത്‌ ദുരന്തനിവാരണവുമായി ബന്ധപ്പെട്ട യുക്തമായ തീരുമാനങ്ങളെടുക്കാന്‍ ക്രിയാത്മകമായ ഒരു സംവിധാനം വികസിപ്പിക്കാന്‍ നമുക്ക്‌ കഴിഞ്ഞിട്ടുണ്ടോ എന്നത്‌ ഒരു വലിയ ചോദ്യമായി നിലനില്‍ക്കുന്നു.

Use Facebook to Comment on this Post

About The Author

ഡോ. കെ.എം. ശ്രീകുമാര്‍
sreekumarkmofficial@gmail.com

ശാസ്ത്രീയമായി ദീര്‍ഘകാല വളപ്രയോഗം നടത്തിയാല്‍ പോലും അത് മണ്ണിന്റെ ഘടനയെ ബാധിക്കില്ലായെന്ന് പഠനങ്ങളുടെ അടിസ്ഥാനത്തില്‍ സമര്‍ത്ഥിക്കുന്നു.  രസവളങ്ങള്‍ പൂര്‍ണ്ണമായും നിരോധിക്കാനുള്ള നീക്കങ്ങള്‍ സര്‍ക്കാര്‍ തലത്തില്‍ നടക്കുന്ന സാഹചര്യത്തില്‍ ഏറെ പ്രസക്തമാകുന്നു, ഈ വിഷയത്തിലെ ചര്‍ച്ചകള്‍.

എന്നും ഒരേ സ്വഭാവമുള്ള പരീക്ഷണ യൂണിറ്റുകളില്‍ (കൃഷിയിടത്തില്‍ ) തുടര്‍ച്ചയായി വര്‍ഷങ്ങളോളം പരീക്ഷണം നടത്തി വ്യത്യസ്തമായ ട്രീറ്റ്‌മെന്റുകളുടെ ഫലം  എങ്ങിനെ മണ്ണിന്റെ ഉത്പാദനശേഷിയേയും വിളവിനേയും ബാധിക്കുന്നു എന്ന് കണ്ടെത്തുന്ന പരീക്ഷണങ്ങളാണ് ദീര്‍ഘകാല വളം പരീക്ഷണങ്ങള്‍. രാസവളങ്ങളുടെയും ജൈവവളങ്ങളുടെയും ദീര്‍ഘകാല പ്രോയോഗങ്ങള്‍ എന്ത് ഫലങ്ങളാണുണ്ടാക്കുന്നത് എന്ന വിശകലമാണ് അതിലൂടെ നടത്തുന്നത്.

ദീര്‍ഘകാല വളം പരീക്ഷണങ്ങളുടെ ആവശ്യകത

വളങ്ങളുടെ ദീര്‍ഘകാലത്തെ ഉപയോഗം വരുത്തിവെക്കുന്ന പ്രശ്‌നങ്ങള്‍ അറിയണമെങ്കില്‍ കുറേ വര്‍ഷങ്ങളിലെ തുടര്‍ച്ചയായ നിരീക്ഷണം ആവശ്യമാണ്. എന്നാല്‍ മാത്രമേ നമുക്ക് വളങ്ങളുടെ അവശേഷിപ്പ് എങ്ങനെ മണ്ണിനെയും സൂക്ഷ്മ ജീവികളെയും ബാധിക്കുമെന്ന് മനസ്സിലാക്കാന്‍ കഴിയുകയുള്ളൂ. ഇതിനാല്‍ തന്നെ ഇത്തരം പരീക്ഷണങ്ങള്‍ കൃഷിയില്‍ വളരെ പ്രാധാന്യമര്‍ഹിക്കുന്നു.

ഇംഗ്ലണ്ടിലെ റൊഥാംസ്റ്റഡ് ഗവേഷണ കേന്ദ്രത്തില്‍ 1843നും 1856നും ഇടയില്‍ കെ.ബി. ലെവിസിന്റെയും ജെ.എച്ച്. ഗില്‍ബര്‍ട്ടിന്റെയും നേതൃത്വത്തിലാണ് ദീര്‍ഘകാല വളം പരീക്ഷണങ്ങളുടെ തുടക്കം. ആരംഭിച്ചിട്ട് ഏകദേശം 171 വര്‍ഷങ്ങളായ ഈ പരീക്ഷണങ്ങള്‍ ഇപ്പോഴും തുടരുന്നു. 1957നു ശേഷം ഒരുപാട് പരീക്ഷണങ്ങള്‍ ഈ വിഷയത്തില്‍ നടത്തുകയും വിവിധ മൂലകങ്ങളുടെ അനുപാതം നിജപ്പെടുത്തുകയും ചെയ്തു. റൊഥാംസ്റ്റഡ് മോഡല്‍ പരീക്ഷണങ്ങളെ ആസ്പദമാക്കി ലോകത്ത് പലയിടങ്ങളിലും ദീര്‍ഘകാല വളം പരീക്ഷണങ്ങള്‍ നടത്തുകയുമുണ്ടായി. ഇരുപതാം നൂറ്റാണ്ടില്‍ ഇന്ത്യയിലും ഇത്തരം പരീക്ഷണങ്ങള്‍ക്ക് തുടക്കം കുറിച്ചു. 1885ല്‍ കാണ്‍പൂരിലും 1908ല്‍ പൂസയിലും (ബീഹാര്‍) 1909ല്‍ കോയമ്പത്തൂരും പരീക്ഷണങ്ങള്‍ നടത്തുയുണ്ടായി.

സ്വാതന്ത്ര്യലബ്ധിയെത്തുടര്‍ന്ന് രാസവളങ്ങളുടെയും ജൈവവളങ്ങളുടെയും പ്രയോഗം മണ്ണിനെയും വിളവിനെയും എങ്ങനെ സ്വാധീനിക്കും എന്ന് മനസ്സിലാക്കുന്നതിനായി ഭാരതീയ കാര്‍ഷിക ഗവേഷണ കൗണ്‍സില്‍ (ഐ.സി.എ.ആര്‍) അഖിലേന്ത്യ സംയോജിത ഗവേഷണ പദ്ധതിയില്‍ ദീര്‍ഘകാല വളപരീക്ഷണങ്ങള്‍ 1970 സെപ്തംബറില്‍ 11 കേന്ദ്രങ്ങളിലായി ആരംഭിച്ചു. വിവിധ പാരിസ്ഥിതിക പ്രദേശങ്ങളിലും മണ്ണുതരങ്ങളിലും ഇത്തരം പരീക്ഷണങ്ങള്‍ നടത്തിയതിന്റെ ഉദ്ദേശം, മണ്ണിന്റെ ഘടനയിലും വിവിധ വിളകളുടെ വിളവിലും രാസവളങ്ങളുടെ നിരന്തരമായ ഉപയോഗം കൊണ്ട് എന്ത് മാറ്റം വരുന്നു എന്ന് മനസ്സിലാക്കുക മാത്രമായിരുന്നില്ല ; രാസവളങ്ങളുടെ വിവേകപൂര്‍ണ്ണമായ ഉപയോഗത്തിന് പുതിയ നയങ്ങള്‍ ഉണ്ടാക്കിയെടുക്കുക എന്നതു കൂടിയായിരുന്നു. ഈ പരീക്ഷണങ്ങളുടെ ഫലങ്ങള്‍ ചുവടെ ചേര്‍ക്കുന്നു.

1. രാസവളങ്ങളുടെ കേവലമായ ഉപയോഗം മണ്ണിന്റെ ജൈവാംശം കുറക്കുന്നില്ല.
2. നൈട്രജന്‍ വളങ്ങളുടെ ക്രമാതീതമായ നിരന്തര ഉപയോഗം വിളവിനേയും മണ്ണിനേയും പ്രതികൂലമായി ബാധിക്കും. അമോണിയം സള്‍ഫേറ്റ് രൂപത്തിലുള്ളവ ഉപയോഗിക്കുമ്പോള്‍ മണ്ണിന്റെ അമ്ലത കൂട്ടുകയും ചെയ്യുന്നു.
3. സന്തുലിതമായ രാസവള-ജൈവവള പ്രയോഗം എല്ലാത്തരം വിളകളിലും മണ്ണിലും വിവിധ പോഷകങ്ങളുടെ ലഭ്യത കൂട്ടുന്നു.
4. വിളകള്‍ കൊയ്തു മാറ്റുമ്പോള്‍ മണ്ണില്‍ നിന്നും താരതമ്യേന കുറഞ്ഞ അളവില്‍ മാത്രമെ ഫോസ്ഫറസ് നഷ്ടപ്പെടുന്നുള്ളൂ.
5. പൊട്ടാസ്യം വളങ്ങളുടെ മണ്ണിലെ ലഭ്യതയെപ്പറ്റിയുള്ള പഠനത്തില്‍ എല്ലാത്തരം മണ്ണിലും വിളകളിലും വിളവെടുത്തുമാറ്റുമ്പോള്‍ പൊട്ടാസ്യത്തിന്റെ അളവ് സാരമായി കുറയുന്നതായി കണ്ടെത്തി. കൂടുതല്‍ ജൈവാംശം പൊട്ടാസ്യത്തിന്റെ അളവും ലഭ്യതയും കൂട്ടുന്നതായും കണ്ടെത്തി.
6. പൊതുവെ മണ്ണില്‍ സിങ്കിന്റെ അംശം കുറവാണ്.
7. മണ്ണിലെ സൂക്ഷ്മ ജീവികളുടെ എണ്ണം അശാസ്ത്രീയമായ വളപ്രയോഗം മൂലം കുറയുന്നു. എന്നാല്‍ കാലിവളവും രാസവളവും സംയോജിതമായ രീതിയില്‍ ഉപയോഗിച്ചപ്പോള്‍ മണ്ണില്‍ ജൈവാംശം കൂടുകയും സൂക്ഷ്മ ജീവികളുടെ എണ്ണം വര്‍ദ്ധിക്കുകയും ചെയ്യുന്നു. തന്‍മൂലം ഉല്പാദന വര്‍ദ്ധനവുണ്ടാകുന്നു.
8. മണ്ണിന്റെ ജലാഗീകരണശേഷിയെയും ഘടനയെയും രചനയെയും സംയോജിത വളപ്രയോഗം പ്രതികൂലമായി ബാധിച്ചിട്ടില്ല.

ബല്ലാരിയില്‍  നടത്തിയ സ്ഥിരം വളം പരീക്ഷണങ്ങള്‍

കര്‍ണ്ണാടകയിലെ ബല്ലാരിയില്‍ 1978-79 മുതല്‍ 1992-93 വരെ ചോളത്തില്‍ നടത്തിയ സ്ഥിരം വളപരീക്ഷണങ്ങളുടെ വിശദാംശങ്ങള്‍ ചുവടെ ചേര്‍ക്കുന്നു.

നിരീക്ഷണ ഫലങ്ങള്‍

13 വര്‍ഷത്തെ പരീക്ഷണങ്ങളില്‍ നിന്ന് വ്യക്തമായത് മണ്ണ് പരിശോധനയുടെ അടിസ്ഥാനത്തില്‍ നൈട്രജന്‍, ഫോസ്ഫറസ്, പൊട്ടാഷ് വളങ്ങളും കാലിവളവും ചേര്‍ത്ത പ്ലോട്ടുകളില്‍ നിന്നുമാണ് കൂടുതല്‍ (3916 കി.ഗ്രാം) ലഭിച്ചിട്ടുള്ളത് എന്നാണ്.

• രാസവള -ജൈവവളങ്ങള്‍ സംയോജിതമായി പ്രയോഗിച്ച മണ്ണിലെ പി.എച്ച്. മൂല്യം 8.9ല്‍ നിന്നും 8.6 ആയി കുറഞ്ഞതായി കണ്ടെത്തി.
• മണ്ണിലെ ജൈവാംശത്തിന്റെ അളവ് 0.473 ശതമാനത്തില്‍ നിന്നും 0.519 ശതമാനമായി വര്‍ദ്ധിച്ചു.
• മണ്ണിലെ നൈട്രജന്റെ അളവ് ഉയര്‍ന്നു.
• കൂടാതെ മണ്ണിലെ പൊട്ടാസ്യത്തിന്റെയും ഫോസ്ഫറസിന്റെയും ലഭ്യതയും കൂടി.

കേരളത്തിലെ പരീക്ഷണങ്ങള്‍

“ഫോസ്ഫറസ് മൈനിംഗ്” ഫോട്ടോ– Lorrie Graham via Wikimedia Commons.

കേരളത്തിന്റെ മധ്യമേഖലയെയും പശിമരാശി മണ്ണിനെയും പ്രതിനിധീകരിക്കുന്ന പട്ടാമ്പി നെല്ലു ഗവേഷണ കേന്ദ്രത്തില്‍ 1961 മുതലും തെക്കന്‍ മേഖലയേയും പൂഴി കലര്‍ന്ന മണ്ണിനെയും പ്രതിനിധീകരിക്കുന്ന കായംകുളം നെല്ല് ഗവേഷണ കേന്ദ്രത്തില്‍ 1964 മുതലും 30 വര്‍ഷക്കാലം സ്ഥിരം വളം പരീക്ഷണങ്ങള്‍ നടത്തുകയുണ്ടായി.

പട്ടാമ്പിയിലെ പരീക്ഷണങ്ങള്‍

താഴെപ്പറയുന്ന 8 തരം വളപ്രയോഗങ്ങളാണ് നെല്ലില്‍  ഇവിടെ മൂന്ന് ദശകങ്ങളിലായി ആണ്ടില്‍ രണ്ട് പൂവ് വീതം പരീക്ഷണ വിധേയമാക്കിയത്.

വളപ്രയോഗം പരീക്ഷണങ്ങള്‍ :

1. കാലിവളം ഹെക്ടറിന് 8 ടണ്‍ വീതം മാത്രം. രാസവളങ്ങളില്ല.
2. പച്ചിലവളങ്ങള്‍ മാത്രം ഹെക്ടറിന് 8 ടണ്‍.
3. കാലിവളം 4 ടണ്‍ + പച്ചില വളം 4 ടണ്‍
4. ഹെക്ടറിന് 40 കി. ഗ്രാം നൈട്രജന്‍ ലഭിക്കും വിധം അമോണിയം സള്‍ഫേറ്റ് മാത്രം.
5. കാലി വളം ഹെക്ടറിന് 4 ടണ്‍ + 20:20:20 കി. ഗ്രാം തോതില്‍ എന്‍.പി.കെ. കിട്ടത്തക്കവിധം രാസവളങ്ങള്‍.
6. പച്ചിലവളം ഹെക്ടറിന് 4 ടണ്‍ + ഹെക്ടറിന് 20:20:20 കി. ഗ്രാം തോതില്‍ എന്‍.പി.കെ. കിട്ടത്തക്കവിധം രാസവളങ്ങള്‍.
7. കാലി വളം ഹെക്ടറിന് 2 ടണ്‍ + പച്ചിലവളം ഹെക്ടറിന് 2 ടണ്‍ + 20:20:20 കി. ഗ്രാം തോതില്‍ എന്‍.പി.കെ. കിട്ടത്തക്കവിധം രാസവളങ്ങള്‍.
8. ഹെക്ടറിന് 40:20:20 കി. ഗ്രാം തോതില്‍ എന്‍.പി.കെ. കിട്ടത്തക്കവിധം രാസവളങ്ങള്‍.

പിന്നീട് വളപ്രയോഗത്തില്‍ പുതിയ പരീക്ഷണങ്ങള്‍ ചേര്‍ക്കുകയുണ്ടായില്ല.

നിരീക്ഷണ ഫലങ്ങള്‍

ഒന്നാം വിളയില്‍ ഉയരം കൂടിയ ഇനം നാടന്‍ വിത്തുപയോഗിച്ചുള്ള കൃഷിയില്‍ ആദ്യത്തെ 10 കൊല്ലം ഹെക്ടറിന് 4 ടണ്‍ പച്ചിലവളവും 20:20:20 കി. ഗ്രാം തോതില്‍ എന്‍.പി.കെ. കിട്ടത്തക്കവിധം രാസവളങ്ങളും ചേര്‍ത്ത പ്ലോട്ടുകളിലാണ് ഏറ്റവും നല്ല വിളവുണ്ടായത്. പക്ഷെ പില്‍ക്കാലത്ത് (1971-91 വരെ) ഹെക്ടറിന് 4 ടണ്‍ കാലിവളവും 20:20:20 കി. ഗ്രാം തോതില്‍ എന്‍.പി.കെ.  രാസവളങ്ങളും ചേര്‍ത്ത പ്ലോട്ടില്‍ നിന്നാണ് സുസ്ഥിരമായ രീതിയില്‍ ഉയര്‍ന്ന വിളവ് കിട്ടിക്കൊണ്ടിരുന്നത്. പച്ചില വളം മാത്രമോ, രാസവളം മാത്രമോ നല്‍കിയ പ്ലോട്ടുകളില്‍ കീടശല്യം കൂടുതലായും കണ്ടെത്തി.

രണ്ടാം വിളക്കാലത്ത് ഉയരം കൂടിയ പട്ടാമ്പി-20 എന്ന നാടന്‍ നെല്ലിനം കൃഷി ചെയ്തപ്പോള്‍ പരീക്ഷണ കാലഘട്ടത്തിലെ ആദ്യത്തെ പത്തു കൊല്ലം ഹെക്ടറിന് 40:30:30 കി. ഗ്രാം എന്ന തോതില്‍ എന്‍.പി.കെ. രാസവളങ്ങള്‍ മാത്രം നല്‍കിയ പ്ലോട്ടിലാണ് ഏറ്റവും നല്ല വിളവ് കണ്ടത്. പക്ഷേ, പിന്നീടുള്ള വര്‍ഷങ്ങളില്‍ ഹെക്ടറിന് 6 ടണ്‍ വീതം കാലിവളം മാത്രം നല്‍കിയ പ്ലോട്ടുകളും, ഹെക്ടറിന് 4 ടണ്‍ കാലിവളവും 20:30:20 കി. ഗ്രാം എന്‍.പി.കെ. വളങ്ങളും സംയോജിതമായി ചേര്‍ത്ത പ്ലോട്ടുകളിലും ഏറ്റവും നല്ല വിളവ് ലഭിച്ചു. എന്നാല്‍ പരീക്ഷണ കാലഘട്ടത്തെ മൊത്തത്തില്‍ പരിഗണിച്ചാല്‍ ഹെക്ടറിന് 2 ടണ്‍ കാലിവളവും 2 ടണ്‍ പച്ചിലവളവും 20:20:20 കി. ഗ്രാം എന്ന തോതില്‍ എന്‍.പി.കെ. ലഭിക്കുന്ന രാസവളങ്ങളും സംയോജിതമായി ചേര്‍ത്ത പ്ലോട്ടുകളിലാണ് സുസ്ഥിരമായ ഉയര്‍ന്ന വിളവ് ലഭിച്ചത്.

30 വര്‍ഷത്തെ പരീക്ഷണങ്ങളിലെ പൊതുപ്രവണത, പകുതി വീതം കാലിവളവും എന്‍.പി.കെ.യും പച്ചില വളവും അതുമല്ലെങ്കില്‍ കാലിവളവും രാസവളവും സംയോജിതമായും നല്‍കിയ പ്ലോട്ടുകളിലാണ് സുസ്ഥിരമായ രീതിയില്‍ ഉയര്‍ന്ന വിളവ് കിട്ടിക്കൊണ്ടിരുന്നത് എന്നാണ്. കൂടാതെ ഇത്തരം പ്ലോട്ടുകളില്‍ നിന്നുള്ള വൈക്കോല്‍ ഉല്പാദനവും മെച്ചപ്പെട്ടതായിരുന്നു. മറ്റു പ്ലോട്ടുകളെ അപേക്ഷിച്ച് ഈ പ്ലോട്ടുകളിലെ ജൈവാംശം, കാല്‍സ്യം, ഇരുമ്പ്, മാംഗനീസ്, സിങ്ക് തുടങ്ങിയ സുക്ഷ്മ പോഷകമൂലകങ്ങളുടെ അളവും കൂടുതലായിരുന്നു.

കേന്ദ്ര കിഴങ്ങുവര്‍ഗ്ഗ ഗവേഷണ കേന്ദ്രത്തിലെ പരീക്ഷണങ്ങള്‍

ഇവിടെ 1978 മുതല്‍ 1990 വരെ തുടര്‍ച്ചയായ 13 വര്‍ഷങ്ങളിലായി വളം പരീക്ഷണങ്ങള്‍ നടത്തിയത് കപ്പയിലാണ്. എന്‍.പി.കെ. വളങ്ങള്‍ ഓരോന്നും 100 കി. ഗ്രാം വീതവും കാലിവളം 12.5 ടണ്‍ എന്ന തോതിലുമാണ് ചേര്‍ത്തത്. ചാരവും പൊട്ടാഷും വെവ്വേറെയും സംയോജിപ്പിച്ചും ചേര്‍ത്തപ്പോള്‍ കപ്പയിലെ സയനൈഡിന്റെ അംശം കുറയുന്നതായും എന്നാല്‍ കാലിവളവും നൈട്രജന്‍ വളവും ഉപയോഗിച്ചപ്പോള്‍ സയനൈഡിന്റെ അംശം കൂടുന്നതായും കണ്ടെത്തി.

സത്യത്തില്‍, മണ്ണിന്റെ ഘടന നിലനിര്‍ത്തുന്നതിനും, ചെടികള്‍ക്കാവശ്യമായ പോഷകങ്ങള്‍ വേണ്ടത്ര അളവില്‍ നല്‍കുന്നതിനും ഉയര്‍ന്ന ഉത്പാദനക്ഷമതയ്കും ജൈവവളങ്ങള്‍ മാത്രം പ്രയോഗിച്ചുകൊണ്ടിരുന്നാല്‍ മതിയാകില്ല. കാലിവളത്തില്‍ നിന്നും കൂടുതലായി ലഭിക്കുന്നത് നൈട്രജനാണ്. അതും പരമാവധി 1.5 ശതമാനം വരെ മാത്രം ! മറ്റ് പ്രാഥമിക മൂലകങ്ങളായ ഫോസ്ഫറസ്, പൊട്ടാസ്യം എന്നിവയുടെ അളവ് കാലിവളത്തില്‍ തുലോം കുറവാണ്.

ഇത്തരം സ്ഥിരം വളം പരീക്ഷണങ്ങളുടെ ഫലങ്ങള്‍ പരിശോധിച്ചാല്‍ സ്ഥായിയായ ഉയര്‍ന്ന ഉല്പാദനത്തിനും മണ്ണിന്റെ ഘടന ഉള്‍പ്പെടെയുള്ള ഗുണങ്ങള്‍ നിലനിര്‍ത്തുന്നതിനും സംയോജിതമായ പോഷകപരിപാലനം ആവശ്യമാണ് എന്നു കാണാം. ജൈവവളങ്ങള്‍ മാത്രമായി ഉപയോഗിക്കുമ്പോള്‍ ഇതിനു സാധിക്കുകയില്ല. ജൈവവളങ്ങള്‍ ഏറ്റവും അധികം അടങ്ങിയിരിക്കുന്ന മൂലകം നൈട്രജനാണ്.

ഉദാഹരണത്തിന് നൈട്രജന്റെ അളവ് ജൈവ വളങ്ങളില്‍ താഴെ പറയും പ്രകാരമാണ്:

1. കാലിവളത്തില്‍ 0.5 മുതല്‍ 1.5 വരെ
2. വേപ്പിന്‍ പിണ്ണാക്കില്‍ 2-5% വരെ
3. കോഴിവളത്തില്‍ 4-4.6% വരെ

മറ്റ് പ്രാഥമിക മൂലകങ്ങളായ ഫോസ്ഫറസ്, പൊട്ടാസ്യം എന്നിവയുടെ അളവ് കാലിവളത്തില്‍ കുറവായതിനാല്‍ വിളവിനെയും മണ്ണിന്റെ പോഷകങ്ങള്‍ കൊടുക്കുവാനുള്ള കഴിവിനെയും അത് പ്രതികൂലമായി ബാധിക്കും. കാലിവളം ആവശ്യത്തിന് കിട്ടാനുമില്ല. കേരളത്തിലെ കാലിവളര്‍ത്തു കുടുംബങ്ങള്‍ 1987ല്‍ 35 ലക്ഷം ഉണ്ടായിരുന്നത് 2010ല്‍ 17ലക്ഷം ആയി എന്നാണ് കണക്കുകള്‍ കാണിക്കുന്നത്.

രാസവളങ്ങള്‍ എല്ലാം കൃത്രിമമാണോ ?

“പൊട്ടാഷ് ഉത്പാദന കേന്ദ്രം” by Orange Suede Sofa – via Wikipedia.

രാസവളങ്ങള്‍ എല്ലാം തന്നെ കൃത്രിമോല്പന്നങ്ങളല്ല. ഫോസ്ഫറസ് വളങ്ങള്‍ (രാജ്‌ഫോസ്) രാജസ്ഥാനിലെ മണ്ണില്‍ നിന്നും കുഴിച്ചെടുക്കുന്നതാണ്. ചിലി, റഷ്യ മുതലായ നാടുകളിലെ പാറപൊട്ടിച്ചതാണ് പൊട്ടാഷ് . ബോറാക്‌സ് ടര്‍ക്കിയിലെ പാറപ്പൊടിയാണ്. ഡോളോമൈറ്റ് ചുണ്ണാമ്പ് പാറ പൊട്ടിച്ചതാണ്. യൂറിയ, അമോണിയം സള്‍ഫേറ്റ് മുതലായവ വ്യവസായികോല്പന്നങ്ങളാണ്.

ഇന്ത്യയിലെ എന്‍.പി.കെ. വളങ്ങള്‍ ഉപയോഗിക്കുന്നതിന്റെ തോത് 5.5:2.1:1 എന്ന അനുപാതത്തിലാണ്, കേരളത്തിന്റെയും സ്ഥിതി ഏതാണ്ട് ഇതു തന്നെയാണ്. ഏറ്റവും മെച്ചപ്പെട്ട അനുപാതം 2:1:1 ആണ്. ഉയര്‍ന്ന അളവില്‍ നൈട്രജന്‍ ചേര്‍ക്കുന്നത് മണ്ണിനെയും വിളവിനെയും പ്രതികൂലമായി ബാധിക്കുമെന്ന് ദീര്‍ഘകാല വളം പരീക്ഷണങ്ങള്‍ വ്യക്തമാക്കുന്നു. പക്ഷേ കൃഷിക്കാര്‍ വളപ്രയോഗം നടത്തുന്നത് വളങ്ങളുടെ വിലയെയും കൂടി പരിഗണിച്ചാണ്. അതുകൊണ്ടു തന്നെ മെച്ചപ്പെട്ട മൂലകാനുപാതം ലഭിക്കുന്ന രീതിയില്‍ രാസവളങ്ങളുടെ വില നിശ്ചയിക്കുന്ന നയം അനിവാര്യമാണ്.

കേരളത്തിന്റെ മണ്ണില്‍ പൊട്ടാസ്യത്തിന്റെ അളവ് പൊതുവെ കുറവാണ്. അല്പം ചാരം ചേര്‍ത്താല്‍ ആവശ്യത്തിനു പൊട്ടാഷായി എന്നാണ് പൊതുവെ കരുതുന്നത്. ചാരത്തില്‍ പൊട്ടാസ്യത്തിന്റെ അളവ് 5-6% മാത്രമാണ്. നെല്ല്, തെങ്ങ്, വാഴ, കിഴങ്ങ് വര്‍ഗങ്ങള്‍ എന്നിവയില്‍ ഉയര്‍ന്ന ഉല്പാദനത്തിന് ഇത് മതിയാവുകയില്ല. അതിനാല്‍ തന്നെ പൊട്ടാസ്യം വളങ്ങള്‍ മണ്ണില്‍ ചേര്‍ക്കുകയേ നിവൃത്തിയുള്ളൂ. മണ്ണിലെ ജൈവാംശത്തിന്റെ അളവാണ് മറ്റൊരു പ്രധാനപ്പെട്ട വസ്തുത. കേരളത്തിലെ മണ്ണിന്റെ ജൈവാംശം ഇപ്പോള്‍ പൊതുവെ 2% ത്തിനും താഴെയാണ് കാണപ്പെടുന്നത്. ഇത് പരിഹരിക്കുന്നതിനായി മണ്ണില്‍ ജൈവ വളങ്ങള്‍ കൂടുതലായി ചേര്‍ക്കണം. ജൈവാംശം കൂടുതലുള്ള മണ്ണില്‍ വളപ്രയോഗം ഗണ്യമായിത്തന്നെ കുറക്കാവുന്നതാണ്. മണ്ണില്‍ എപ്പോഴും പുതയിടുന്നത് മണ്ണിന്റെ ജൈവാംശം വര്‍ദ്ധിപ്പിക്കും.

ജൈവ പ്രേമത്തിന് പിന്നിലെ യാഥാര്‍ത്ഥ്യങ്ങള്‍

ജൈവകൃഷിയില്‍ നിന്നുള്ള ഉല്പന്നങ്ങള്‍ക്ക് രൂചി കൂടുതലാണ് എന്നാണ് മറ്റൊരു മിഥ്യാധാരണ. ഈ മേഖലയില്‍ നിന്നുള്ള നിരവധി പഠനങ്ങളുടെ ഒരു മെറ്റാ അനാലിസിസ് കാണിക്കുന്നത് സ്വാദില്‍ വ്യത്യാസമില്ല എന്നാണ്. പൊട്ടാഷും കാല്‍സ്യവും കുറഞ്ഞ മണ്ണില്‍ വാഴ കൃഷി ചെയ്താല്‍ വാഴപ്പഴത്തില്‍ കല്ല് കടിക്കും, തക്കാളിയുടെ കായ ചീയും, കോളിഫ്‌ളവറിന്റെ പൂവ് ചീയും, സള്‍ഫര്‍ കുറഞ്ഞ മണ്ണില്‍ എണ്ണക്കുരുക്കള്‍ കൃഷി ചെയ്താല്‍ എണ്ണയുടെ ഗുണമേന്മ കുറയും, അങ്ങനെ പലതും. അതേസമയം കേവലം സന്തുലിതമായ പോഷകദ്രവത്തില്‍ (മണ്ണില്ലാതെ ഹൈഡ്രോഫോണിക്‌സ്) കൃഷി ചെയ്ത തക്കാളിക്ക് ഒരു സ്വാദു വ്യത്യാസവും ഉണ്ടാവുകയില്ല.

വര്‍ദ്ധിച്ചു വരുന്ന ജനസംഖ്യയെ തീറ്റിപ്പോറ്റാന്‍, മണ്ണ് പരിശോധനയുടെ അടിസ്ഥാനത്തില്‍ സംയോജിത വളപ്രയോഗം നടത്തി ഉയര്‍ന്ന വിളവെടുക്കുന്നത് മണ്ണിന്റെ ഘടനയെ തകര്‍ക്കും എന്ന വാദത്തില്‍ കഴമ്പില്ല എന്നാണ് ദീര്‍ഘകാല വളം പരീക്ഷണങ്ങള്‍ തെളിയിക്കുന്നത്. എന്നാല്‍ അമിതവും അശാസ്ത്രീയവുമായ രാസവളപ്രയോഗം ശരിയല്ല. പക്ഷെ ഇതുകൊണ്ടുണ്ടാകുന്ന പ്രത്യഘാതങ്ങളായ ഭൂഗര്‍ഭജലത്തിലെ നൈട്രേറ്റ് മലിനീകരണം, കൃഷിയിടങ്ങളില്‍ നിന്നു ജലാശയങ്ങളിലേക്കുള്ള നൈട്രേറ്റ് ഒഴുകല്‍ മുതലായവയൊക്കെ ചൂണ്ടിക്കാട്ടി രാസവളപ്രയോഗത്തെ മുഴുവന്‍ എതിര്‍ക്കുന്ന പ്രവണതയാണിന്ന് കണ്ടുവരുന്നത്. ഈ പ്രചാരണത്തിന്റെ പൊള്ളത്തരം മനസ്സിലാക്കാതെ മാധ്യമങ്ങള്‍ മുഴുവന്‍ ഇതിനു കൂട്ടുനില്‍ക്കുന്നു.

സംസ്ഥാന ജൈവവൈവിധ്യ ബോര്‍ഡിന്റെ നേതൃത്വത്തില്‍ കേരളത്തെ ജൈവകൃഷി സംസ്ഥാനമാക്കാന്‍ മുന്നിട്ടിറങ്ങിയത് ഈ പ്രചരണത്തിന്റെ ഫലമാണ്. സംസ്ഥാന സര്‍ക്കാര്‍ ജൈവ കൃഷി നയം സ്വീകരിക്കുവാന്‍ നിര്‍ബന്ധിതമായി. ജൈവകൃഷി വേണ്ട എന്നല്ല ഇവിടെ വാദം. മറിച്ച് കേരളം മുഴുവന്‍ ജൈവകൃഷിയാക്കാതെ ഏതേതു വിളകളില്‍ ഏതെതു കാര്‍ഷിക മേഖലകളിലാവണം ജൈവകൃഷി എന്ന കാര്യത്തില്‍ വ്യക്തതയുണ്ടാകണം. പൊട്ടാഷ്, കാല്‍സ്യം, ബോറോണ്‍, മഗ്നീഷ്യം എന്നീ മൂലകങ്ങളുടെ ലഭ്യത നമ്മുടെ മണ്ണില്‍ വളരെ കുറവായ സാഹചര്യത്തില്‍ ഇവയുടെ ജൈവ ബദല്‍ മാര്‍ഗ്ഗം എന്താണെന്ന് വ്യക്തമാക്കുകയും വേണം. കേരളം മുഴുവന്‍ ജൈവകൃഷി നടത്തുന്നത് ഇവിടത്തെ കൃഷിക്കാര്‍ക്ക് ഗുണകരമല്ല. പ്രത്യേകിച്ചും ജൈവോല്പന്നങ്ങള്‍ക്ക് ഉയര്‍ന്ന വില ഈടാക്കേണ്ടിവരുന്നതും അവയുടെ തുടര്‍ച്ചയായ മാര്‍ക്കറ്റ് ഉറപ്പുവരുത്താനാകാത്തതുമായ സാഹചര്യത്തില്‍. ഉയര്‍ന്ന ഗുണമേന്മയുള്ള ജൈവവളങ്ങളും സൂക്ഷ്മജീവി വളങ്ങളും ജൈവ കീട – കുമിള്‍നാശിനികളും മാര്‍ക്കറ്റില്‍ സുലഭമായിട്ടുമില്ല.

ഇവിടെ മനസ്സിലാക്കേണ്ടത് രാസവള പ്രയോഗംകൊണ്ട് എന്തെങ്കിലും കുഴപ്പങ്ങളുണ്ടായിട്ടുണ്ടെങ്കില്‍ അതിന്റെ മുഖ്യകാരണം മനുഷ്യന്റെ ദുരയും അത്യാര്‍ത്തിയുമാണെന്നതാണ്. കുറഞ്ഞ ചെലവില്‍, കുറഞ്ഞ സമയംകൊണ്ട് കൂടുതല്‍ വിളവ് എന്ന ആഗ്രഹം അതിരുവിടുമ്പോള്‍, മനുഷ്യര്‍ അനുവര്‍ത്തിക്കുന്ന അശാസ്ത്രീയ രീതികള്‍ക്ക് രാസവളങ്ങളെ കുറ്റം പറഞ്ഞിട്ട് എന്തുകാര്യം ? സത്യത്തില്‍ നമുക്ക് വളര്‍ത്തിയെടുക്കേണ്ടത് ഒരു ഉത്തമ കൃഷിശീലം (Good Agricultural Practice) ആണ്.

• ലേഖകന്‍ കേരള കാര്‍ഷിക സര്‍വ്വകലാശാലയിലെ അഗ്രികള്‍ച്ചറല്‍ എന്റമോളജി വിഭാഗത്തില്‍ അസോസിയേറ്റ് പ്രൊഫസറാണ്.

Use Facebook to Comment on this Post

റോഡില്‍ സോളാര്‍പാനലുകള്‍ സ്ഥാപിച്ച് വൈദ്യുതി ഉത്പാദിപ്പിക്കുന്ന രീതി നെതര്‍ലണ്ടില്‍ വികസിപ്പിച്ചെടുത്തിരിക്കുന്നു.

പുതുക്കാനാവാത്ത പരമ്പരാഗത ഊര്‍ജ്ജ സ്രോതസ്സുകളില്‍ നിന്ന് സുസ്ഥിരവും ഹരിതവുമായ ഊര്‍ജ്ജരൂപങ്ങളിലേക്ക് മാറാനുള്ള ശ്രമം ലോകമെമ്പാടും നടന്നു വരുന്നു. ഈ മാറ്റത്തിന്  ഗതിവേഗം പകരുന്ന ഒരു വാര്‍ത്ത ഇതാ നെതര്‍ലാന്‍ഡ്‌സില്‍ നിന്നും:

സോളാർ  പാനലുകൾ എന്നു കേൾക്കുമ്പോൾ നമ്മുടെ മനസ്സിൽ തെളിയുക നിലത്തോ, മേൽക്കൂരയിലോ ചരിച്ച്‌ വെയ്ക്കുന്ന പാനലുകളാണ്. എന്നാൽ സൊളാർ പാനലുകൾ പാകിയുണ്ടാക്കിയ ഒരു റോഡിനെ കുറിച്ച് സങ്കല്പിച്ചു നോക്കൂ. റോഡ് നിര്‍മ്മിക്കാന്‍ കരങ്കല്ലിന് പകരം സോളാര്‍ പാനലുകള്‍ ! നെതര്‍ണ്ടില്‍ ഏതായാലും അത്തരമൊരു പരീക്ഷണം നടന്നുകൊണ്ടിരിക്കുന്നു. സൂര്യപ്രകാശം ധാരാളം ലഭ്യമാകുന്ന വിധത്തില്‍ തുറന്നുകിടക്കുന്നവയാണ് റോഡുകള്‍. മാത്രമല്ല പാനലുകല്‍ സ്ഥാപിക്കാന്‍ പ്രത്യേകമായി സ്ഥലം കണ്ടെത്തേണ്ട ആവശ്യവും ഇല്ല. കഴിഞ്ഞ വര്‍ഷമാണ്‌ ലോകത്തെ ആദ്യത്തെ സോളാര്‍ റോഡ്‌ നെതര്‍ലാന്‍ഡ്‌സിലെ ക്രോമേനി എന്ന പട്ടണത്തില്‍ സ്ഥാപിക്കപ്പെട്ടത്. സൈക്കിളുകള്‍ക്ക് സഞ്ചരിക്കുവാനുളള റോഡാണ് 230 അടി നീളമുള്ള ഈ സോളാര്‍ റോഡാക്കി മാറ്റിയത്. ഈ സോളാര്‍ പാതയില്‍ നിന്ന് ഒരു വീട്ടിലേക്ക് ഒരു വര്‍ഷത്തേക്ക് ആവശ്യമായ വൈദ്യുതി, ഏകദേശം 3000kWh ഉല്‍പ്പാദിപ്പിക്കാന്‍ കഴിയും എന്നത് ശാസ്ത്രജ്ഞരേപ്പോലും അത്ഭുതപ്പെടുത്തിയിരിക്കുകയാണ്. ഒരു ചതുരശ്ര മീറ്ററില്‍ നിന്ന് പ്രതിവര്‍ഷം 70kWh വൈദ്യുതി ഉത്പാദിപ്പിക്കാന്‍ കഴിയുമെന്നാണ് കണക്കാക്കുന്നത്. കഴിഞ്ഞ നവംബറില്‍ ആരംഭിച്ച ഈ റോഡില്‍ നിന്നും ഇതുവരെ പ്രതീക്ഷിച്ചതില്‍ കൂടുതല്‍ വൈദ്യുതി ഉത്പാദിപ്പിച്ചുകഴിഞ്ഞു. ഗ്ലാസ്, സിലിക്കണ്‍ റബ്ബര്‍, കോണ്‍ക്രീറ്റ് എന്നിവക്കിടയില്‍ സാന്‍വിച്ച് ചെയ്തതാണ് ഇതില്‍ ഉപയോഗിക്കുന്ന സോളാര്‍ പാനലുകള്‍.

ഇവയിലൂടെ എങ്ങനെ വാഹനങ്ങള്‍ ഓടും എന്നാണോ സംശയം? 12 ടണ്‍ ഭാരമുള്ള വാഹനങ്ങളെ വരെ താങ്ങാന്‍ ഈ സോളാര്‍ പാതയ്ക്ക് കഴിയുമെന്ന് നിര്‍മ്മാതാക്കള്‍ അവകാശപ്പെടുന്നു. ഓരോ പാനലും സ്മാര്‍ട്ട്‌ മീറ്ററുകളുമായി പ്രത്യേകം ഘടിപ്പിച്ചിരിക്കുന്നു. ഇവയില്‍  നിന്നും വൈദ്യുതി നേരിട്ട് വൈദ്യുതിവിതരണ ഗ്രിഡിലേക്ക് നല്‍കുകയോ അല്ലെങ്കില്‍ വഴി വിളക്കുകള്‍ കത്തിക്കുന്നതിനായി ഉപയോഗിക്കുകയോ ചെയ്യാം. ഒരു പാനലിന്‍റെ പ്രവര്‍ത്തനം തകരാറിലായാലും മറ്റ് പാനലുകള്‍ക്ക്‌ സ്വതന്ത്രമായി പ്രവര്‍ത്തിക്കാന്‍ ഈ രൂപകല്‍പ്പന കൊണ്ട് സാധിക്കുന്നു. പകല്‍ കൊയ്തെടുക്കുന്ന സൗരോര്‍ജ്ജം ഉപയോഗിച്ച് LED വിളക്കുകള്‍ പ്രകാശിപ്പിച്ച് രാത്രി സ്വയം വഴികാട്ടുന്ന വിധത്തിലേക്ക് ഇതിനെ വികസിപ്പിക്കാനും കഴിയും.

കഴിഞ്ഞ ആറുമാസത്തിനിടെ ഒന്നരലക്ഷത്തിലധികം സൈക്കിളുകള്‍ ഈ പാതയിലൂടെ യാത്ര നടത്തി. ഗാര്‍ഹിക സോളാര്‍ പാനലുകള്‍ പോലെ 20 വര്‍ഷമാണ്‌ ഈ പാനലുകളുടെയും കാലാവധി പ്രതീക്ഷിക്കുന്നത്. പാതയുടെ സുരക്ഷിതത്വത്തെക്കുറിച്ച് ഇനിയും പഠനങ്ങള്‍ നടത്തേണ്ടതുണ്ട് . 2016 ആകുമ്പോഴേക്ക് 328 അടിയായി സോളാര്‍ പാതയുടെ ദൈര്‍ഘ്യം വര്‍ധിപ്പിക്കാനാണ് പദ്ധതിയുടെ ഉജ്ഞാതാക്കളായ സോളാ റോഡ് എന്ന പുതുമുഖ സംരഭകര്‍ ലക്ഷ്യമിടുന്നത്.  അമേരിക്കയില്‍ സോളാര്‍ റോഡ്‌ സ്ഥാപിക്കുന്നതിനായി ഈയിടെ ജനങ്ങളില്‍ നിന്ന് 2.2 ദശലക്ഷം ഡോളര്‍ സമാഹരിച്ചിരുന്നു. ചിലവ് കുറയ്ക്കാനും സുരക്ഷ, പാനലുകളുടെ പ്രവര്‍ത്തന മികവ് ഉറപ്പുവരുത്താനും കഴിഞ്ഞാല്‍ സൗരോര്‍ജ്ജ പാതകള്‍ ലോകമെങ്ങും യാഥാര്‍ത്ഥ്യമാകും.

About The Author

സംഗീത ചേനംപുല്ലി,
അസി. പ്രൊഫസര്‍, ഗവ. എഞ്ചിനീയറിംഗ് കോളേജ്, കോഴിക്കോട്
sangeethachenampulli@gmail.com

Use Facebook to Comment on this Post

“ബ്ലാക്ക് ഹോള്‍”

ഡോ. വി. രാമന്‍ കുട്ടിയുടെ കാര്‍ട്ടൂണ്‍ 2015 മെയ് -18

Use Facebook to Comment on this Post

സസ്തനികളെ, പക്ഷികളെ, ഉഷ്ണരക്തം പേറുന്ന ജീവികളെ, ഉഷ്ണരക്തത്തിന്റെ കുത്തക നിങ്ങള്‍ക്ക് മാത്രമല്ല, അതില്‍ മത്സ്യങ്ങളും പെടുന്നു. ഉഷ്ണരക്തകുടുംബത്തിലെ പുതിയ അംഗത്തെ മനുഷ്യര്‍ പരിചയപ്പെട്ടിരിക്കുന്നു. ഓപ്പ (Opah) അഥവാ ചന്ദ്രമത്സ്യമാണ് കക്ഷി. മത്സ്യജീവശാസ്ത്രജ്ഞര്‍ കണ്ടെത്തിയ,  ശരീരത്തിലാകമാനം ഉഷ്ണരക്തം ചംക്രമണം ചെയ്യാന്‍ കഴിവുള്ള ലോകത്തെ ആദ്യ മത്സ്യമാണ് ഓപ്പ. ആഴങ്ങളിലെ തണുപ്പില്‍ ഉഷ്ണരക്തം ഉത്പാദിപ്പിക്കുവാനും നിലനിര്‍ത്തുവാനും സാദ്ധ്യത കുറവാകയാല്‍ മത്സ്യങ്ങള്‍ക്ക് അതിനുള്ള കഴിവില്ലെന്നായിരുന്നു ഇതുവരെ കരുതിയിരുന്നത്.

ചൂര, സ്രാവ് തുടങ്ങിയ ചില മത്സ്യങ്ങള്‍ക്ക് തങ്ങളുടെ ശരീരത്തിന്റെ ചിലഭാഗങ്ങളില്‍ – പേശികള്‍, കണ്ണുകള്‍, തലച്ചോറ് തുടങ്ങിയ ചിലയിടങ്ങളില്‍ ചൂടുത്പാദിപ്പിക്കാനുള്ള കഴിവുണ്ട്. എന്നാല്‍ ഇവയ്കുപോലും ശരീരത്തിന്റെ പ്രധാന ഭാഗമായ ഹൃദയം പോലുള്ള ഇടങ്ങളെ ചൂടുപിടിപ്പിക്കാനായി ഇടയ്കിടയ്ക്ക്, ആഴക്കടലിന്റെ കൊടും തണുപ്പില്‍ നിന്നും ജലോപരിതലത്തിലേക്ക് വരേണ്ടിവരുന്നു. എന്നാല്‍ ഓപ്പയ്ക് തന്റെ തലയുടെ തൊട്ടുപിന്നിലായി കാണപ്പെടുന്ന ചിറകുകള്‍ (pectoral fin) തുടര്‍ച്ചയായി വീശി ശരീരത്തിനുള്ളില്‍ ചൂടുത്പാദിപ്പിക്കാന്‍ കഴിയും. ചുറ്റുമുള്ള ജലത്തേക്കാള്‍ 4-5 ഡിഗ്രി സെല്‍ഷ്യസ് വരെ ഊഷ്മാവ് ഇപ്രകാരം തന്റെ പേശികളില്‍ നിലനിര്‍ത്തുന്നതിന് ഈ മത്സ്യത്തിന് കഴിയുന്നു. ചെകിളകളുടെ പ്രത്യേക രൂപഘടന, ശരീരാന്തര്‍ഭാഗങ്ങളില്‍ നിന്നും വരുന്ന വരുന്ന ഉഷ്ണരക്തമുപയോഗിച്ച് ചെകിളകളുടെയ ശ്വസന തലത്തില്‍ നിന്നും തിരിച്ചെത്തുന്ന ശീതരക്തത്തെ ചൂടാക്കുവാന്‍ സാഹായിക്കുന്നുവെന്ന് ഓപ്പകളുടെ ഉഷ്ണരക്തം സംബന്ധിച്ച പഠനങ്ങള്‍ക്ക് നേതൃത്വം നല്‍കിയ നാഷണല്‍ ഓഷ്യാനിക്ക് ആന്‍ഡ് അറ്റമോസ്ഫെറിക്ക് അഡ്മിനിസ്ട്രേഷന്റെ (NOAA) കാലിഫോര്‍ണിയയിലെ സൗത്ത് വെസ്റ്റ് ഫിഷറീസ് സയന്‍സ് സെന്ററിലെ മത്സ്യ ജീവശാസ്ത്രജ്ഞന്‍ നിക്കോളാസ് വെഗ്നര്‍ സാക്ഷ്യപ്പെടുത്തുന്നു.

ചിത്രങ്ങള്‍ക്ക് കടപ്പാട് : NOAA

ഉഷ്ണരക്ത ജീവികളായ പക്ഷികള്‍, സസ്തനികള്‍  തുടങ്ങിയവയ്ക്  (Endotherm) ചുറ്റുമുള്ള അന്തരീക്ഷത്തില്‍ നിന്നും വ്യത്യസ്ഥമായ സ്ഥിരമായ താപം ശരീരത്തിനുള്ളില്‍ നിലനിര്‍ത്താനുള്ള കഴിവുണ്ട്. എന്നാല്‍ മത്സ്യങ്ങളെ പോലെ ശീതരക്തമുള്ളവയ്ക്  ( Ecotherm) ഇത് സാധിക്കില്ല. ശരീരത്തില്‍ ഇളം ചുവപ്പ് നിറത്തോടെ ചെറിയ വെള്ളപ്പൊട്ടുകളും കടും ചുവപ്പ് നിറമുള്ള ചിറകുകകളുമുള്ള  ഓപ്പ മത്സ്യത്തിന് ദീര്‍ഘവൃത്താകൃതിയില്‍ ഒരു കാര്‍ടയറിന് സമാനമായ രൂപഘടനയാണുള്ളത്. ഈ പ്രത്യേക ശരീരഘടന ശരീരത്തിനുള്ളില്‍ ഉത്പാദിപ്പിക്കുന്ന താപം പുറത്തേക്ക് പോകുന്നതിനെ തടയുന്നുവെന്നും ഗവേഷകര്‍ പറയുന്നു. ശരാശരി 90 കിലോ തൂക്കം വരുന്ന  ഇവ കടലിലെ 50 മുതല്‍ 400 മീറ്റര്‍ വരെ ആഴങ്ങളില്‍ കണവ തുടങ്ങിയ മത്സ്യങ്ങളെ വേട്ടയാടി ജീവിക്കുന്നു.

ശീതരക്തമുള്ള മറ്റ് മത്സ്യങ്ങളേക്കാള്‍ വേഗത്തില്‍ നീന്താനും പ്രതികരിക്കാനും കണ്ണ്, തലച്ചോര്‍ തുടങ്ങിയവയെ പ്രവര്‍ത്തിപ്പിക്കാനും ഓപ്പകള്‍ക്ക് കഴിയുന്നത് അവയുടെ ഉഷ്ണരക്ത സ്വഭാവംമൂലമാണെന്ന് ഗവേഷകര്‍ കരുതുന്നു. കാലിഫോര്‍ണിയന്‍ തീരങ്ങളില്‍ കാണപ്പെടുന്ന ഇവയെ ടാഗ് ചെയ്ത്  (ഗവേഷണത്തിനായി മത്സ്യങ്ങളെ അടയാളപ്പെടുത്തുന്ന രീതി) അവയുടെ ശരീരത്തിന്റെ ഊഷ്മാവ്, ജീവിക്കുന്ന ആഴം തുടങ്ങിയവ അളന്ന് മറ്റു മത്സ്യങ്ങളുമായി താരതമ്യം ചെയ്താണ് ശാസ്ത്രജ്ഞര്‍ ഈ നിഗമനങ്ങളിലെത്തിയത്. ദി ജേണല്‍ ഓഫ് സയന്‍സിലാണ് ഇതു സംബന്ധമായ പഠനം പ്രസിദ്ധീകരിച്ചത്.

അവലംബം : സൗത്ത് വെസ്റ്റ് ഫിഷറീസ് സെന്റര്‍ ന്യൂസ്

തയ്യാറാക്കിയത്

About The Author

ലീന ഡെന്നീസ്
leena_dnns@yahoo.co.in

Use Facebook to Comment on this Post

മഴപെയ്ത്, അന്തരീക്ഷത്തിലെ പൊടിപടലങ്ങള്‍ മാറി തെളിഞ്ഞ ആകാശം ഇടയ്ക് ലഭിച്ചാല്‍ ജൂണ്‍മാസം ആകാശം നോക്കികള്‍ക്ക് സന്തോഷം പകരുന്നതാകും. ബൂഓട്ടീഡ് ഉൽക്കാവർഷം 27 ന് ദൃശ്യമാകും.

പൊതുവെ നക്ഷത്രനിരീക്ഷകരോട് സഹകരിക്കുന്ന മാസമല്ല ജൂൺ. മേഘമാലകൾ കൊണ്ട് ആകാശമാകെ പൊതിഞ്ഞു വെച്ച് കുറച്ചു നേരമെങ്കിലും ഇതൊന്നു തുറന്നു കിട്ടിയെങ്കിൽ എന്ന് മാനംനോക്കികളെ കൊതിപ്പിക്കും. എങ്കിലും ഇടക്ക് കാർമുകിൽ പുതപ്പ് മാറ്റി ഇതാ ഇപ്പോൾ വേണമെങ്കിൽ നോക്കിക്കോ എന്നു പറയുമ്പോൾ കിട്ടുന്ന സന്തോഷം ഒന്നു വേറെതന്നെയാണ്. മഴയിൽ കുതിർന്ന് അന്തരീക്ഷത്തിലെ പൊടിപടലങ്ങളെല്ലാം പോയി തെളിഞ്ഞ ആകാശത്തിലെ നക്ഷത്രങ്ങളെ ആസ്വദിക്കാൻ ഇതിൽപ്പരം നല്ല കാലം ഏതാണുള്ളത്?

ഈ മാസത്തെ ബൂഓട്ടീഡ് ഉൽക്കാവർഷം അവസരമൊത്താൽ കാണാം. 27നാണ് ഇതു കാണാൻ കഴിയുക. ബുധൻ, ശുക്രൻ, വ്യാഴം, ശനി എന്നീ ഗ്രഹങ്ങളെ ഈ മാസം കാണാൻ കഴിയും. മഴമേഘങ്ങൾ കനിയുകയാണെങ്കിൽ ബുധനെ നന്നായി കണ്ടാസ്വദിക്കാനും ഭാഗ്യമുണ്ടാവും. മറ്റൊരു മനോഹരദൃശ്യം ജൂൺ 20ന് വ്യാഴം, ശുക്രൻ, ചന്ദ്രൻ എന്നിവർ ചേർന്നു നടത്തുന്ന വട്ടമേശസമ്മേളനമായിരിക്കും. ഈ ദിവസം ഇവ മൂന്നും സൂര്യാസ്തമനത്തിനു ശേഷം പടിഞ്ഞാറേ ആകാശത്ത് മുഖാമുഖം നിൽക്കുന്നതു കാണാം. തുടർന്നുള്ള ദിവസങ്ങളിൽ വ്യാഴം, ശുക്രൻ എന്നിവ അടുത്തു വരുന്നതും അവസാനം ഇവ പരസ്പരം ഉരുമ്മി നീങ്ങുന്നതും ജൂൺ നമുക്കായി കാഴ്ചവെക്കുന്ന മനോഹരദൃശ്യങ്ങളിൽ ഒന്നായിരിക്കും.

ബുധനെ കാണാൻ ഏറ്റവും നല്ല അവസരമാണ് ഈ മാസത്തിൽ വരാനിരിക്കുന്നത്. ജൂൺ 24ന് ബുധൻ സൂര്യനിൽ നിന്നും പടിഞ്ഞാറു ഭാഗത്തേക്ക് ഏറ്റവും കൂടുതൽ അകന്നു നിൽക്കുന്ന സമയമാണ്. രാവിലെ 5മണിയോടു കൂടി എടവം രാശിയോടൊപ്പം ബുധൻ കിഴക്ക് ഉദിക്കും. സൂര്യപ്രകാശം മറക്കുന്നതുവരേക്കും ഇതിനെ കണ്ടുകൊണ്ടിരിക്കാം.

ശുക്രനെയും ഈ മാസത്തിൽ നന്നായി കാണാം. മാസാദ്യം സൂര്യൻ അസ്തമിച്ചു കഴിഞ്ഞാൽ പടിഞ്ഞാറൻ ആകാശത്തിൽ കർക്കടകം രാശിയിൽ ശുക്രൻ തിളങ്ങിനിൽക്കുന്നതു കാണാം. ഓരോ ദിവസം കഴിയുന്തോറും കർക്കടകത്തിൽ നിന്നും അകന്ന് ചിങ്ങത്തോട് അടുത്തുകൊണ്ടിരിക്കും. അവസാനത്തെ ആഴ്ചയിൽ  വ്യാഴത്തോട് അടുക്കുന്ന കാഴ്ച വളരെ മനോഹരമായിരിക്കും. മാസാവസാനം വ്യാഴവുമായി ചേർന്നു നിൽക്കുന്ന മനോഹരദൃശ്യം നമുക്കു സമ്മാനിച്ചു കൊണ്ടായിരിക്കും ജൂൺ നമ്മോട് വിട പറയുക.

ചൊവ്വ സൂര്യനോടു ചേർന്നു നിൽക്കുന്നതുകൊണ്ട് ഈ മാസം നമുക്കു കാണാൻ കഴിയില്ല. വ്യാഴത്തെയും ഈ മാസം നന്നായി കാണാം. സൂര്യൻ അസ്തമിച്ചു കഴിഞ്ഞാൽ പടിഞ്ഞാറെ ആകാശത്ത് കർക്കടകം രാശിയിൽ വ്യാഴം തെളിഞ്ഞു വരുന്നതു കാണാം. 20-ാം തിയ്യതി ശുക്രനോടും പഞ്ചമി ചന്ദ്രനോടും ചേർന്ന് ഒരു ത്രികോണം സൃഷ്ടിക്കുന്നതും കാണാം. ശനിയേയും ഈ മാസം നന്നായി കാണാവുന്നതാണ്. സൂര്യൻ അസ്തമിച്ചു കഴിഞ്ഞാൽ കിഴക്ക് വൃശ്ചികം രാശിയിൽ ശനി തെളിഞ്ഞു വന്നിട്ടുണ്ടാകും.

അന്താരാഷ്ട്ര ബഹിരാകാശ നിലയത്തെ ജൂൺ 4,5 തിയ്യതികളിൽ രാവിലെ കാണാൻ കഴിയും. 4-ാം തിയ്യതി രാവിലെ 5.21ന് വടക്കു പടിഞ്ഞാറു ദിശയിൽ നിന്നും ഉദിച്ച് 5.27ന് തെക്ക് അസ്തമിക്കും. 5-ാം തിയ്യതി രാവിലെ 4.31ന് വടക്കുഭാഗത്ത് ഉദിച്ച് 4.34ന് തെക്കു-കിഴക്ക് അസ്തമിക്കും.

About The Author

തയ്യാറാക്കിയത്: ഷാജി അരിക്കാട്
shajiarikkad@gmail.com

Use Facebook to Comment on this Post

വിഖ്യാത ജൈവവൈവിദ്ധ്യ ശാസ്ത്രജ്ഞ അമീന ഗുരിബ് ഫകിം മൗറീഷ്യസ് പ്രസിഡന്റായി തെരഞ്ഞെടുക്കപ്പെട്ടു. മൗറീഷ്യസിലെ ആദ്യ വനിതാപ്രസിഡന്റ് കൂടിയാണ് അദ്ദേഹം. മൗറീഷ്യസ് ആസ്ഥാനമായുള്ള, മുന്‍പ് സെന്റര്‍ ഫോര്‍ ഫൈറ്റോതെറാപ്പി റിസര്‍ച്ച് (CEPHYR) എന്നറിയപ്പെട്ടിരുന്ന, സി.ഐ.ഡി.പി റിസര്‍ച്ച്  & ഇന്നവേഷന്‍  എന്ന ഗവേഷണ കേന്ദ്രത്തിന്റെ ഡയറക്ടറായി പ്രവര്‍ത്തിച്ചുവരുകയായിരുന്നു ഗുരിബ് ഫകിം.  സൗന്ദര്യവര്‍ദ്ധക, പോഷകാഹാര, ചികിത്സാ മേഖലകളില്‍ സസ്യങ്ങളെ പ്രയോജനപ്പെടുത്തുന്നതിനെ കുറിച്ചുള്ള ഗവേഷണങ്ങളാണ് ഈ കേന്ദ്രത്തില്‍ മുഖ്യമായും നടക്കുന്നത്.

മൊറീഷ്യസ് സര്‍വ്വകലാശാലയിലെ ജൈവ രസന്ത്രവിഭാഗം അദ്ധ്യക്ഷ, ഡീന്‍, ഇന്റര്‍നാഷണല്‍ കൗണ്‍സില്‍ ഫോര്‍ സയന്റിഫിക് യൂണിയന്‍ ആഫ്രിക്കാ മേഖലാ കേന്ദ്രം അദ്ധ്യക്ഷ എന്നീ നിലകളില്‍ പ്രവര്‍ത്തിച്ചിട്ടുള്ള ഇദ്ദേഹം വേള്‍ഡ് ബാങ്ക് തുടങ്ങിയ അന്താരാഷ്ട്ര സംവിധാനങ്ങളുമായി ചേര്‍ന്നും പ്രവര്‍ത്തിച്ചിട്ടുണ്ട്.  വനിതാശാസ്ത്ര പ്രതിഭകള്‍ക്കായുള്ള L’Oréal–UNESCO അവാര്‍ഡ് കരസ്ഥമാക്കിയിട്ടുള്ള ഗുരീബ് അനവധി അന്താരാഷ്ട്ര പുരസ്കാരങ്ങള്‍ക്കും അര്‍ഹയായിട്ടുണ്ട്.

വിദ്യാഭ്യാസത്തില്‍ ആണ്‍കുട്ടികള്‍ക്കുമാത്രം മുന്‍ഗണനയുള്ള കാലത്ത് തന്നെ പഠിപ്പിക്കാന്‍ സന്മനസ് കാട്ടിയ മാതാപിതാക്കളോട് ഇപ്പോഴത്തെ സ്ഥാന ലബ്ദിയില്‍ ഗുരീബ് ഫകിം നന്ദി പറഞ്ഞു. ബ്രിട്ടണിലെ സുരേയ് സര്‍വ്വകലാശാലയില്‍ നിന്നും ബിരുദം കരസ്ഥമാക്കിയ ഇദ്ദേഹം എക്സ്റ്റര്‍ സര്‍വ്വകലാശാലയില്‍ നിന്നുമാണ് ജൈവരസതനന്ത്രത്തില്‍ ഗവേഷണം പൂര്‍ത്തിയാക്കിയത്. പ്രസിഡന്റ് സ്ഥാനത്തേക്ക് പ്രതിപക്ഷത്തിന്റെയും പിന്തുണയോടെയാണ് ഇദ്ദേഹം തെരഞ്ഞെടുക്കപ്പെട്ടത്.

Use Facebook to Comment on this Post

സേണിലെ ലാര്‍ജ് ഹാഡ്രോണ്‍ കൊളൈഡര്‍ രണ്ടുവര്‍ഷത്തെ വിശ്രമത്തിന് ശേഷം വീണ്ടും പ്രപഞ്ചഘടനാ രഹസ്യങ്ങള്‍ അനാവരണം ചെയ്യാനാരംഭിച്ചു. മനുഷ്യരെ കൊല്ലുന്നതിന് പകരം മുന്നേറാന്‍ സഹായിക്കുന്ന ഈ നിയന്ത്രിത സ്ഫോടനങ്ങളെ കുറിച്ച് വായിക്കുക

About The Author

ശരത് പ്രഭാവ്
sarathprabhav@gmail.com

ലോകത്തിലെ ഏറ്റവും വലിയ ശാസ്ത്രപരീക്ഷണശാലയായ ലാര്‍ജ് ഹാഡ്രോണ്‍ കൊളൈഡര്‍ (എല്‍.എച്ച്.സി) വീണ്ടും പ്രവര്‍ത്തന സജ്ജമായിരിക്കുന്നു. 27 മാസങ്ങള്‍ക്ക് ശേഷം ജൂണ്‍ മൂന്നിന് ഉന്നത ഊര്‍ജ്ജ നിലയിലുള്ള പ്രോട്ടോണുകളെ കൂട്ടിയിടിപ്പിച്ചുകൊണ്ടാണ് പരീക്ഷണങ്ങള്‍ പുനരാരംഭിച്ചത്. 13 ട്രില്ല്യണ്‍ ഇലക്ട്രോണ്‍ വോള്‍ട്ട് വരെ കണങ്ങളെ എത്തിക്കാനുള്ള കഴിവ് എല്‍ എച് സി നേടിക്കഴിഞ്ഞു. മുന്‍പിത് 8 ട്രില്ല്യണ്‍ ഇലക്ട്രോണ്‍ വോള്‍ട്ട് മാത്രമായിരുന്നു. (ഒരു ട്രില്ല്യണ്‍ എന്നാല്‍ ഒന്നിനുപിറകേ 12 പൂജ്യങ്ങള്‍ ചേര്‍ന്ന സംഖ്യയാണ്).

ആദ്യ മൂന്നു വര്‍ഷത്തെ വിജയകരമായ പ്രവര്‍ത്തനങ്ങള്‍ക്ക് ശേഷം 2013 ഫെബ്രുവരി മുതല്‍ എല്‍.എച്ച്.സി. യിലെ പരീക്ഷണങ്ങള്‍ നിര്‍ത്തി വച്ചിരിക്കുകയായിരുന്നു. ഇക്കാലത്തെ പരീക്ഷണങ്ങളില്‍ നിന്നു തന്നെ 100 പെറ്റ ബൈറ്റ് (petabyte (PB)) ഡാറ്റയാണ് സേണിനു ലഭിച്ചത്. ഏതാണ്ട്  700 വര്‍ഷം ദൈര്‍ഘ്യം ഉള്ള എച്. ഡി വീഡിയോക്ക് തുല്ല്യമായ ഡാറ്റയാണിത്. ഈ ഡാറ്റകളുടെ സംഗ്രഹണം, അറ്റകുറ്റപ്പണികള്‍, നവീകരണപ്രവര്‍ത്തനങ്ങള്‍ എന്നിവക്കു വേണ്ടിയാണ് എല്‍.എച്ച്.സി പ്രവര്‍ത്തനങ്ങള്‍ നിര്‍ത്തി വച്ചിരുന്നത്.

ഫ്രാന്‍സ് – സ്വിറ്റ്സര്‍ലന്റ് അതിര്‍ത്തിയിലായി, ഭൗമോപരിതലത്തില്‍ നിന്നും 100 മിറ്റര്‍ താഴെ, 27കിലോമിറ്റര്‍ ചുറ്റളവിലാണ് എല്‍ എച് സി സ്ഥിതി ചെയ്യുന്നത്. ഈ വലിപ്പം തന്നെയാണ് എല്‍ എച് സിയ്ക് ലോകത്തിലെ ഏറ്റവും വലിയ പരീക്ഷണശാല എന്ന പേരു നേടിക്കൊടുത്തത്. ഹാഡ്രോണുകള്‍ എന്നത് അടിസ്ഥാന കണങ്ങളിലെ ഒരു വിഭാഗമാണ്. ക്വാര്‍ക്കുകള്‍ കൊണ്ട് ഉണ്ടാക്കിയിട്ടുള്ള കണങ്ങളെയാണ് ഹാഡ്രോണുകള്‍ എന്ന് വിളിക്കാറ്. ആറ്റത്തിനുള്ളിലെ ന്യൂക്ലിയസ്സിലെ പ്രോട്ടോണുകളും ന്യൂട്രോണുകളും ഒക്കെ ഹാഡ്രോണുകളാണ്. അതായത് അവയൊക്കെ ക്വാര്‍ക്കുകളാല്‍ നിര്‍മ്മിതമാണ്. ലെപ്റ്റോണുകള്‍ എന്ന മറ്റൊരു വിഭാഗമുണ്ട് അവ ക്വാര്‍ക്കുകളാല്‍ നിര്‍മ്മിതമല്ല. ഇലക്ട്രോണുകള്‍, മ്യുവോണുകള്‍ ഒക്കെ ഈ വിഭാഗത്തില്‍പ്പെടും. ഹാഡ്രോണുകളെ കൂട്ടിയിടിപ്പിക്കുക എന്നതാണ് എല്‍ എച് സി ചെയ്യുന്നത്. ഇങ്ങനെ ഹാഡ്രോണുകളെ കൂട്ടിയിടിപ്പിക്കുന്നതിനുമുന്‍പ് അവയുടെ വേഗത കൂട്ടണം. അതായത് അതിന്റെ ഗതികോര്‍ജം വര്‍ധിപ്പിക്കുന്നു. ഇതിനായി വൃത്താകൃതിയിലുള്ള തുരംങ്കങ്ങളിലൂടെ ഇവയെ ത്വരിതപ്പെടുത്തുന്നു. ഇങ്ങനെ പ്രകാശവേഗതയുടെ 99% വരെ കണികകളെത്വരിതപെടുത്താന്‍ എല്‍ എച് സിക്ക് കഴിയും.. ഇപ്രകാരം വേഗത കൂട്ടുമ്പോള്‍ അവയുടെ ഗതികോര്‍ജ്ജം വര്‍ധിക്കുന്നു. പതിമൂന്ന് ട്രില്ല്യണ്‍ ഇലക്ട്രോണ്‍ വോള്‍ട്ട് വരെ ഈ കണങ്ങളുടെ ഊര്‍ജ്ജം വര്‍ധിപ്പിക്കാന്‍ എല്‍ എച് സിക്ക് കഴിയും.

13 ട്രില്ല്യണ്‍ ഇലക്ട്രോണ്‍ വോള്‍ട്ട് എന്നത് കേട്ട് ഞെട്ടണ്ടാ. ഇലക്ട്രോണ്‍ വോള്‍ട്ട് എന്നത് എനര്‍ജിയുടെ വളരെ ചെരിയ ഒരു അളവുകോല്‍ ആണ്. 13 ട്രില്ല്യണ്‍ ഇലക്ട്രോണ്‍ വോള്‍ട്ട്  എന്നത് 20.8×10^-6 ജൂള്‍ മാത്രമാണ്. ഒരു കിലോഗ്രാം ജലത്തിന്റെ താപനില ഒരു ഡിഗ്രീ ഉയര്‍ത്താന്‍ തന്നെ 4179 ജൂളാണ് വേണ്ടത്. തീരെ ചെറിയ എനര്‍ജിയാണെങ്കില്‍ പോലും പ്രോട്ടോണിനെ സംബന്ധിച്ചിടത്തോളം ഇതൊരു വലിയ എനര്‍ജിയാണ്. അതിസൂഷ്മകണങ്ങള്‍ക്ക് ഇത്ര ചെറിയ ഊര്‍ജ്ജം പോലും അതി ഭീമമാണ്.

എല്‍ എച് സി ഒരേ തരത്തിലുള്ള കണങ്ങളുടെ രണ്ട് ബീമുകളെയാണ് ത്വരിതപ്പെടുത്തുക. ഹാഡ്രോണുകളായ  പ്രോട്ടോണുകളെ അല്ലെങ്കില്‍ ലെഡ് അയോണുകളെയാണ് എല്‍ എച് സി ത്വരിതപ്പെടുത്തുന്നത്. പാര്‍ട്ടിക്കിള്‍ ആക്സിലറേറ്ററുകള്‍ക്ക് എല്ലാ വിധ കണങ്ങളേയും ത്വരിതപ്പെടുത്താന്‍ കഴിയില്ല. പ്രധാനമായും അവ ചാര്‍ജ്ജുള്ള കണങ്ങളായിരിക്കണം. എങ്കില്‍ മാത്രമേ ഇലക്ട്രോമാഗ്നെറ്റിക് ഫീല്‍ഡുപയോഗിച്ച് ആക്സിലറെറ്റ് ചെയ്യാന്‍ സാധിയ്ക്കൂ. ഇലക്ട്രോണുകള്‍, പ്രോട്ടോണുകള്‍, അയോണുകള്‍ എന്നിവ ചാര്‍ജുള്ള കണങ്ങളാണല്ലോ അവയെ ആക്സിലറെറ്റ് ചെയ്യാന്‍ പാര്‍ട്ടിക്കിള്‍ ആക്സിലറേറ്ററുകള്‍ക്ക് സാധിക്കും. ചാര്‍ജ്ജുള്ള കണങ്ങള്‍ വര്‍ത്തുളാകൃതിയിലുള്ള പാതയിലൂടെ സഞ്ചരിക്കുമ്പോള്‍ അവയില്‍ നിന്നും ഊര്‍ജനഷ്ട്ടം ഉണ്ടാകുന്നു. (Synchrotron Radiation). കണത്തിന്റെ മാസ് കുറയുന്തോറും ഊര്‍ജ നഷ്ട്ടവും കൂടും. പ്രോട്ടോണുകളുടെ മാസിന്റെ 2000 ല്‍ ഒന്നു മാത്രമേ ഇലക്ട്രോണുകള്‍ക്ക് മാസുള്ളു. അതുകൊണ്ടുതന്നെ ഇലക്ട്രോണുകളെ ആക്സിലറേറ്റ് ചെയ്യുമ്പോള്‍ ഊര്‍ജ്ജ നഷ്ട്ടം കൂടുതലായിരിക്കും.   വര്‍ത്തുളാകൃതിയിലുള്ള ആക്സിലറെറ്ററുകളില്‍, ഉന്നതോര്‍ജ്ജം കൈവരിക്കാന്‍ പ്രോട്ടോണുകളോ അതിലധികം മാസുള്ള കണങ്ങളോ ആണുപയോഗിക്കുക.

“View inside detector at the CMS cavern LHC CERN“ by Tighef – via Wikimedia Commons.

എല്‍ എച് സിയില്‍ കൂട്ടിയിടിക്കപ്പെടുന്ന ബീമുകളില്‍ ഓരോന്നിലും 100 ബില്ല്യണ്‍ പ്രോട്ടോണുകളടങ്ങുന്ന 3000 കൂട്ടങ്ങളാണുള്ളത്. രണ്ടു ബീമുകളും വിപരീത ദിശയിലാണ് സഞ്ചരിക്കുന്നത്.  പക്ഷേ അതിസൂഷ്മകണങ്ങളായതുകൊണ്ടു തന്നെ ഓരോ തവണ ബീമുകള്‍ ഒന്നിച്ചു വരുമ്പോഴും വെറും 20 കൂട്ടിയിടികള്‍ മാത്രമാണ് നടക്കുക. പക്ഷേ ഒരു സെക്കന്റില്‍ 30 ദശലക്ഷം തവണ കണ്ടുമുട്ടും. അങ്ങനെ നോക്കുമ്പോള്‍ 600 ദശലക്ഷം കൂട്ടിയിടികളാണ് ഒരു സെക്കന്റില്‍ സംഭവിക്കുക.ഇങ്ങനെ കൂട്ടിയിടിക്കുമ്പോള്‍ ഉണ്ടാകുന്ന പുതിയകണങ്ങളുടെ പാത മനസ്സിലാക്കിയാണ് ഉണ്ടായ കണങ്ങള്‍ എന്തൊക്കെയാണ് എന്നു മനസിലാക്കുക. ഉദാഹരണമായി പുതുതായി ഉണ്ടാകുന്ന കണങ്ങളെ ഒരു ഇലക്ട്രോമാഗ്നെടിക് ഫീല്‍ഡില്‍ പരിശോധിച്ചാല്‍, പോസിറ്റീവ് ചാര്‍ജുള്ള കണങ്ങള്‍ ഒരു വഴിക്കും നെഗറ്റീവ് കണങ്ങള്‍ മറ്റൊരു വഴിയിലും ആകും പോവുക. ഇനി മൊമെന്റം കണക്കാക്കാന്‍ അവയുടെ പാതയുടെ ആകൃതി നോക്കിയാല്‍ മതി. മൊമെന്റം കൂടിയ കണങ്ങള്‍ കൂടുതല്‍ ദൂരം നേര്‍രേഖയില്‍ സഞ്ചരിക്കും. എന്നാല്‍ മൊമെന്റം കുറഞ്ഞവ വര്‍ത്തുള പാതയിലാവും സഞ്ചരിക്കുക.

യൂറോപ്യന്‍ ഓര്‍ഗനൈസേഷന്‍  ഫോര്‍ ന്യൂക്ക്ലിയാര്‍ റിസര്‍ച്ചിന്റെ നിയന്ത്രണത്തിലാണ് എല്‍ എച് സി പ്രവര്‍ത്തിക്കുന്നത്. 1998 മുതല്‍ 2008 വരെയുള്ള കാലഘട്ടത്തിലാണ് ഇതിന്റെ നിര്‍മ്മാണം നടന്നത്. നൂറിലധികം രാജ്യങ്ങളില്‍ നിന്നായി, പതിനായിരത്തിലധികം ശാസ്ത്രഞ്ജര്‍, സാങ്കേതിക വിദഗ്ധര്‍ എന്നിവരുടെ അധ്വാനം എല്‍ എച് സി നിര്‍മ്മാണത്തിലുണ്ട്. ഫ്രാന്‍സ്, ബ്രിട്ടണ്‍, ഫ്രാന്‍സ് എന്നീ എല്‍ എച് സിക്ക് ആതിഥ്യമരുളുന്നത്. ഒപ്പം ഇന്ത്യ, അമേരിക്ക, റഷ്യ, ജപ്പാന്‍, കാനഡ എന്നിവയും എല്‍ എച്ച് സിയുമായി സഹകരിക്കുന്നുണ്ട്

2010 മുതല്‍ 2013 വരെയുള്ള മൂന്നുവര്‍ഷത്തെ പരീക്ഷണങ്ങളും അതേതുടര്‍ന്നുള്ള ഗവേഷണങ്ങളും ലഭിച്ച ഡാറ്റ മുഴുവനായും വിശകലനം ചെയ്ത് കഴിഞ്ഞിട്ടില്ലെങ്കില്‍ കൂടി, ഇതിനോടകം തന്നെ സുപ്രധാനമായ നിരവധി കണ്ടെത്തുലുകള്‍ നടത്താന്‍ എല്‍ എച് സി ക്ക് കഴിഞ്ഞിട്ടുണ്ട്.

ഇതില്‍ സുപ്രധാനനേട്ടം ദൈവകണം എന്ന പേരില്‍ പ്രസിദ്ധമായ ഹിഗ്സ് ബോസോണിന്റെ കണ്ടെത്തല്‍ തന്നെയാണ്. കണങ്ങള്‍ക്ക് മാസ് നല്‍കുന്ന കണമാണ് ഹിഗ്സ് ബോസോണ്‍. ഇതിന്റെ കണ്ടെത്തല്‍ പീറ്റര്‍ ഹിഗ്സ്, ഫ്രാങ്കോയിസ് എംഗ്ലര്‍ട്ട് എന്നിവര്‍ക്ക് 2013 ലെ നോബെല്‍ സമ്മാനം നേടിക്കൊടുക്കുകയും ചെയ്യുന്നു.

ഹാഡ്രോണുകള്‍ നിര്‍മ്മിച്ചിരിക്കുന്നത് ക്വാര്‍ക്കുകള്‍ കൊണ്ടാണ്. പ്രോട്ടോണ്‍ ന്യുട്രോണ്‍ എന്നിവ 3 ക്വാര്‍ക്കുകള്‍ കൊണ്ടും. മെസോണുകള്‍ ഒരു ക്വാര്‍ക്കും മറ്റൊരു ആന്റിക്വാര്‍ക്കും ചേര്‍ന്നാണ് ഉണ്ടായിരിക്കുന്നത്.  എന്നാല്‍ എല്‍ എച് സിയില്‍ നടത്തിയ പരീക്ഷണങ്ങളുടെ അടിസ്ഥാനത്തില്‍ 4 ക്വാര്‍ക്കുകള്‍ ചേര്‍ന്ന ഹാഡ്രോണുകളെ കണ്ടെത്താനായി  (Z(4430), X(3872)). ഇത്തരം വിചിത്രങ്ങളായ ഹാഡ്രോണുകള്‍ ഉണ്ടായേക്കാമെന്ന് തിയറികളുണ്ടായിരുന്നെങ്കിലും. അവയെ കണ്ടെത്താനായത് എല്‍ എച് സി പരീക്ഷണങ്ങളിലൂടെയാണ്.

എല്‍ എച് സ്പിന്നോഫുകളും നിരവധിയാണ്. (ഒരു പ്രത്യേക ആവശ്യത്തിനു വേണ്ടി മാത്രമുണ്ടാക്കുന്ന സാങ്കേതിക വിദ്യ തികച്ചും വ്യത്യസ്തമായ മറ്റൊരു മേഖലക്ക് ഗുണപ്പെടുന്നതിനെയാണ് സ്പിന്നോഫുകള്‍. അപ്പോളോ ദൗത്യങ്ങള്‍ക്ക് വേണ്ടി നിര്‍മ്മിച്ച ഐസി ചിപ്പുകള്‍ ഇലക്ട്രോണിക്സിലെയും കമ്പ്യൂട്ടിംഗിനെയും മാറ്റിമറിച്ചത് ഉദാഹരണം) പല വിധത്തിലുള്ള ഇമേജിങ്ങ് സാങ്കേതികവിദ്യകള്‍, അതിവേഗതയിലുള്ള ടൈമിങ്ങ് ആന്റ് കണ്ട്രോള്‍ സിസ്റ്റംസ്, നൂതനമയ ഇലക്ട്രോണിക് ചിപ്പുകള്‍ ഇവയൊക്കെ എല്‍.എച്.സി വേണ്ടി വികസിപ്പിച്ചതും എന്നാല്‍ വിവിധമേഖലകളില്‍ പ്രയോജനപ്പെടുന്നവയുമാണ്. എല്‍.എച്.സി യുമായി നേരിട്ട് ബന്ധമില്ലെങ്കിലും സേണില്‍ നടന്ന ഗവേഷണ വികസന പ്രവര്‍ത്തനങ്ങളുടെ ഭാഗമായാണ് വേള്‍ഡ് വൈഡ് വെബിന്റെ  പിറവി.

ഗ്ലുവിനോ എന്ന കണത്തിനു വേണ്ടിയുള്ള പരീക്ഷണങ്ങളും ഒപ്പം ഇനിയും കണ്ടെത്തിയിട്ടില്ലാത്ത അനവധി കണങ്ങള്‍ക്കായുള്ള പരീക്ഷണങ്ങളും ഇത്തവണത്തെ ലക്ഷ്യത്തിലുണ്ട്. ഇതുവരെ പിടിതരാത്ത ഡാര്‍ക്ക് മാറ്ററിനെക്കുറിച്ചും പഠനം നടക്കും. ഇനി വരും നാളുകള്‍ ഇത്തരം നിയന്ത്രിത കൂട്ടിയിടികള്‍ക്ക് ലോകം കാതോര്‍ക്കും. പ്രപഞ്ചഘടനയെപ്പറ്റി, അത് എന്തുകൊണ്ടുണ്ടാക്കിയിരിക്കുന്നു എന്ന ചോദ്യത്തിനെപറ്റി, പ്രപഞ്ചം തന്നെ നടത്തുന്ന അന്വേഷണം, പ്രപഞ്ചത്തിന്റെ ഭാഗമായ മനുഷ്യനിലൂടെയുള്ള അന്വേഷണം, പ്രപഞ്ചത്തിന്റെ സ്വയം വിലയിരുത്തല്‍ – അതാണ് എല്‍.എച്ച്.സി യില്‍ നടക്കുന്നതെന്ന് പറയാം. ഇതുവഴി നിരവധി പുത്തനുത്തരങ്ങള്‍ നല്‍കാന്‍ എല്‍ എച് സിക്ക് കഴിയും എന്നു തന്നെയാണ് ശാസ്ത്ര ലോകം പ്രതീക്ഷിക്കുന്നത്.

References

• https://accelconf.web.cern.ch/accelconf/d01/papers/IT11.pdf
• http://home.web.cern.ch/about/updates/2014/04/lhcb-confirms-existence-exotic-hadrons

Use Facebook to Comment on this Post

About The Author

ഡോ. ബി. ഇക്ബാല്‍
ചീഫ് എഡിറ്റര്‍
ekbalb@gmail.com

കേരള സംസ്ഥാന ആസൂത്രണ ബോർഡ് കേരളത്തിലെ  ആരോഗ്യ സംവിധാനത്തെ സംബന്ധിച്ച് നടത്തിയ പഠനം  ലോകമെമ്പാടും പ്രകീർത്തിക്കപ്പെട്ടുവരുന്ന കേരള ആരോഗ്യ മാതൃക അമേരിക്കൻ ആരോഗ്യ മാതൃകയായി മാറിക്കൊണ്ടിരിക്കയാണോ എന്ന സംശയം ജനിപ്പിച്ചിരിക്കയാണ്. അമേരിക്കൻ ആരോഗ്യ മാതൃകക്ക് നല്ലതും ചീത്തയുമായ വശങ്ങളുണ്ട്. ഇവ രണ്ടിലും കേരളം അമേരിക്കയ്ക്ക് തുല്യമായി കൊണ്ടിരിക്കയാണെന്ന് പറയേണ്ടിയിരിക്കുന്നു.

അമേരിക്കൻ മാതൃക

ലോകത്തെ മികച്ച ചികിത്സാകേന്ദ്രങ്ങളിൽ ഭൂരിപക്ഷവും അമേരിക്കയിലാണ്. അതേയവസരത്തിൽ സാമ്പത്തിക പിന്നോക്കാവസ്ഥയിലുള്ള മുപ്പത് ദശലക്ഷം അമേരിക്കക്കാർക്ക് പ്രാഥമിക ചികിത്സപോലും നിഷേധിക്കപ്പെടുന്നു എന്നതാണ് അമേരിക്കൻ മാതൃകയുടെ ദൂഷ്യ വശം.  ഏതാണ്ട് പൂർണ്ണമായും സ്വകാര്യ വൽക്കരിക്കപ്പെട്ട ആരോഗ്യ സംവിധാനമാണ് അമേരിക്കയിൽ നിലനിൽക്കുന്നത്. സ്വകാര്യ ഇൻഷ്വറൻസിന്റെ അടിസ്ഥാനത്തിലാണ് പൊതുജനാരോഗ്യ സംവിധാനം പ്രവർത്തിക്കുന്നത്. ഇൻഷ്വറൻസ് കവറേജില്ലാത്തവർക്ക് ചികിത്സ നിഷേധിക്കപ്പെടും.  പ്രതീശീർഷ ആരോഗ്യ ചെലവ് അമേരിക്കയിൽ കുതിച്ചുയരുകയുമാണ്. ആരോഗ്യ നിലവാരത്തിൽ അമേരിക്കയേക്കാൾ മുൻ പന്തിയിലുള്ള ബ്രിട്ടനിൽ പ്രതിശീർഷ ആരോഗ്യ ചെലവ് 3129 ഡോളറായിരിക്കെ അമേരിക്കയിലത് 7538   ഡോളറായി വളരെ ഉയർന്ന് നിൽക്കുന്നു.  ഒബാമ കെയർ എന്ന് വിളിക്കുന്ന ആരോഗ്യ പദ്ധതി നടപ്പിലാക്കികൊണ്ട് ദരിദ്രരായ അമേരിക്കക്കാർക്ക് ആരോഗ്യ സേവനം ഉറപ്പാക്കുന്നതിനും ആരോഗ്യ ചെലവ് കുറക്കുന്നതിനുമായി പ്രസിഡന്റ് ബാരക് ഒബാമ ശ്രമിച്ച് വരുന്നത് ഈ സാഹചര്യത്തിലാണ്.  ഇപ്പോൾ കേരളവും ഈ സ്ഥിതിയിലേക്ക് മാറികൊണ്ടിരിക്കയാണ്.

കടപ്പാട്: www.ihavenet.com

കേരള മാതൃക

ഏതാണ്ട് വികസിത രാജ്യങ്ങൾക്ക് തുല്യമായ ആരോഗ്യനിലവാരം കൈവരിച്ച സംസ്ഥാനമായിരുന്നു കേരളം. അംഗീകൃത ആരോഗ്യ മാനദണ്ഡങ്ങളായ പൊതു-ശിശു-മാതൃമരണനിരക്കുകൾ കുറച്ചുകൊണ്ടുവരാനും ആയുർദൈർഘ്യം വർധിപ്പിക്കാനും കേരളത്തിനു കഴിഞ്ഞീട്ടുണ്ട്. പ്രാഥമികാരോഗ്യ കേന്ദ്രം മുതൽ മെഡിക്കൽ കോളേജുകൾ വരെയുള്ള സർക്കാർ ആശുപത്രികൾ പാവപ്പെട്ടവർക്ക് ചികിത്സാലഭ്യത ഉറപ്പുവരുത്താൻ സഹായിച്ചിരുന്നു. സർക്കാരും പൊതു സമൂഹവും ചെലവിടുന്ന മൊത്തം തുക കണക്കിലെടുത്താൽ വികസിത രാജ്യങ്ങളിലേതിനേക്കാൾ വളരെ തുശ്ചമായ തുകയാണ് ആരോഗ്യാവശ്യങ്ങൾക്കായി നാം  ചെലവിടുന്നതെന്നും കാണാൻ കഴിയും. അതുകൊണ്ടാണ് സാമൂഹ്യനീതിയിലധിഷ്ടിതമായ   മികച്ച ആരോഗ്യനിലവാരം കൈവരിച്ച കേരള ആരോഗ്യമാതൃകയെ ലോകാരോഗ്യസംഘടനയും (Good Health at Low Cost Good Health with Social justice and Equity) മറ്റും പ്രകീർത്തിക്കുന്നത്. കേരളത്തിൽ ഇപ്പോൾ സ്വകാര്യ സൂപ്പാർ സ്പെഷ്യലിറ്റി ആശുപത്രികളിൽ മാത്രമല്ല സർക്കാർ മെഡിക്കൽ കോളേജുകളിലും  നവീന ചികിത്സാ സൗകര്യങ്ങൾ ലഭ്യമാണ്. ഹൃദ്രോഗ ചികിത്സക്കാവശ്യമായ ആഞ്ചിയോപ്ലാസ്റ്റിയും ബൈപാസ്സ് സർജറിയും അവയവ മാറ്റ ശാസ്ത്രക്രിയകളും കേരളത്തിൽ മിക്ക നഗരങ്ങളിലും ഇപ്പോൾ ലഭ്യമാണ്.

ആധുനിക ചികിത്സാ സൌകര്യങ്ങൾ ലഭ്യമായിരിക്കുമ്പോൾ തന്നെ ആരോഗ്യ ചെലവ് വർധിച്ച് വരുന്നതിന്റെ ഫലമായി അത് താങ്ങാനാവാതെ ദുർബല ജനവിഭാഗങ്ങൾക്ക് ചികിത്സ നിഷേധിക്കപ്പെടുന്ന അമേരിക്കയുടേത് പോലുള്ള സ്ഥിതിയിലേക്ക് കേരളവും  മാറികൊണ്ടിരിക്കയാണെന്നാണ് ആസൂത്രണബോ‍ർഡിന്റെയും മറ്റും പഠനങ്ങൾ സൂചിപ്പിക്കുന്നത്.

ശാസ്ത്ര സാഹിത്യ പരിഷത്ത് പഠനം

കേരളത്തിൽ ആരോഗ്യ ചെലവ് കുതിച്ചുയർന്നു കൊണ്ടിരിക്കയാണെന്ന് വളരെ നാളുകൾക്ക് മുൻപ് തന്നെ    കേരള ശാസ്ത്ര സാഹിത്യ പരിഷത്ത് ചൂണ്ടികാട്ടിയിരുന്നു. പരിഷത്ത് നടത്തിയ പഠനമനുസരിച്ച്   ജനങ്ങളുടെ ഭാഗത്ത് നിന്നുള്ള പ്രതിവർഷ പ്രതിശീർഷ ആരോഗ്യചെലവ് (Out of Pocket Expenditure 1987 ൽ 88 രൂപയായിരുന്നത് 1996  ൽ 548 ആയും  2004 ൽ 1710 ആയും 2011 ൽ 5629 ആയും വർധിച്ചിരിക്കയാണ്. മാത്രമല്ല ഏറ്റവും സാമൂഹ്യമായി പിന്നോക്കാവസ്ഥയിലുള്ളവർ മൊത്തം വരുമാനത്തിന്റെ 39.6 ശതമാനം (1996) ആരോഗ്യാവശ്യങ്ങൾക്കായി ചെലവാക്കേണ്ടിവരുമ്പോൾ സാമ്പത്തിക ശ്രേണിയിൽ മുൻപന്തിയിൽ നിൽക്കുന്നവർ കേവലം 6.79 ശതമാനം മാത്രമാണ് ചെലവിടേണ്ടിവരുന്നതെന്നും പരിഷത്ത് പഠനം വെളിപ്പെടുത്തിയിരുന്നു. സ്വാഭാവികമായും  ദുർബല ജനവിഭാഗത്തിൽ പെട്ടവരെ പരമ ദരിദ്രരാക്കുന്നതിനും ഇടത്തരക്കാരെ ദരിദ്രരേഖക്ക് താഴെക്ക് തള്ളിയിടുന്നതിനുമുള്ള കാരണങ്ങളിൽ പ്രധാനം  വർധിച്ചുവരുന്ന ചികിത്സാ ചെലവായി മാറുന്നതിൽ അത്ഭുതപ്പെടാനില്ല.

പരിഷത്തിന്റെ പഠന ഫലം ശരിവക്കുന്നതാണ് ഇപ്പോൾ ആസൂത്രണ ബോർഡ് പ്രസിദ്ധീകരിച്ച കണക്കുകളും. ബോർഡിന്റെ രേഖയിൽ (Report of the Expert Committee on Health: 2014) ഇന്ത്യയിൽ ഏറ്റവുമധികം ആരോഗ്യ ചെലവുള്ള സംസ്ഥാനമാണ് കേരളം എന്ന് രേഖപ്പെടുത്തിയിരിക്കുന്നു. നാഷണൽ ഹെൽത്ത് അക്കൗണ്ട്സ് കമ്മറ്റിയുടെ കണക്കനുസരിച്ച് 2004 ൽ കേരളീയരുടെ ആരോഗ്യ ചെലവ് 2663 രൂപയാണ്. രണ്ടാമതായി വരുന്ന പഞ്ചാബിലേത് 1112 രൂപയും മൂന്നാമത് വരുന്ന പശ്ചിമബംഗാളിലേത് 1086 രൂപയും മാത്രമാണ്. കേരളത്തിൽ 12 ശതമാനം ഗ്രാമീണരും 8 ശതമാനം നഗര വാസികളും 2004 ൽ ആരോഗ്യ ചെലവ് മൂലം ദരിദ്രരേഖക്ക് താഴേക്ക് തള്ളപ്പെട്ടു എന്നും ആസൂത്രണ ബോർഡ് രേഖയിൽ പറയുന്നു. ഇന്ത്യയുടെ മൊത്തം സ്ഥിതിയും വ്യത്യസ്ഥമല്ല. എൻ ഡി എ സർക്കാർ പ്രസിദ്ധീകരിച്ചിട്ടുള്ള കരട് ആരോഗ്യ നയരേഖ അനുസരിച്ച് വർഷം തോറും 6 കോടി 30 ലക്ഷം പേരാണ് വർധിച്ച് വരുന്ന ആരോഗ്യ ചെലവ് നേരിടാനാവാതെ ദരിദ്രരായി കൊണ്ടിരിക്കുന്നത്.

വർധിച്ച് വരുന്ന രോഗാതുരത

കേരളത്തിൽ ആരോഗ്യ ചെലവ് വർധിച്ച് വരുന്നതിന് നിരവധി കാരണങ്ങൾ ചൂണ്ടികാട്ടാനാവും.  രോഗാതുരത വർധിച്ച് വരുന്നതിനനുസരിച്ച് സർക്കാർ മേഖല വികസിപ്പിക്കാൻ കഴിയാതെ പോയത്,  പ്രാഥമിക ആരോഗ്യ സേവനം അവഗണിക്കപ്പെട്ടത്, അനിയന്ത്രിതമായ സ്വകാര്യ വൽക്കരണം, ആരോഗ്യ മേഖലയുടെ കോർപ്പറേറ്റ് വൽക്കരണം, ഔഷധ വിലവർധന തുടങ്ങിയ പലകാരണങ്ങളും ചേർന്നാണ് ആരോഗ്യ ചെലവ് കുത്തനെ വർധിപ്പിച്ച് കൊണ്ടിരിക്കുന്നത്.

1980 കളോടെ ആരോഗ്യമേഖലയിൽ കേരളം പ്രതിസന്ധികളെ നേരിട്ടു തുടങ്ങിയിരുന്നു. പൂർണ്ണമായും നിർമ്മാർജ്ജനം ചെയ്തുവെന്ന് കരുതിയിരുന്ന മഞ്ഞപ്പിത്തം, കോളറ, എലിപ്പനി, മലേറിയ തുടങ്ങിയ രോഗങ്ങൾ തിരിച്ച് വന്നു തുടങ്ങിയതോടെയാണ് കേരള ആരോഗ്യമാതൃകയിൽ വിള്ളലുകളുണ്ടെന്ന് സംശയം ഉയർന്നു വന്നത്. അധികം വൈകാതെ ഡെങ്കിപനി, ചിക്കുൻ ഗുനിയ, ജാപ്പാനിസ് മസ്തിഷ്കജ്വരം, എച്ച് വൺ എൻ വൺ തുടങ്ങിയ  പുത്തൻ പകർച്ചവ്യാധികൾ കേരളത്തിൽ പ്രത്യക്ഷപ്പെടുകയും വർഷം തോറും അനേകമാളുടെ ജീവനപഹരിക്കുകയും ചെയ്തു തുടങ്ങി. അതിനിടെ പ്രമേഹം രക്താതിമർദ്ദം തുടങ്ങിയ ജീവിതരീതി രോഗങ്ങളും കേരളത്തിൽ വർധിച്ചുവന്നു.  പകർച്ചവ്യാധികളുടേയും ജീവിതരീതി രോഗങ്ങളുടെയും സാന്നിധ്യമുള്ള ഇരട്ട രോഗഭാരം പേറുന്ന ജനസമൂഹമായി കേരളം മാറി. ഇന്ത്യയിൽ ഏറ്റവുമധികം ആത്മഹത്യ നടക്കുന്ന സംസ്ഥാനമാണ് കേരളം. ദേശീയ ശരാശരിയേക്കാൾ മൂന്നിരട്ടിയാണ് കേരളീയരുടെ ആത്മഹത്യാ നിരക്ക്. നിരവധി സാമൂഹ്യ സാമ്പത്തിക സാംസ്കാരിക പ്രതിസന്ധികളാണ് വ്യക്തികളെ ആത്മഹത്യക്ക് പ്രേരിപ്പിക്കുന്നത്. അതോടൊപ്പം മലയാളികളുടെ ദുർബലമായ മാനസികാരോഗ്യവും ആത്മഹത്യക്ക് കാരണമാവുന്നുണ്ട്. വാഹനാപകടത്തെ തുടർന്ന് ശരാശരി 10 പേരാ‍ണ് ദിനംപ്രതി കേരളത്തിൽ മരണമടയുന്നത്. എഴുപതാളുകൾക്കെങ്കിലും ഗുരുതരമായ പരിക്ക് പറ്റുകയും ചെയ്യുന്നു ചുരുക്കത്തിൽ, ദൈവത്തിന്റെ സ്വന്തം നാട് രോഗികളുടെയും സ്വന്തം നാടായി മാറികഴിഞ്ഞുവെന്ന് അതിശയോക്തികൂടാതെ തന്നെ പറയാൻ കഴിയും.

മാലിന്യ നിർമ്മാർജ്ജനം, പരിസരശുചിത്വം, കൊതുക് നശീകരണം, ശുദ്ധജലവിതരണം എന്നിവ ലക്ഷ്യമിട്ട്  നടപ്പിലാക്കാൻ ശ്രമിച്ച പരിപാടികളൊന്നും വേണ്ടത്ര വിജയിക്കാതെ പോയതാണ് പകർച്ച വ്യാധികൾ പടർന്നു പിടിക്കുന്നതിനുള്ള അടിസ്ഥാന കാരണം. രാഷ്ടീയ പാർട്ടികളും പല തദ്ദേശ സ്വയം ഭരണ സ്ഥാപനങ്ങളും മാതൃകാപരങ്ങളായ മാലിന്യ നിർമാർജ്ജന പദ്ധതികൾ നടപ്പിലാക്കാൻ അടുത്തകാലത്ത് ശ്രമിക്കുന്നത് സ്വാഗതാർഹമാണെങ്കിലും ശുചിത്വ കേരളം സുന്ദര കേരളം എന്ന ലക്ഷ്യം കൈവരിക്കാനും പകർച്ച വ്യാധികളെ പൂർണ്ണമായും നിയന്ത്രിക്കാനും നമുക്കിത് വരെ കഴിഞ്ഞിട്ടില്ല. കേരളീയരുടെ ആഹാരരീതിയിൽ വന്ന മാറ്റങ്ങളും മാനസികസംഘർഷം സൃഷ്ടിക്കുന്ന മത്സാരാധിഷ്ടിത ജീവിതരീതികളും വ്യായാമമില്ലാത്ത ജീവിതശൈലിയും  ചേർന്നാണ് ജീവിതരീതിരോഗങ്ങൾ വർധിപ്പിച്ചുകൊണ്ടിരിക്കുന്നത്.

സൂപ്പർ സ്പെഷ്യാലിറ്റി സംസ്കാരം

പ്രാഥമികാരോഗ്യ സേവനത്തിനും രോഗപ്രതിരോധത്തിനും ആരോഗ്യ വിദ്യാഭ്യാസത്തിനും ഊന്നൽ നൽകികൊണ്ട് കേരളീയരുടെ വർധിച്ചുവരുന്ന രോഗാതുരത നേരിടുന്നതിനു പകരം  വൻകിട ആശുപത്രികളെ കേന്ദ്രീകരിച്ചുള്ള, കേവലം ചികിത്സയിൽ മാത്രമൂന്നിയ പൊതുജനാരോഗ്യ സംവിധാനമാണ് നാം വളർത്തിയെടുത്തത്.  മെഡിക്കൽ കോളേജുകളടക്കമുള്ള സർക്കാർ ആശുപത്രികൾ രോഗികളുടെ എണ്ണത്തിലും സ്വഭാവത്തിലുമുണ്ടായ മാറ്റമനുസരിച്ച് വിപുലീകരിക്കാത്തതുമൂലം മുരടിച്ചുനിന്നു. ഈ ശൂന്യത മുതലെടുത്ത് കേരളമെമ്പാടും  ലാഭേശ്ചയോടെ പ്രവർത്തിക്കുന്ന വൻകിട സ്വകാര്യആശുപത്രികൾ സ്ഥാപിക്കപ്പെട്ടു യാതൊരു സാമൂഹ്യ നിയന്ത്രണവുമില്ലാതെ പണം കൈയിലുള്ള ആർക്കും മുതൽമുടക്കാവുന്ന മേഖലയായി ആതുരസേവന രംഗം മാറി. ഒരു കാലത്ത് സർക്കാർ ആശുപത്രികൾ മേധാവിത്വം വഹിച്ചിരുന്ന ആരോഗ്യമേഖലയിൽ  കോർപ്പറേറ്റ് സ്വഭാവമുള്ള സ്വകാര്യ ആശുപത്രികൾ ആധിപത്യം സ്ഥാപിച്ചു. ആരോഗ്യം ജന്മാവകാശമെന്ന നിലയിൽ നിന്നും കമ്പോളത്തിൽ വിലകൊടുത്തു വാങ്ങേണ്ട മറ്റൊരു ഉൽപന്നമായും ആതുരസേവനം ചികിത്സാ വ്യവസായമായും പരിവർത്തനം ചെയ്യപ്പെട്ടു. സ്വകാര്യമേഖലയിൽ തന്നെ, സർക്കാർ ആശുപത്രികൾക്കൊപ്പം സാധാരണക്കാർക്ക് ആശ്വാസം പകർന്നിരുന്ന ചെറുകിട ഇടത്തരം സ്വകാര്യ ആശുപത്രികൾ പലതും വൻ ശമ്പളത്തിന് ഡോക്ടർമാരെ നിയമിക്കാനും ചെലവേറിയ സാങ്കേതികവിദ്യകൾ ലഭ്യമാക്കാനും കഴിയാതെ വന്നതുകൊണ്ട് അടച്ച് പൂട്ടൽ ഭീഷണിയെ നേരിടാൻ തുടങ്ങി. ത്രിതല ചികിത്സക്ക് മാത്രം ഊന്നൽ നൽകുന്ന സൂപ്പർ സ്പെഷ്യാലിറ്റി സംസ്കാരമാണ് ഇപ്പോൾ കേരളത്തിലെ ആരോഗ്യമേഖലയിൽ ശക്തിപ്രാപിച്ചുവരുന്നത്. പ്ലാനിംഗ് ബോർഡ് രേഖയനുസരിച്ച് കേരളത്തിൽ 90.27 ശതമാനം പേരും  ചികിത്സക്കായി ആശ്രയിക്കുന്നത് സ്വകാര്യ മേഖലയെയാണ്.

ഔഷധ വിലവർധന

പേറ്റന്റ് നിയമം മാറ്റികൊണ്ടും  ഔഷധ വിലനിയന്ത്രണം അട്ടിമറിച്ച് കൊണ്ടും കേന്ദ്രസർക്കാർ നടപ്പിലാക്കുന്ന ഔഷധ നയം  ജീവൻ  രക്ഷാ മരുന്നുകളൂടെ വില അനിയന്ത്രിതമായി വർധിപ്പിച്ചിരിക്കയാണ്. ഔഷധ വിലവർധന ഏറ്റവും ദോഷകരമായി ബാധിക്കുന്നത് കേരളീയരെയാണ്. കേരളത്തിൽ എൺപത് ശതമാനത്തിലേറെ ജനങ്ങൾ ആധുനിക ചികിത്സയാണ് സ്വീകരിച്ച് വരുന്നത്. ജീവിത രീതി രോഗങ്ങൾക്കും കാൻസർ പോലുള്ള രോഗങ്ങൾക്കും ജീവിതകാലം മുഴുവൻ മരുന്ന് കഴിക്കേണ്ടിവരും. ഇന്ത്യയിൽ മൊത്തം ഉല്പാദിപ്പിക്കുന്ന മരുന്നിന്റെ 10 ശതമാനം  ഇന്ത്യൻ ജനതയിൽ മൂന്നു ശതമാനം മാത്രം വരുന്ന കേരളീയരാണ് ഉപയോഗിച്ച് വരുന്നത്. പരിഷത്ത് പഠനമനുസരിച്ച്  ആരോഗ്യ ചെലവിന്റെ 60 ശതമാനത്തിലേറെ മരുന്ന് വാങ്ങാനാണ് കേരളീയർക്ക് ചെലവിടേണ്ടിവരുന്നത്.

വേണം ജനകീയാരോഗ്യനയം

സാമൂഹ്യാരോഗ്യ ഇടപെടലുകളിലൂടെ രോഗപ്രതിരോധവും പ്രാരംഭഘട്ട ചികിത്സയും ഉറപ്പാക്കിയാല്‍ ചികിത്സാചെലവ് കുറക്കാനും ഗുരുതരമായ രോഗാവസ്ഥ തടയാനുമാവും. ചികിത്സക്ക് മാത്രം ഊന്നൽ നല്‍കുന്ന സൂപ്പർ സ്‌പെഷ്യാലിറ്റി ആശുപത്രികളും മെഡിക്കൽ കോളേജുകളും സ്ഥാപിക്കുന്നതരത്തിലുള്ള ഇപ്പോഴത്തെ   വികസനരീതി പിന്തുടര്‍ന്നാൽ കേരളീയരുടെ ആരോഗ്യപ്രശ്‌നങ്ങൾ പരിഹരിക്കാനുള്ള  വിഭവം കണ്ടെത്താൻ സര്‍ക്കാരും പൊതുസമൂഹവും ബുദ്ധിമുട്ടേണ്ടിവരും. വലിയ സാമൂഹ്യപ്രതിസന്ധികളിലേക്ക് കേരളം നീങ്ങും. അതാണിപ്പോൾ സംഭവിച്ച് കൊണ്ടിരിക്കുന്നതെന്നാണ് പരിഷത്തിന്റേയും ആസൂത്രണ  ബോർഡിന്റേയും പഠനങ്ങൾ സൂചിപ്പിക്കുന്നത്.

ആരോഗ്യമേഖലയിൽ കേരളം നേരിടുന്ന പ്രതിസന്ധികൾ കണക്കിലെടുത്തുകൊണ്ടുള്ള ആരോഗ്യനയം രൂ‍പീകരിക്കാൻ കഴിഞ്ഞിട്ടില്ല. പകർച്ചവ്യാധി വ്യാപനം, ജീവിതശൈലീ രോഗവർധന, വർധിച്ചുവരുന്ന ആരോഗ്യചെലവ് ഇവയെല്ലാം പരിഗണിച്ചുകൊണ്ട് കേരളത്തിനു സമുചിതമായ ഒരു ആരോഗ്യ നയം കരുപ്പിടിപ്പിക്കാൻ സർക്കാർ ഇനിയെങ്കിലും ശ്രമിക്കേണ്ടതാണ്. ആസൂത്രണ ബോർഡിന്റെ രേഖയിൽ ആരോഗ്യനയരൂപീകരണത്തിനുള്ള ശ്രദ്ധേയങ്ങളായ നിർദ്ദേശങ്ങൾ നൽകിയിട്ടുണ്ട്.  ചികിത്സയോടൊപ്പം, പ്രാഥമികാരോഗ്യ സേവനത്തിനും രോഗപ്രതിരോധത്തിനും ആരോഗ്യവിദ്യാഭ്യാസത്തിനും  തുല്യപ്രാധാ‍ന്യം നൽകികൊണ്ടുള്ള ആരോഗ്യനയമാണ് കരുപ്പിടിപ്പിക്കേണ്ടത്.

Use Facebook to Comment on this Post

“ബ്ലാക്ക് ഹോള്‍ ”
ഡോ. വി. രാമന്‍ കുട്ടിയുടെ കാര്‍ട്ടൂണ്‍ 2015 ജൂണ്‍ 11

Use Facebook to Comment on this Post

About The Author

ശരത് പ്രഭാവ്
sarathprabhav@gmail.com

പ്രപഞ്ച രഹസ്യങ്ങള്‍ തേടിയുള്ള ഹബിള്‍ ടെലസ്കോപ്പിന്‍റെ യാത്ര കാല്‍നൂറ്റാണ്ട് പിന്നിടുന്നു. ബഹിരാകാശ ഗവേഷണരംഗത്തെ നാഴികക്കല്ലായ ഈ ബഹിരാകാശ ടെലസ്കോപ്പിനെക്കുറിച്ച് വായിക്കുക.

ഹബ്ബിള്‍ ടെലസ്കോപ്പ് പകര്‍ത്തിയ നെബുലയുടെ ചിത്രം

ഗലീലിയോ ടെലസ്കോപ്പ് ആകാശത്തേക്ക് തിരിച്ചിട്ട് നാനൂറ് വർഷത്തിലേറെയായി. ജ്യോതിശാസ്ത്ര ചരിത്രത്തിൽ അത്രത്തോളം പ്രാധാന്യം കൈവന്ന മറ്റൊരു ടെലസ്കോപ്പ് ഉണ്ടെങ്കിൽ അത് ഹബിളാണ്. നിങ്ങൾ കണ്ടിട്ടുള്ള മനോഹരമായ ചിത്രങ്ങളെല്ലാം ഹബിളെടുത്തതാണ്. ഹബിൾ പ്രവർത്തിച്ച് തുടങ്ങിയിട്ട് 25 വർഷമായി. ഈ കഴിഞ്ഞ ഏപ്രിൽ 24 ന് ഹബിൾ ഓർബിറ്റിലെത്തിയിട്ട് 25 വർഷം പൂർത്തിയായി. ഹബിളിനെ ഇത്ര മികച്ചതാക്കുന്നത് 25 വർഷം നിലനിന്നു എന്നതല്ല. മറിച്ച് ഹബിൾ ജ്യോതിശാസ്ത്രത്തിനു നൽകിയ സംഭാവനകളാണ്.

ബഹിരാകാശ ടെലസ്കോപ്പുകൾ എന്തിന്?

പ്രകാശം എന്നത് ഒരു വൈദ്യുത കാന്തിക തരംഗമാണ്.  നാം കാണുന്ന ദൃശ്യപ്രകാശം, അതിൽ 400nm  മുതൽ 700nm വരെ തരംഗ ദൈർഘ്യമുള്ള തരംഗങ്ങളാണ്. 700nmനു മുകളിലും 400nmനു താഴെയും ദൈർഘ്യമുള്ള തരംഗങ്ങളെ നമ്മുടെ കണ്ണുകൾക്ക് കാണുവാൻ കഴിയില്ല. അങ്ങനെ നമ്മുടെ കണ്ണുകൾക്ക് കാണാൻ കഴിയാത്ത തരംഗങ്ങൾക്ക് ജ്യോതിശ്ശാസ്ത്രത്തിൽ വലിയ പ്രാധാന്യമുണ്ട്. ടി.വി. റിമോട്ട് കണ്ടിട്ടില്ലേ? അതിന്റെ മുന്നിലുള്ള എൽ.ഇ.ഡി കണ്ടിട്ടില്ലേ? അത് ഇൻഫ്രാറെഡ് എന്ന് പേരുള്ള വെളിച്ചമാണ് പുറത്ത് വിടുന്നത്. നമ്മുടെ കണ്ണുകൾക്ക് അവയെ കാണാൻ കഴിയില്ല. എന്നാൽ ആ എൽ.ഇ.ഡി ഒരു മൊബയിൽ ക്യാമറയിലേക്ക് പിടിച്ച് റിമോട്ട് ബട്ടൺ അമർത്തൂ. ഇപ്പോൾ ക്യാമറയിൽ നിങ്ങൾക്ക് ഇൻഫ്രാറെഡ് കാണാം!

ഇത്തരത്തിൽ കാണാൻ കഴിയാത്ത പല പ്രകാശങ്ങളുണ്ട്. റേഡിയോ തരംഗങ്ങൾ, മൈക്രോവേവ്, ഇൻഫ്രാറെഡ്, അൾറ്റ്രാവയലറ്റ്, എക്സ് റേ, ഗാമ റേ എന്നിങ്ങനെയാണവ. ഫോട്ടോഗ്രഫിയുടെ കണ്ടുപിടുത്തത്തോടെ ഇതിൽ പലതും ഫിലിമിൽ പകർത്താം എന്നു മനസ്സിലാക്കി.

ഒരു ചുവന്ന ഗ്ലാസ് ജനാലയിലൂടെ പുറത്തേക്ക് നോക്കിയാൽ നിങ്ങൾക്ക് ചുവന്ന പ്രകാശം മാത്രമല്ലേ കണ്ണിലെത്തുക. ബാക്കിയൊക്കെ ജനാല തടയില്ലേ.. ഏതാണ്ട് അതുപോലെയാണ് നമ്മുടെ അന്തരീക്ഷം.പലതരത്തിലുള്ള പ്രകാശങ്ങൾ ഉണ്ടെന്ന് പറഞ്ഞല്ലോ.. അതിൽ റേഡിയോ തരംഗങ്ങളും ദൃശ്യപ്രകാശത്തിനും മാത്രമേ അന്തരീക്ഷത്തിലൂടെ കടന്ന് ഭൂമിയിലെത്താൻ സാധിക്കൂ. ബാക്കി എല്ലാത്തിനേയും അന്തരീക്ഷം തടയുന്നു. ഈ ഭൂമിയിലെത്താൻ കഴിയാതെ പോകുന്ന പ്രകാശത്തെ കാണാൻ അന്തരീക്ഷത്തിന്റെ പുറത്ത് പോയാൽ മതിയല്ലോ. ബഹിരാകാശദൂരദർശിനികളും ചെയ്യുന്നത് അത് തന്നെയാണ്. ബഹിരാകാശ ദൂരദർശിനികളുടെ പാത അന്തരീക്ഷത്തിനുപുറത്താണ്. അതിനാൽ എല്ലാ പ്രകാശത്താലും പ്രപഞ്ചത്തെ നോക്കിക്കാണാൻ അതിനു കഴിയും.

പുഴയിൽ കുളിക്കാനിറങ്ങുമ്പോൾ  വെള്ളത്തിൽ മുങ്ങി പുറത്തേക്ക് നോക്കിയിട്ടില്ലേ. പുഴക്ക് പുറത്തുള്ളതിനെയൊക്കെ കാണുന്നത് വല്ലാതെ വികലമായും മങ്ങിയും രൂപവ്യത്യാസത്തിലും അല്ലേ. അതുപോലെ തീ കത്തുമ്പോൾ മറുവശത്ത് നിൽക്കുന്നവരെ കാണുമ്പോഴും ഇങ്ങനെയൊക്കെയല്ലേ കാണാറ്. വെള്ളത്തിന്റെ ഒഴുക്കും , അതേപോലെ ചൂടായ വായുവും ഒക്കെ നമ്മുടെ കണ്ണിലേക്ക് വരുന്ന പ്രകാശത്തിന്റെ പാതക്ക് വ്യത്യാസമുണ്ടാക്കുന്നതിനാലാണ് ഇങ്ങനെ സംഭവിക്കുന്നത്.

നമ്മുടെ അന്തരീക്ഷവും ഇങ്ങനെയാണ്. പല താപനിലയിലുള്ള കാറ്റുകൾ, മേഘങ്ങൾ,  ജലബാഷ്പം ഇവയൊക്കെ പ്രപഞ്ചത്തിലേക്കുള്ള കാഴ്ച്ചക്ക് തടസ്സമാകുന്നു. അതുപോലെ തന്നെ പകൽ സമയത്ത് ഭൂമിയിൽ നിന്നുള്ള നിരീക്ഷണത്തിനും അന്തരീക്ഷം അനുവദിക്കില്ല. സൂര്യപ്രകാശം അന്തരീക്ഷത്തിൽ വിസരിതമാകുന്നതിനാലാണിത്.എല്ലാത്തരം പ്രകാശങ്ങളെ കാണാനും അന്തരീക്ഷം മൂലമുള്ള വ്യതിയാനങ്ങൾ ഒഴിവാക്കാനും ബഹിരാകാശടെലസ്കോപ്പുക്കൾ ആവശ്യമാണ്.

ഹബിൾ സ്പേസ് ടെലസ്കോപ്പ്

1962-ൽ, ഒരു ബഹിരാകാശ ടെലസ്കോപ്പ് നിർമ്മിക്കണമെന്ന ആശയം മുന്നോട്ടു വരികയും, അമേരിക്ക അവരുടെ ശാസ്ത്രപരിപാടികളിൽ ഇതിനാവണം പ്രാധാന്യം നൽകേണ്ടതെന്ന് തീരുമാനിക്കുകയും ചെയ്തു. ബഹിരാകാശ ടെലസ്കോപ്പ് എന്നത് സാക്ഷാത്കരിക്കാന്‍ ഭാരിച്ച ചിലവ് വേണ്ടി വരുമെന്നതിനാൽ ഈസയുടെ കൂടി സഹകരണത്തോടുകൂടി പദ്ധതി മുന്നോട്ട് കൊണ്ടുപോകാമെന്നും ധാരണയായി. അങ്ങനെ അമേരിക്കൻ പാർലമെന്റ് 1977ൽ പദ്ധതിക്കാവശ്യമായ പണം അനുവദിക്കുന്നു. സോളാർ പാനൽ, ബാറ്ററികൾ അങ്ങനെ കുറെ ഭാഗങ്ങള്‍ ഈസ നിര്‍മ്മിച്ചു നല്‍കി. ഇതിനു പകരമായി നിരീക്ഷണ സമയത്തിന്റെ കാൽ ഭാഗം ഈസക്ക് നൽകുകയും ചെയ്തു. ദർപ്പണങ്ങളുണ്ടാക്കാനുണ്ടായ കാലതാമസം, ചലഞ്ചർ ദുരന്തം എന്നിവ കാരണം വിക്ഷേപണം വൈകി. ഒടുവിൽ 1990 ഏപ്രിൽ 24നു ഡിസ്കവറി സ്പേസ് ഷട്ടിലിൽ ഹബിളിനെ ബഹിരാകാശത്ത് 593 കി/മി ഉയരത്തിലുള്ള ഓർബിറ്റിൽ എത്തിച്ചു. ഓരോ 96 മിനിറ്റിലും ഹബിൾ ഒരു തവണ ഭൂമിയെ വലം വെക്കുന്നു. 7.5 കിലോമീറ്റർ ഓരോ സെക്കന്റിലും സഞ്ചരിക്കുന്നു. അതായത് ഇന്ത്യയെ മറി കടക്കാൻ വെറും 6.5 മിനിട്ട് ധാരാളം!

ഹബ്ബിള്‍ ടെലസ്കോപ്പ് വിക്ഷേപണത്തിനു മുന്‍പ്

പേരു വന്ന വഴി

ഹബിളിന്റെ ആദ്യപേര് ലാർജ് സ്പേസ് ടെലസ്കോപ്പ് എന്നായിരുന്നു. പിന്നീട് 1983ലാണ് പ്രശസ്ത ജ്യോതിശാസ്ത്രഞ്ജനായ  എഡ്വിൻ ഹബിളിനോടുള്ള ബഹുമാനാർഥം ഹബിൾ സ്പേസ് ടെലസ്കോപ്പ് എന്ന പേരു നൽകിയത്. ആൻഡ്രോമിഡ അടക്കമുള്ള ഗ്യാലക്സികൾ നമ്മുടെ ആകാശഗംഗയിലെ നെബുലകൾ ആണെന്നായിരുന്നു ശാസ്ത്ര ലോകം അതുവരെ കരുതിയിരുന്നത്. എന്നാൽ ഇവയിലേക്കുള്ള ദൂരം വേരിയബിൾ നക്ഷത്രങ്ങളെ ഉപയോഗിച്ച് അളക്കുകയും, ആകാശഗംഗ പോലെ മറ്റൊരു ഗ്യാലക്സിയാവാം ഇതെന്നും കണ്ടെത്തുന്നത് എഡ്വിന്‍ ഹബിളാണ്. ഗ്യാലക്സികളൊക്കെ ( ആൻഡ്രോമിഡ ഒഴികെ) അകന്ന് പോവുകയാണെന്നും പ്രപഞ്ചം വികസിക്കുകയാണെന്നും അദ്ദേഹം കണ്ടെത്തി. അക്കാലത്ത് ഉണ്ടായിരുന്ന ഏറ്റവും വലിയ ടെലസ്കോപ്പുകളാണ് തന്റെ നിരീക്ഷണങ്ങൾക്കായി അദ്ദേഹം ഉപയോഗിച്ചത്.
2.5 ബില്ല്യൺ മുടക്കി അയച്ച ഹബിളിൽ നിന്ന് ആദ്യം ലഭിച്ച ചിത്രങ്ങളെല്ലാം നിരാശജനകമായിരുന്നു. ഭൂമിയിൽ നിന്നെടുക്കുന്ന ചിത്രങ്ങളെക്കാൾ അത്ര മേന്മയുള്ളതൊന്നുമായിരുന്നില്ല ചിത്രങ്ങൾ. ഇത്രയധികം പണം മുടക്കി അയച്ച ഹബിളിന്റെ പ്രധാന ദർപ്പണം കൃത്യതയുള്ളതായിരുന്നില്ല. ആകൃതിയിൽ 2.3 മൈക്രൊമീറ്ററിന്റെ വ്യത്യാസം. നാം കടയിൽ നിന്ന് ഒരു രൂപക്ക് വാങ്ങുന്ന കവറിന്റെ കനം പോലും 20 മൈക്രോമിറ്ററിൽ താഴെയാണ്. ഏകദേശം ഒരു മുടിനാരിഴയുടെ നാലിലൊന്ന്. അത്ര ചെറിയ വ്യത്യാസമായിരുന്നു ഹബിളിന്ന്റെ പ്രധാന ദർപ്പണത്തിലുണ്ടായത്. ദർപ്പണത്തിൽ നിന്നും പ്രതിഫലിക്കുന്ന പ്രകാശം പലയിടങ്ങളിലാണ് ഫോകസ് ചെയ്യപ്പെട്ടത്. ഹബിളിന്റെ ഈ പ്രശ്നം വലിയ വിവാദമായി. ഇത്രയധികം പണം നഷ്ട്ടപ്പെടുത്തി എന്ന ചീത്തപ്പേരും.

എന്നാല്‍ ബഹിരാകാശത്ത് പോയി വീണ്ടും നന്നാക്കാൻ കഴിയുന്ന രീതിയിലായിരുന്നു ഹബിൾ നിർമ്മിച്ചത്. ഇത്തരത്തിലുള്ള ഏക ബഹിരാകാശ ടെലസ്കോപ്പും ഹബിൾ തന്നെ. 1993 ൽ ഹബിളിന്റെ ആദ്യ സർവീസ് മിഷൻ, ഹബിളിന് കോസ്റ്റാർ എന്നു വിളിക്കുന്ന ഒരു കണ്ണട വച്ച് കൊടുക്കാൻ. ഏതാണ്ട് ഒരു കണ്ണട പോലെ തന്നെയാണ് കോസ്റ്റാറും. കണ്ണിൽ വീഴുന്ന വെളിച്ചം റെറ്റിനയിൽ പതിക്കാതെ വരുമ്പൊൾ ഫോക്കസ്സ് ചെയ്യിക്കാൻ വേണ്ടി നാം കണ്ണട വക്കാറില്ലേ, ഏതാണ്ട് അതുപോലെ തന്നെ. പിന്നീടങ്ങോട്ട് ഹബിളിന്റെ സമയമായിരുന്നു.

38,000 ജ്യോതിശാസ്ത്ര വസ്തുക്കളുടെ ചിത്രങ്ങൾ. 23000 ലധികം ഡിവിഡിയിൽ ശേഖരിക്കാനുള്ള ഡാറ്റ ഹബിൾ കഴിഞ്ഞ 25 വർഷം കൊണ്ട് അയച്ചിരിക്കുന്നു.

ഒരു ദശലക്ഷം നിരീക്ഷണങ്ങൾ. 11,000ലധികം ശാസ്ത്ര പേപ്പറുകൾ ഹബിളിൽ നിന്നുള്ള നിരീക്ഷണങ്ങളേ അടിസ്ഥാനമാക്കി എഴുതപ്പെട്ടിരിക്കുന്നു. ഏറ്റവും ഫലവത്തായി ഉപയോഗിക്കപ്പെട്ട ശാസ്ത്രോപകരണം. ഹബിളിന്‍റെ നിരീക്ഷണത്തെ അടിസ്ഥാനമാക്കി ഒരു നോബെൽ പ്രൈസ്. അങ്ങനെ ഹബിളിന്‍റെ റെക്കോർഡുകൾ ഏറെ.

ഹബ്ബിള്‍ ടെലസ്കോപ്പ് ഭ്രമണപഥത്തില്‍

ഒരു വോൾവോ ബസിനോളം നീളവും(3.3മി)  രണ്ടാനയുടെ ഭാരവുമുള്ള(1110) ഹബിളിന്റെ പ്രധാന ദർപ്പണത്തിനു 2.4 മീറ്റർ വ്യാസമുണ്ട്. കസ്സെഗ്രിയൻ രീതിയിലുള്ള ടെലസ്കൊപ്പ് ആണ് ഹബിളിൽ ഉപയോഗിച്ചിരിക്കുന്നത്.

പ്രൈമറി മിററിൽ നിന്നും പ്രതിഫലിക്കുന്ന പ്രകാശം സെക്കണ്ടറി മിററിൽ പതിക്കുന്നു. അവിടെ നിന്നും പ്രൈമറിമിററിലുള്ള ദ്വാരത്തിലുടെ പ്രൈമറി മിററിനു പിന്നിൽ ഫോക്കസ് ചെയ്യപ്പെടുന്നു. ഫോക്കസ് ചെയ്യപ്പെടുന്ന ദൃശ്യങ്ങളേ ചിത്രമാക്കി മാറ്റാം. അവയെ പലതരത്തിലുള്ള പഠനത്തിനു വിധേയമാക്കം. ഇതിനൊക്കെ ആവശ്യമായ പലതരം ശാസ്ത്രീയോപകരണങ്ങൾ ഹബിളിലുണ്ട്.

1.    വൈഡ് ഫീൽഡ് ക്യാമറ -3

പേരു സൂചിപ്പിക്കുന്നത് പോലെ ഇതൊരു ക്യാമറയാണ്. വളരെ വിശാലമായ ഫീൽഡ് ഓഫ് വ്യൂ ഉള്ള ഈ ക്യാമറക്ക് ദൃശ്യപ്രകാശത്തോടൊപ്പം അൾട്രാവയലറ്റിലും ഇൻഫ്രാറെഡിലും കാണാൻ കഴിയും.

2.    കോസ്മിക് ഒർജിൻ സ്പെക്ട്രോഗ്രാഫ്

അൾട്രാവയലറ്റിലാണ് ഇതിന്റെ കാഴ്ച്ച. സ്പെക്ട്രോഗ്രാഫ് എന്നത് വരുന്ന പ്രകാശത്തെ ഒരു പ്രിസത്തിലൂടെ കടത്തിവിട്ട് അതിലേതൊക്കെ തരംഗ ദൈർഖ്യമുള്ള പ്രകാശം ഉണ്ട് എന്ന് കണ്ടെത്താനും അതുവഴി പ്രകാശസ്രൊതസ്സിന്റെ രാസഘടന, താപനില, അവയുടെ ചലനം എന്നിവ മനസിലാക്കാനും ഉപകരിക്കുന്നു.

3.    അഡ്വാൻസ്ഡ് ക്യാമറാ ഫോർ സർവെയിങ്ങ്

ശ്യാമദ്രവ്യത്തിന്റെ സാന്നിധ്യം, പ്രപഞ്ചോൽപ്പത്തി, അന്യഗ്രഹങ്ങൾ കണ്ടെത്തൽ, ഗ്യാലക്സിക്കൂട്ടങ്ങളുടെ പരിണാമം എന്നിങ്ങനെ പല ദൗത്യങ്ങളാണ് ഇതിനുള്ളത്. ദൃശ്യപ്രകാശത്തിലാണ് ഇതിന്റെ കാഴ്ച്ച.

4.    സ്പേസ് ടെലസ്സ്കോപ്പ് ഇമേജിങ്ങ് സ്പെക്ട്രോഗ്രാഫ്

ദൃശ്യപ്രകാശത്തിലും, ഇൻഫ്രാറെഡിലും, അൾട്രാവയലറ്റിലും പ്രവർത്തിക്കുന്ന സ്പെക്ട്രോഗ്രാഫാണിത്. ബ്ലാക് ഹോളുകളുടെ കണ്ടെത്തലുകൾക്ക് സഹായിച്ചിട്ടുള്ളതാണ് സ്പേസ് ടെലസ്സ്കോപ്പ് ഇമേജിങ്ങ് സ്പെക്ട്രോഗ്രാഫ്.

5.    നിയർ ഇൻഫ്രാ റെഡ്  ക്യാമറ ആൻഡ് മൾട്ടി ഒബ്ജെക്ട് സ്പെക്ട്രോഗ്രാഫ്

ഇൻഫ്രാറെഡിൽ പ്രവർത്തിക്കുന്ന ഇതിന് പ്രപഞ്ചത്തിലെ ചൂടുപിടിക്കലുപ്രക്രിയയെകുറിച്ച് കളെയും നോക്കിക്കാണാനാകും. ഇൻഫ്രാറെഡിൽ പ്രവർത്തിക്കുന്നത് കൊണ്ട് തന്നെ കൂടുതൽ ദൂരം കാണാനും. നക്ഷത്രങ്ങളുടെ ജനനത്തെക്കുറിച്ച് പഠിക്കാനുമുള്ള കഴിവുണ്ട്

ഹബിൾ സുപ്രധാന കണ്ടെത്തലുകൾ

1.    പ്രപഞ്ചത്തിനെത്ര വയസ്സായി

1920ൽ എഡ്വിൻ ഹബ്ബിൾ ആകാശഗംഗക്ക് പുറത്തുള്ള ഗ്യാലക്സികളൊക്കെ അകന്നു പോവുകയാണെന്നും. ഗ്യാലക്സികളിലേക്കുള്ള ദൂരം കൂടുന്നതനുസരിച്ച് അകലൽ വേഗവും കൂടും. കൂടുതൽ ദൂരെയുള്ളവ, കൂടുതൽ വേഗത്തിൽ അകലുന്നു. ദൂരവും, അകലൽ വേഗവും കണ്ടെത്തിയാൽ, വീഡിയോ പിറകോട്ടോടിക്കുന്നത് പോലെ, പ്രപഞ്ചോൽപ്പത്തിയിലേക്ക് തിരികെപ്പൊയ് നോക്കാവുന്നതാണ്. ഗ്യാലക്സികളിലേക്കുള്ള ദൂരമളക്കുന്നത് വേരിയബിൾ നക്ഷ്ത്രങ്ങളുടെ സഹായത്തോടെയാണ്. ലൈറ്റ് ഹൗസ് പോലെയാണവ. കൃത്യമായ ഇടവേളകളിൽ കണ്ണുചിമ്മികൊണ്ടിരിക്കും. കണ്ണു ചിമ്മുന്നതിന്റെ നിരക്കും നക്ഷ്ത്രത്തിന്റെ തിളക്കവും തമ്മിൽ ബന്ധമുണ്ട്. കണ്ണു ചിമ്മുന്നതിന്റെ നിരക്ക് അറിഞ്ഞാൽ അവക്ക് ഉണ്ടായിരിക്കേണ്ട തിളക്കം കണക്കാക്കാം. ഭൂമിയിൽ നിന്നും നോക്കുമ്പോഴുള്ള തിളക്കവുമായി ഇതിനെ താരതമ്യം ചെയ്താൽ തീവ്രത എത്ര കുറഞ്ഞെന്നും അതുവഴി ആ നക്ഷത്രത്തിലേക്കുള്ള ദൂരവും കണ്ടെത്താം. എന്നാൽ വിദൂര ഗ്യാലക്സികളിലെ നക്ഷ്ത്രങ്ങളെ ഇവിടെ നിന്നും കാണുക എന്നത് വളരെ ബുദ്ധിമുട്ടാണ്. അവിടെയാണ് ഹബ്ബിൾ സഹായത്തിനെത്തിയത്.  രണ്ട് ഡസനോളം ഗ്യാലക്സികളിലേക്കുള്ള ദൂരം ഹബ്ബിൾ കണക്കാക്കി. അങ്ങനെ പ്രപഞ്ചത്തിന്റെ പ്രായം ഇന്നറിയാവുന്നതിൽ വച്ച് ഏറ്റവ്യ്ം കൃത്യമായി ഹബ്ബിൾ കണക്കുകൂട്ടി. 13.8 ബില്ല്യൺ വർഷങ്ങൾ.

2.    പ്രപഞ്ച വികാസത്തിന്റെ വേഗത കൂടുന്നു.

പ്രപഞ്ചം വികസിക്കുകയാണല്ലോ. അതിന്റെ തോത് അളക്കാനുള്ള ശ്രമത്തിലായിരുന്നു Saul Perlmutter ഉം  Brian Schmidtഉം. അതി വിദൂര ഗ്യാലക്സികളിലേക്കുള്ള ദൂരം കണക്കാക്കേണ്ടതായ് വന്നു. പക്ഷെ ഇവിടെ വേരിയബിൾ സ്റ്റാർസിനെ ഉപയോഗിക്കുന്നത് സാധ്യമായിരുന്നില്ല. അവർ അതിനുപകരമായി ഉപയോഗിച്ചത് റ്റൈപ്പ് 1 എ സൂപ്പർനോവകളാണ്.  ഭൗമ ടെലസ്കോപ്പുകൾ ഈ നിരീക്ഷണത്തിനു പോരാതെ വന്നു. വിദൂര ഗ്യാലക്സികളിൽ നിന്നും വളരെ കുറഞ്ഞ അളവിൽ മാത്രമാണ് പ്രകാശം എത്തുന്നത്. അത് കാണാൻ ഹബ്ബിൾ വേണ്ടി വന്നു. ഗ്യാലക്സികളിലേക്കുള്ള ദൂരവും അവയുടെ അകലൽ വേഗവും അളന്നു. കണക്കുകൂട്ടിയപ്പോൾ കിട്ടിയ നിഗമനം ഞെട്ടിപ്പിക്കുന്നതായിരുന്നു. ഗ്യാലക്സികൾ അകലുന്നു എന്നതിലുപരി, ഈ അകലൽ ത്വരിതപ്പെട്ടുകൊണ്ടിരിക്കയാണ്. എന്തുകൊണ്ടാണ് ഈ ത്വരിതപ്പെട്ട വികാസം എന്നതിനു ഉത്തരം ലഭിച്ചില്ല. ശ്യാമോർജം ആയിരിക്കാം എന്നാണ് ഇപ്പോഴത്തെ സിദ്ധാന്തം.

3.    ഹബ്ബിൾ ഡീപ് ഫീൽഡ്

1995 ൽ, ആകാശത്ത് താരതമ്യേന നക്ഷത്രങ്ങൾ ഇല്ലാത്ത ഭാഗത്തേക്ക് ഹബ്ബിളിനെ തിരിച്ചു. നമ്മുടെ സപ്തർഷികളുടെ സമീപത്തായിട്ടായിരുന്നു ഈ സ്ഥാനം. ഒരു പത്തുപൈസ നാണയം ഒരു കൈയ്യകലത്തിൽ പിടിച്ചാൽ മറയുന്ന ആകാശഭാഗം, അത്ര ചെറിയ ആകാശകഷ്ണത്തിലേക്കാണ് ഹബ്ബിൾ നോക്കിയത്. ഒരാഴ്ച്ച സമയം കൊണ്ട് ഈ ഭാഗത്തിന്റെ 342 ചിത്രങ്ങൾ ഹബ്ബിളെടുത്തു. ചിത്രങ്ങളെല്ലാം കൂട്ടിയോജിപ്പിച്ചപ്പോൾ ഞെട്ടിപ്പിക്കുന്ന ചിത്രമാണ് ലഭിച്ചത്.അത്ര ചെറിയ ഒരു ഭാഗത്ത് ആയിരത്തിയഞ്ഞൂറോളം ഗ്യാലക്സികളെയാണ് ഹബ്ബിൾ കണ്ടത്.പിന്നീട് ആകാശത്തിന്റെ പലഭാഗങ്ങളും ഹബ്ബിൾ സൂഷ്മമായി നിരീക്ഷിച്ചു. അൾട്രാഡീപ് ഫീൽഡ് മറ്റൊരു ചിത്രമാണ്

4.    അന്യഗ്രഹങ്ങൾ
5.    തമോദ്വാരങ്ങൾ

ഗ്യാലക്സികളുടെ കേന്ദ്രത്തിൽ ബ്ലാക് ഹോളുകളുണ്ടെന്ന സിദ്ധാന്തത്തെ ശരിവക്കുന്ന കണ്ടെത്തലുകളാണ് ഹബ്ബിളിൽ നിന്ന് ലഭിച്ചത്. എം 87 എന്ന ഗ്യാലക്സിയുടെ കേന്ദ്രം ഹബ്ബിൾ നിരീക്ഷിച്ചു. കേന്ദ്രത്തെ ചുറ്റിക്കറങ്ങുന്ന പദാർഥങ്ങളുടെ വേഗതകണക്കാക്കിയാൽ നടുവിലുള്ള ബ്ലാക് ഹോളിന്റെ മാസ്സും കണക്കക്കാം. എം 87ഇൽ നിന്നും ലഭ്യമായ ഡാറ്റ അനുസരിച്ച് 3ബില്ല്യൺ സൂര്യനു തുല്ല്യമായ മാസുള്ള ഒരു ബ്ലാക് ഹോൾ ഉണ്ടെന്ന് കണ്ടെത്തി.

Use Facebook to Comment on this Post

About The Author

സാബു ജോസ്

ദ്രവ്യത്തിന്റെ പുതിയൊരു അവസ്ഥകൂടി ശാസ്ത്രജ്ഞർ കണ്ടെത്തിയിരിക്കുന്നു. 1937ൽ ആർതർ ജാൻ, എഡ്വേർഡ് ടെല്ലർ എന്നീ ശാസ്ത്രജ്ഞർ ചേർന്നു പ്രവചിച്ച ദ്രവ്യത്തിന്റെ അവസ്ഥയാണ് ജപ്പാനിലെ ടോക്കോ യൂണിവേഴ്‌സിറ്റിയിലെ ഗവേഷകർ പരീക്ഷണശാലയിൽ നിർമിച്ചത്. പരസ്പര വിരുദ്ധമായ ഗുണങ്ങൾ സമ്മേളിക്കുന്ന ഈ ദ്രവ്യാവസ്ഥയ്ക്ക് ജാൻ – ടെല്ലർ മെറ്റൽ എന്നാണ് പേരിട്ടിരിക്കുന്നത്.

ജാന്‍-ടെല്ലര്‍ ലോഹം

ഒരേ സമയം വൈദ്യുതചാലകമായും, വൈദ്യുതരോധിയായും അവതരിക്കാൻ ഈ ദ്രവ്യരൂപത്തിനു കഴിയും. വൈദ്യുത ചാലകമായി വർത്തിക്കുമ്പോൾ ഇത് ചാലകതയുടെ ഏറ്റവും ഉയർന്ന തലമായ അതിചാലകത (Super Conductivity)യിൽ എത്തിയിരിക്കും. സാധാരണയായി ഒരു ദ്രവ്യം അതിചാലക സ്വഭാവം പ്രദർശിപ്പിക്കുന്നത് അതിന്റെ ഊഷ്മാവ് കേവല പൂജ്യത്തിന് (-273 ഡിഗ്രി സെൽഷ്യസ്) അടുത്തെത്തുമ്പോഴാണ്. എന്നാൽ ഈ ദ്രവ്യം അതിചാലകസ്വഭാവം പ്രദർശിപ്പിക്കുന്നതിന് ഇത്രയും താഴ്ന്ന താപനില ആവശ്യമില്ല എന്നത് ശാസ്ത്രലോകത്തിന് വലിയ പ്രതീക്ഷയാണ് നൽകുന്നത്. വൈദ്യൂതി വിതരണ രംഗത്ത് വലിയൊരു കുതിച്ചുചാട്ടത്തിന് തിരികൊളുത്താൻ ഈ കണ്ടുപിടിത്തത്തിന് കഴിയുമെന്നാണ് കരുതപ്പെടുന്നത്. സാധാരണയായി വൈദ്യുതി വിതരണം ചെയ്യുന്ന അലുമിനിയം, ചെമ്പ് കമ്പികളുടെ പ്രതിരോധം കാരണം വലിയ തോതിൽ വൈദ്യൂതി പാഴായിപ്പോവുകയാണ് ചെയ്യുന്നത്. എന്നാൽ അതിചാലകതയിൽ ലോഹങ്ങൾ വൈദ്യുതിരോധം കാണിക്കാറില്ല. ഊർജ നഷ്ടം കൂടാതെ വൈദ്യുതി വിതരണം നടത്താൻ കഴിയുമെന്നർഥം. എന്നാൽ അതിചാലകത സൃഷ്ടിക്കാനാവശ്യമായ ഏറ്റവും കുറഞ്ഞ താപനില പരീക്ഷണശാലകളിൽ മാത്രമേ നിർമ്മിക്കാൻ കഴിയൂ. ഈ പരിമിതി മറികടക്കാൻ പുതിയ കണ്ടെത്തൽ സഹായിക്കുമെന്നാണ് കരുതുന്നത്. അതിചാലകതയിൽ ജാൻ-ടെല്ലർ മെറ്റൽ ലോഹസ്വഭാവത്തോടൊപ്പം കാന്തികതയും പ്രദർശിപ്പിക്കുന്നുണ്ട്.
നാനോ ടെക്‌നോളജിയുടെ മേഖലയിലുണ്ടായ മുന്നേറ്റമാണ് പുതിയ ദ്രവ്യരൂപത്തിന്റെ അസ്തിത്വം പരീക്ഷണ ശാലയിൽ തെളിയിക്കുന്നതിന് വഴിതെളിച്ചത്. 60 കാർബൺ ആറ്റങ്ങൾ ചേർന്ന് നിർമ്മിക്കുന്ന ബക്മിൻസ്റ്റർ ഫുള്ളറിൻ എ തന്മാത്രയിലുള്ള ആറ്റങ്ങളുടെ സവിശേഷമായ രാസബന്ധനത്തിൽ നിന്നാണ് ഈ ദ്രവ്യരൂപം സൃഷ്ടിക്കപ്പെടുന്നത്. ബക്മിൻസ്റ്റർ ഫുള്ളറിന്റെ തന്മാത്രയിലേക്ക് സീഷിയം എ ആൽക്കലി മെറ്റലിന്റെ ആറ്റങ്ങൾ നിക്ഷേപിച്ചാണ് ശാസ്ത്രജ്ഞർ പരീക്ഷണം നടത്തിയത്. കാർബൺ ആറ്റങ്ങൾ മാത്രമുള്ള ഫുള്ളറിൻ തന്മാത്രകളിലേക്ക് മറ്റ് ആറ്റങ്ങൾ കടത്തി നിർമിക്കുന്ന തന്മാത്രകൾ ഫുള്ളറൈഡുകൾ എന്നാണറിയപ്പെടുന്നത്. അങ്ങനെ നോക്കുമ്പോൾ പുതിയ ദ്രവ്യാവസ്ഥ പ്രദർശിപ്പിക്കുന്ന തന്മാത്ര ഒരു സീഷിയം ഫുള്ളറൈഡായിരിക്കും.

ജാന്‍-ടെല്ലര്‍ മെറ്റലിന്‍റെ ഘടന

ദ്രവ്യത്തിന്റെ അവസ്ഥകൾ

താപനിലയും മർദവുമനുസരിച്ച് ഖരം, ദ്രാവകം, വാതകം, എന്നിങ്ങനെ മൂന്ന് അവസ്ഥയിലുള്ള ദ്രവ്യരൂപങ്ങൾ നമുക്ക് സുപരിചിതമാണ്. ജലത്തിന്റെ ഈ മൂന്നവസ്ഥകൾ ഏവർക്കുമറിയാം – ഐസ് ഖരവും, ജലം ദ്രാവകവും, നീരാവി വാതകവുമാണ്. സോപ്പുകുമിള, ബട്ടർ ഇവ ഏതവസ്ഥയിലാണെ് ചിന്തിച്ചിട്ടുണ്ടോ? രണ്ടോ അതിലധികമോ അവസ്ഥകളുടെ സംഘാതമായ ഇത്തരം ദ്രവ്യരൂപങ്ങളെ കൊളോയിഡുകൾ എന്നാണു പറയുന്നത്. എന്നാൽ ഇത് ദ്രവ്യത്തിന്റെ ഒരവസ്ഥയായി കണക്കാക്കിയിട്ടില്ല.

കൊളോയ്ഡ്

ദ്രവ്യത്തിന്റെ നാലാമത്തെ അവസ്ഥയാണ് പ്ലാസ്മ. പ്രപഞ്ചത്തിൽ ഏറ്റവുമധികം കാണപ്പെടുത് പ്ലാസ്മ അവസ്ഥയിലുള്ള ദ്രവ്യമാണ്. നക്ഷത്രങ്ങളും, നക്ഷത്രാന്തരധൂളിയും, നീഹാരികകളുമെല്ലാം പ്ലാസ്മാ അവസ്ഥയിലാണുള്ളത്. പ്ലാസ്മാ അവസ്ഥ സ്വതന്ത്രമായ ചാർജിത കണങ്ങളുടെ കൂട്ടമാണ്. സ്വതന്ത്രമായ ഇലക്‌ട്രോണുകളും അയോണുകളുമാണ് പ്ലാസ്മ അവസ്ഥയിലുള്ളത്. ആറ്റങ്ങളും തന്മാത്രകളും നിലനിൽക്കില്ല. പ്ലാസ്മയിൽ വൈദ്യുത മണ്ഡലവും കാന്തിക മണ്ഡലവും സൃഷ്ടിക്കപ്പെടുന്നതുകൊണ്ട് പ്ലാസ്മയിൽകൂടി സുഗമമായി വൈദ്യുതി കടന്നുപോകും. നക്ഷത്രങ്ങളിൽ മാത്രമല്ല ഭൂമിയിലും പ്ലാസ്മ അവസ്ഥ സൃഷ്ടിക്കാൻ കഴിയും. ഇടിമിലുണ്ടാകുമ്പോൾ അന്തരീക്ഷത്തിലും, ഫ്‌ളൂറസെന്റ് ട്യൂബുകളിലും, നിയോ വിളക്കുകളിലും, പ്ലാസ്മ ടെലിവിഷനുകളിലും, ചിലതരം ജ്വാലകളിലും പ്ലാസ്മ സൃഷ്ടിക്കപ്പെടുന്നുണ്ട്.

ബോസ് – ഐൻസ്റ്റൈൻ കണ്ടൻസേറ്റ് ആണ് ദ്രവ്യത്തിന്റെ അഞ്ചാമത്തെ അവസ്ഥ. 1924 ൽ സത്യേന്ദ്രനാഥ് ബോസ്, ആൽബർട്ട് ഐൻസ്റ്റൈൻ എന്നിവർ ചേർന്നാണ് ദ്രവ്യത്തിന്റെ ഈ അവസ്ഥ പ്രവചിച്ചത്. കേവല പൂജ്യത്തിനടുത്ത താപനിലയിൽ സൂക്ഷ്മകണികകളുടെ സ്വഭാവ വിശേഷങ്ങൾ അവയുടെ ക്വാണ്ടം തലത്തിൽ വച്ച് തകരുകയും, വേവ് ഫങ്ഷൻ ഐക്യരൂപമുള്ളതായി തീരുകയും ചെയ്യുന്ന അവസ്ഥയാണിത്. 1995ൽ എറിക് കോർണൽ, കാൾ വെയ്മാൻ എന്നിവർ ചേർന്നാണ് ഈ ദ്രവ്യരൂപം പരീക്ഷണ ശാലയിൽ നിർമ്മിച്ചത്.

ബോസ് ഐന്‍സ്റ്റീന്‍ കണ്ടന്‍സേറ്റ്

ഫെർമിയോണിക് കണ്ടൻസേറ്റ് ആണ് ദ്രവ്യത്തിന്റെ ആറാമത്തെ അവസ്ഥ. ഇത് ബോസ് – ഐൻസ്റ്റൈൻ കണ്ടൻസേറ്റിന് സമാനമാണ്. എന്നാൽ ഫെർമിയോണുകൾ കൂടിച്ചേർന്നാണ് ഈ ദ്രവ്യാവസ്ഥ സൃഷ്ടിക്കപ്പെടുന്നത്. പോളിയുടെ അപവർജക തത്വമനുസരിച്ച് രണ്ട് ഫെർമിയോണുകൾക്ക് ഒരേ ക്വാണ്ടം നമ്പർ ഉണ്ടാകില്ല. എന്നാൽ ഒരു ജോടി ഫെർമിയോണുകൾ ചേർന്ന് ഒരു ബോസോണിനേപ്പോലെ പെരുമാറാൻ കഴിയും. ഇത്തരത്തിലുള്ള നിരവധി ഫെർമിയോ ജോടികൾക്ക് പോളിയുടെ തത്വം അപകടത്തിലാക്കാതെ തന്നെ ഒരേ ക്വാണ്ടം തലത്തിൽ നിലനിൽക്കാൻ കഴിയും. തത്വത്തിൽ ഇതാണ് ഫെർമിയോണിക് കണ്ടൻസേറ്റ്.

ക്വാർക്ക് – ഗ്ലുവോ പ്ലാസ്മയാണ് ഏഴാമത്തെ അവസ്ഥ. പ്രപഞ്ചോൽപത്തിയുടെ ആദ്യനിമിഷങ്ങളിലുണ്ടായ ദ്രവ്യരൂപമാണത്. ആറ്റങ്ങളോ തന്മാത്രകളോ രൂപപ്പെട്ടിട്ടില്ലാത്ത അത്യന്തം ഉയർന്ന താപനിലയിലാണ് ഈ ദ്രവ്യരൂപമുള്ളത്. ശക്ത ന്യൂക്ലിയർ ബലവാഹികളായ ഗ്ലുവോണുകളുടെ കടലിൽ ക്വാർക്കുകൾ സ്വതന്ത്രമായി സഞ്ചരിക്കുന്ന അവസ്ഥയാണിത്. 2000ൽ സേണിലെ ശാസ്ത്രജ്ഞരാണ് കണികാ പരീക്ഷണശാലയിൽ വച്ച് ക്വാർക്ക് – ഗ്ലുവോ പ്ലാസ്മ നിർമിച്ചത്.

റൈഡ്‌ബെർഗ് ആണ് ദ്രവ്യത്തിന്റെ എട്ടാമത്തെ അവസ്ഥയായി കണക്കാക്കുന്നത്. ഉത്തേജിപ്പിക്കപ്പെട്ട ആറ്റങ്ങൾ കൂടിച്ചേർന്നാണ് റൈഡ്‌ബെർഗ് മാറ്റർ നിർമ്മിക്കുന്നത്. നിശ്ചിത താപനിലയിൽ ഈ ആറ്റങ്ങൾ അയോണുകളായും ഇലക്‌ട്രോണുകളായും വിഘടിക്കപ്പെടും. കേവലപൂജ്യത്തിനടുത്ത താപനിലയിൽ റുബീഡിയം ആറ്റങ്ങൾ ഉപയോഗിച്ച് നടത്തിയ പരീക്ഷണത്തേത്തുടർന്ന് 2009ൽ ആണ് റൈഡ്‌ബെർഗ് തന്മാത്രയുടെ അസ്തിത്വം തെളിയിക്കപ്പെട്ടത്.

ദ്രവ്യത്തിന്‍റെ ഒന്‍പതാമത്തെ അവസ്ഥയാണ് ജാന്‍-ടെല്ലര്‍ മെറ്റല്‍.

പത്താമത്തെ അവസ്ഥയായി പ്രവചിക്കപ്പെട്ട ദ്രവ്യരൂപമാണ് കളര്‍-ഗ്ലാസ് കണ്ടന്‍സേറ്റ്. സൈദ്ധാന്തികമായി തെളിയിക്കപ്പെട്ടിട്ടുണ്ടെങ്കിലും ഇതുവരെ ഈ ദ്രവ്യരൂപം പരീക്ഷണശാലയില്‍ നിര്‍മിക്കാന്‍ കഴിഞ്ഞിട്ടില്ല. പ്രകാശവേഗതയുടെ തൊട്ടടുത്ത് സഞ്ചരിക്കുന്ന ഒരു അണുകേന്ദ്രം ഐന്‍സ്റ്റൈന്റെ ആപേക്ഷികതാ സിദ്ധാന്തമനിസരിച്ച് വലിപ്പം കുറഞ്ഞുവരികയും, ആണുകേന്ദ്രത്തിലെ ക്വാര്‍ക്കുകളെ പിടിച്ചു നിര്‍ത്തുന്ന ഗ്ലുവോണുകള്‍ ഒരു ബാഹ്യനിരീക്ഷകന് ആധാരമായി നിശ്ചലാവസ്ഥയിലാവുകയും ചെയ്യും. ഉന്നത ഊര്‍ജ നിലയില്‍ ഈ ഗ്ലുവോൺ മതിലുകള്‍ ദ്രവ്യത്തിന്റെ മറ്റൊരു അവസ്ഥ സൃഷ്ടിക്കും. റിലേറ്റിവിസ്റ്റിക് ഹെവി അയോൺ കൊളൈഡര്‍, ലാര്‍ജ് ഹൈഡ്രോൺ കൊളൈഡര്‍ തുടങ്ങിയ ശക്തമായ കണികാ ത്വരത്രങ്ങളില്‍ മാത്രമേ ദ്രവ്യത്തിന്റെ പത്താമത്തെ അവസ്ഥയായ കളര്‍-ഗ്ലാസ് കണ്ടന്‍സേറ്റ് സൃഷ്ടിക്കാന്‍ കഴിയു.

ഇതിനും പുറമെ സൈദ്ധാന്തിക തലത്തില്‍ നിലനില്‍ക്കുന്ന ഏഴില്‍ പരം ദ്രവ്യാവസ്ഥകള്‍ ശാസ്ത്രലോകം അംഗീകരിച്ചിട്ടുണ്ട്. ഇതുവരെ വ്യക്തമായി തിരിച്ചറിയാന്‍ കഴിയാത്ത ദ്രവ്യരൂപമാണ് ശ്യാമ ദ്രവ്യം അഥവാ ഡാര്‍ക്ക് മാറ്റര്‍. ആകെ പ്രപഞ്ച ദ്രവ്യത്തിന്റെ 83 ശതമാനവും ഡാര്‍ക്ക് മാറ്ററാണെ് അനുമാനിക്കുന്നു. എന്നാല്‍ ഇതിന്റെ അടിസ്ഥാന കണിക എന്താണെന്നോ അതിന്റെ ഘടനയെന്തെന്നോ ഇതുവരെ വ്യക്തമായിട്ടില്ല. ഗുരുത്വാകർഷണ സ്വഭാവം മാത്രം പ്രകടിപ്പിക്കുന്ന ഈ അദൃശ്യദ്രവ്യരൂപം, ദ്രവ്യത്തിന്റെ മറ്റൊരവസ്ഥയായിരിക്കും. വിദ്യുത്കാന്തിക വികിരണങ്ങളുമായി യാതൊരു പ്രതിപ്രവര്‍ത്തനവും ശ്യാമദ്രവ്യത്തിനില്ല എന്നതാണ് ഇത് ഇപ്പോഴും ഒരു ദുരൂഹപ്രതിഭാസമായി തുടരാന്‍ കാരണം.
ഈ പ്രപഞ്ചത്തേക്കുറിച്ച് നമ്മുടെ അറിവുകള്‍ ഒരു കൈക്കുമ്പിളോളം മാത്രമേയുള്ളൂ. ഒരു കടലോളം ദുരൂഹമാണത്!

Use Facebook to Comment on this Post

ഈ മാസവും ശുക്രനും വ്യാഴവും തന്നെയാണ് താരങ്ങൾ. ജൂലൈ ഒന്നിന് ആലിംഗനം ചെയ്തതിനു ശേഷം അവ പരസ്പരം അകലുന്ന കാഴ്ച ഒരു മാസം മുഴുവൻ നോക്കിയിരുന്ന് അടയാളപ്പെടുത്തുന്നത് രസകരമായ ഒരു പ്രവർത്തിയായിരിക്കും. ഈ മാസം 18ന് സൂര്യനസ്തമിച്ചു കഴിഞ്ഞാൽ ദ്വാദശി ചന്ദ്രൻ ഇവയുടെ കൂടെ ചേർന്ന് പടിഞ്ഞാറൻ ആകാശത്തിൽ മനോഹരമായ ഒരു ദൃശ്യവിരുന്നൊരുക്കുന്നതും കാണാം.

ജൂലൈ 7ന് ഇന്ത്യൻ സമയം രാത്രി 1.11ന് ആയിരിക്കും ഭൂമിയും സൂര്യനും തമ്മിലുള്ള അകലം ഏറ്റവും കൂടുന്നത്. അപ്പോൾ 152,093,480 കി.മീറ്റർ ആയിരിക്കും ഇവക്കിടയിലെ ദൂരം. ഭൂമിയുടെ ഭ്രമണ പഥത്തിന്റെ ദീർഘവൃത്താകാരം കാരണം വർഷത്തിൽ ഒരു ദിവസം സൂര്യനിൽ നിന്നും ഏറ്റവും അകലെയും(ജൂലൈ ആദ്യം) ഒരു ദിവസം(ജനുവരി ആദ്യം) സൂര്യനോട് അടുത്തും വരുന്നു.

ന്യൂ ഹൊറൈസൺ ബഹിരാകാശ പേടകം പ്ലൂട്ടോയോട് ഏറ്റവും അടുത്തെത്തുന്നതും ഈ മാസത്തിൽ തന്നെയാണ്. ജൂലൈ 14ന് ഇന്ത്യൻ സമയം വൈകുന്നേരം 5.20ന് ഈ പേടകം 12,500കി.മീറ്റർ വേഗതയിൽ പ്ലൂട്ടോയുടെ സമീപത്തു കൂടി കടന്നു പോകും. സെക്കന്റിൽ 4കി.മീറ്റർ വേഗതയിൽ കടന്നു പോകുന്ന ഈ പേടകം എടുക്കുന്ന ചിത്രങ്ങൾ പ്ലൂട്ടോ എന്ന കുള്ളൻ ഗ്രഹത്തെ കുറിച്ചുള്ള നമ്മുടെ വിവരങ്ങൾ പരിപോഷിപ്പിക്കുന്നതിന് ഏറെ സഹായകരമാകും. മാത്രമല്ല പ്ലൂട്ടോയുടെ സൂര്യന് അഭിമുഖമായുള്ള ഭാഗത്തു കൂടിയാണ് കടന്നു പോകുക എന്നതുകൊണ്ട് തെളിച്ചമുള്ള ചിത്രങ്ങളായിരിക്കും കിട്ടുക.

ഈ മാസത്തെ ഉൽക്കാവർഷം 28നാണ്. ഡെൽറ്റ അക്വാറീഡ് ഉൽക്കാവർഷം എന്നറിയപ്പെടുന്ന ഇത് കുംഭം രാശിയുടെ ദിശയിലാണ് കാണാൻ കഴിയുക.

ബുധൻ ഈ മാസം ആദ്യദിവസങ്ങളിൽ 5മണിക്കു മുന്നെ ഉദിക്കുന്നതു കൊണ്ട് മഴക്കാറില്ലാത്ത തെളിഞ്ഞ ആകാശമാണെങ്കിൽ സൂര്യോദയത്തിനുമുമ്പെ കാണാൻ കഴിയും. എന്നാൽ ദിവസങ്ങൾ കഴിയുന്തോറും സൂര്യനോട് കൂടുതൽ കൂടുതൽ അടുക്കുന്നതു കൊണ്ട് കാഴ്ചയിൽ നിന്നും അപ്രത്യക്ഷമാവും. മാസാദ്യത്തിൽ ഇടവം രാശിയോടൊപ്പം ഉദിക്കുന്ന ബുധൻ മാസാവസാനമാവുമ്പോഴേക്കും കർക്കടകം രാശിയിൽ എത്തിയിരിക്കും.

ശുക്രനെ ഈ മാസത്തിൽ സൂര്യൻ അസ്തമിച്ചു കഴിഞ്ഞാൽ പടിഞ്ഞാറൻ ആകാശത്ത് തെളിഞ്ഞു കാണാം. ഒന്നിന് വ്യാഴത്തോടു ചേർന്നു നിൽക്കുമ്പോൾ 0.5ഡിഗ്രി മാത്രമായിരിക്കും കാഴ്ചയിൽ ഇവ തമ്മിലുള്ള അകലം. പക്ഷെ ഇവ തമ്മിലുള്ള യഥാർത്ഥ അകലം കോടിക്കണക്കിനു കി.മീറ്ററാണ്. ചിങ്ങം രാശിയിലാണ് ഈ മാസത്തിൽ ശുക്രന്റെ സ്ഥാനം.

ഈ മാസത്തിലും ചൊവ്വ സൂര്യന്റെ പ്രകാശ വലയത്തിൽ നിൽക്കുന്നതു കൊണ്ട് കാണാൻ പ്രയാസമായിരിക്കും. വളരെ തെളിഞ്ഞ ആകാശമാണെങ്കിൽ മാത്രം മാസാവസാനത്തിൽ സൂര്യൻ അസ്തമിച്ചതിനു ശേഷം അൽപനേരം ചൊവ്വയെ പടിഞ്ഞാറൻ ചക്രവാളത്തിൽ കാണാം. മിഥുനം രാശിയിലായിരിക്കും ഇതിന്റെ സ്ഥാനം.

വ്യാഴത്തെ ഈ മാസം മുഴുവൻ പടിഞ്ഞാറെ ആകാശത്ത് കാണാൻ കഴിയും. ശുക്രനും ചന്ദ്രനുമായി ചേർന്ന് വ്യാഴം നടത്തുന്ന നാടകത്തെ കുറിച്ച് മുകളിൽ പറഞ്ഞിട്ടുണ്ടല്ലോ. ചിങ്ങത്തിലാണ് വ്യാഴത്തെ കാണാൻ കഴിയുക.

ശനിയെ വൃശ്ചികത്തിന്റെ തലക്കു മുകളിലായി അൽപം ചുവന്ന നിറത്തിൽ കാണാനാകും. ഒരു ദൂരദർശിനിയിലൂടെ നോക്കുകയാണെങ്കിൽ അതിന്റെ വലയങ്ങളും കാണാൻ കഴിയും.

About The Author

തയ്യാറാക്കിയത്: ഷാജി അരിക്കാട്
shajiarikkad@gmail.com

Use Facebook to Comment on this Post

“ബ്ലാക്ക് ഹോള്‍ ”
ഡോ. വി. രാമന്‍ കുട്ടിയുടെ കാര്‍ട്ടൂണ്‍ 2015 ജൂലൈ 12

Use Facebook to Comment on this Post

അധികം കാഴ്ചകളൊന്നും ഒരുക്കി വെക്കാത്ത മാസമാണ് ഇത്. ഭൂമിയിലാണ് ഈ മാസം വസന്തം സൃഷ്ടിക്കുന്നത്. എങ്കിലും വാനനിരീക്ഷകരെ പൂർണ്ണമായും നിരാശരാക്കേണ്ട എന്നു കരുതിയാകണം മനോഹരമായ ഒരു ഉൽക്കാവർഷം ഈ മാസത്തേക്കു വേണ്ടി കരുതിവെച്ചത്.

ഈ മാസത്തെ പ്രധാന ആകാശക്കാഴ്ച പെർസീഡ്സ് ഉൽക്കാവർഷമാണ്. ആഗസ്റ്റ് 11,12,13 തിയ്യതികളിലാണ് ഇതു കാണാനാവുക. ഈ ദിവസങ്ങളിൽ അർദ്ധരാത്രിക്കു ശേഷം പെർസ്യൂസ് നക്ഷത്രരാശിയുടെ ദിശയിൽ നിന്നും ധാരാളം ഉൽക്കകൾ വീഴുന്നത് കാണാനാകും. സ്വിഫ്റ്റ് ടട്ടിൽ എന്ന ധൂമകേതു വഴിയിലുപേക്ഷിച്ചു പോയ അവശിഷ്ടങ്ങൾ ഭൂമിയുടെ ആകർഷണവലയത്തിൽ പെടുമ്പോഴാണ് പെർസീഡ്സ് ഉൽക്കാവർഷം ഉണ്ടാവുന്നത്. ഉൽക്കാവർഷങ്ങളിൽ വളരെ മനോഹരമായ ഒന്നാണിത്. നഷ്ടപ്പെടാതെ നോക്കുക.

ശനിയൊഴികെയുള്ള ഗ്രഹങ്ങളെല്ലാം സൂര്യനോടു ചേർന്നു നിൽക്കുന്നതുകൊണ്ട് ഈ മാസം അവയെ കാണാനാവില്ല. ശനിയെ വൃശ്ചികം രാശിയിൽ കാണാനാകും.  ഒരു ദൂരദർശിനിയിൽ കൂടി നോക്കുകയാണെങ്കിൽ വലയങ്ങൾ വളരെ ഭംഗിയിൽ കാണാനാകും.

വൃശ്ചികം നക്ഷത്രരാശിയാണ് ഈ മാസം സൂര്യനസ്തമിച്ചാൽ ആകാശത്തിനഴകേകുവാനുണ്ടാവുക. മനോഹരമായ നക്ഷത്രഗണങ്ങളിൽ പ്രധാനപ്പെട്ട ഒന്നാണ് വൃശ്ചികം. പേരു സൂചിപ്പിക്കുന്നതു പോലെ തേളിന്റെ ആകൃതി കൃത്യമായി സങ്കൽപ്പിച്ചെടുക്കാൻ കഴിയുന്ന ഒരു ഗണമാണിത്. ഈ ഗണത്തിലെ ഏറ്റവും തിളക്കം കൂടിയ നക്ഷത്രമായ അന്റാറീസും അതിനപ്പുറത്തും ഇപ്പുറത്തുമുള്ള ഓരോ നക്ഷത്രങ്ങളെ കൂടി കൂട്ടിയാൽ നമ്മുടെ തൃക്കേട്ടയായി. അതിനു ശേഷം വാലറ്റം വരെയുള്ള നക്ഷത്രങ്ങളെ ചേർത്താണ് മൂലം എന്നു പറയുന്നത്. തലയിൽ കാണുന്ന അഞ്ചു നക്ഷത്രങ്ങളാണ് അനിഴം. വാലിനു തൊട്ടു വടക്കായി ബട്ടർഫ്ലയ് ക്ലസ്റ്റർ (M6), ടോളമി ക്ലസ്റ്റർ (M7) എന്നീ ഓപ്പൺ ക്ലസ്റ്ററുകൾ ഉണ്ട്. തൃക്കേട്ടയുടെ അടുത്ത് M4, അനിഴത്തിന്റെ തെക്കുകിഴക്കായി M80 എന്നീ ഗ്ലോബുലർ ക്ലസ്റ്ററുകളും ഉണ്ട്. ഒരു ദൂരദർശിനിയുടെ സഹായത്തോടെ ഇവയെ കണ്ടെത്താനാവും.
വൃശ്ചികത്തിന്റെ വാലിലൂടെ വടക്കോട്ട് നീണ്ടുകിടക്കുന്ന ക്ഷീരപഥവും മഴക്കാറും നിലാവും ഇല്ലാത്ത ആകാശത്ത് കാണാൻ കഴിയും.

Use Facebook to Comment on this Post